Ваъда қилинган машина терими ўрнига муносабатбозлик

Ўзбек газеталари нималарни ёзмоқда? Скриншот: gazeta.uz

Маҳрум президент Ислом Каримовнинг ҳар бир чиқиши, ваъдалари ортидан халқнинг турли қатлами вакилларининг бу чиқишларга муносабат билдириши совет давридан қолган мазкур анъананинг умри узайишига хизмат қилиб келаётган эди.

Янги президентнинг чиқишлари ортидан ҳам маҳаллий нашрларда муносабатбозлик авжига минди. Хусусан, Шавкат Мирзиёевнинг Конституция кунига ва президент лавозимига киришишга бағишланган тантанали маросимлардаги маърузалари ортидан газеталар саҳифа-саҳифа муносабатларни чоп этмоқда.

«Адолат» газетасида (16.12) эълон қилинган ана шундай муносабат мақолаларнинг бирида шу номдаги партиянинг парламентдаги депутати кўпчилик биладиган, лекин очиқ айтилмайдиган бир ҳақиқатни ошкор қилиб қўйган.

Бу мақолада депутат Қонунчилик палатасига ташаббус ҳуқуқи асосида киритилаётган қонун лойиҳаларининг асосий қисми Вазирлар Маҳкамаси томонидан киритилаётганини тан олган.

Яъни у халқ сайлаган депутатлар ҳукумат тайёрлаган қонун лойиҳаларини тасдиқлаш билан банд эканини, уларнинг ўзлари қонунчилик ташаббуслари борасида деярли иш қилмаслигини айтиб қўйган.

«Ўзбекистон овози» газетаси ҳам ўз муассиси бўлмиш Халқ демократи партияси фаолларининг Ш.Мирзиёев маърузаларига қатор муносабатларини эълон қилди.

Бу фаоллар янги президент тилга олган масалаларнинг «долзарблиги» ҳақида тўлиб-тошиб гапириб, мазкур маърузалардан келиб чиқадиган «вазифаларни белгилаб олиш» билан машғул шу кунларда.

Энг қизиғи, улар аввалги президентнинг маърузаларидан «келиб чиқадиган вазифалар»ни ҳам жуда тез белгилаб олар, аммо бу вазифалар ижро этилмай қолиб кетаверар эди.

Шунинг учун халқда бу фаолларнинг Ш.Мирзиёев кўтараётган масалаларни ечиш ваъдаларига нечоғлик ишониш мумкин, деган истиҳола пайдо бўлиши табиийдир.

Айни пайтда Мирзиёевнинг ўзи ҳам ваъдасининг устидан чиқиши билан мақтана олмайди. Уч йил аввал у, 2016 йилда пахтанинг 90% машиналарда терилишини ваъда қилган эди.

Бироқ пахта ҳамон ваъда қилинган машиналар ўрнини босаётган минглаб талабалар ва давлат муассасалари ходимлари қўли билан терилмоқда.

Баҳодир Шариф
Ўзбекистонлик газетхон таҳаллуси
Eltuz.com

Facebook orqali izoh qoldirish
Изоҳсиз

Изоҳ қолдириш

Кун иқтибоси

Имом ўшанда ўз нутқида, бир йил бурун – 1996 йил 24 феврал воқеасини эслайди. “Ўшанда мендан масжид тортиб олинган ва бу элга овоза бўлган эди, ҳудди шу бугунгидай”, — дейди у кулиб.

Имейл орқали обуна бўлиш

Мақолаларимизни доимий олиб туриш учун электрон почтангизни ёзинг.