Асосий мавзулар
29 август 2016

Партия етакчиси раҳнамосини нега унутди?

«XXI аср» газетасида (25.08.2016) ЎзЛиДеП партияси Сиёсий Кенгаши Ижроия қўмитаси раисининг «истиқлол берган улкан имкониятлар, эришилган бемисл ютуқлар»га бағишланган «Яратувчанлик ва бунёдкорлик йўли» сарлавҳали мақоласи эълон қилинди.

Мақола мустақилликнинг илк йилларида «бизга собиқ иттифоқдан жар ёқасига келиб қолган, иқтисоди батамом издан чиққан давлат, аҳолининг эртанги кунга ишончини сўндирган очлик, қашшоқлик каби ижтимоий муаммолар мерос бўлиб қолгани»дан ёзғириш билан бошланади.

Кейин эса яна ўша-ўша эски гапларга ўтилади. «Мустақиллик йилларида амалга оширилган изчил ислоҳотлар натижасида тарихан қисқа даврда мамлакатимиз иқтисодиёти 6 баробардан кўпга ўсиб, аҳолининг реал даромадлари жон бошига ҳисоблаганда қарийб 12 баробар ошгани», «кейинги ўн бир йил давомида ялпи ички маҳсулот ишлаб чиқаришнинг ўсиши 8 фоиздан кам бўлмагани» каби қатор «ютуқлар» бирма-бир санаб чиқилади.

Эътиборли жиҳати шундаки, мақола анчагина катта бўлишига қарамай, унда фақат бир жойда, у ҳам бўлса, 1991 йилда қабул қилинган фармон муносабати билан юртбоши эслатилган, холос.

Ғайриодатий ҳолат эмасми бу? Одатда партиялар вакилларининг бундай мақолаларида президентнинг номи қайта-қайта тилга олинади, «халқимизнинг барча ютуқлари» унга боғланади.

ЎзЛиДеП етакчисининг мақоласида мадҳ, асосан, президент эмас, истиқлол шаънига айтилгани, улар бир-бирига қориштириб ташланмагани нимани англатаркин?!

ХДПга аҳоли қандай муаммолар юзасидан шикоят қилади?

rasm3003«Ўзбекистон овози» газетасида (27.08.2016) «Мурожаат эътиборсиз қолмайди» деган дабдабали сарлавҳа билан эълон қилинган мақола Ўзбекистон Халқ демократик партиясининг Хоразм вилоят, шаҳар, туман кенгашлари қошида ташкил этилган жамоатчилик қабулхоналари «электорат мурожаатларини ўрганиш ва уларга ечим топишда муҳим ўрин тутаётгани»ни таъкидлашдан бошланади.

Унда айтилишича, жорий йилнинг шу давригача жамоатчилик қабулхоналарига фуқаролардан 248 та мурожаат тушган бўлиб, уларнинг 80 фоизи ижобий ҳал қилинган. Банк пластик карточкалари орқали тўловни амалга оширишдаги муаммолар ечимига алоҳида эътибор қаратилган.

Айтиш керакки, пластик карточка муаммосини бутун бир ҳукумат ҳал эта олмаётган бир пайтда партия бу масалага алоҳида эътибор қаратиб, унинг ечимига эришганига ишониш қийин. Ҳатто партиянинг бу борада парламент орқали ҳам бирор саъй-ҳаракат қилгани тўғрисида маълумот топа олмайсиз.

Мақолада жамоатчилик қабулхоналарига тушаётган мурожаатларнинг аксарияти моддий ёрдам, иш билан таъминлаш, коммунал соҳа, ички йўлларни таъмирлаш масалалари билан боғлиқлиги таъкидланади.

Аввало, бутун бир вилоятдан бор-йўғи 250 га яқин мурожаат тушганининг ўзиёқ аҳолининг партия жамоатчилик қабулхоналарига ишончи йўқлиги инъикоси аслида. Қолаверса, юқорида энг кўп тушгани айтилган мурожаатларда кўтариладиган масалаларни ҳал қилиб беришга ХДПнинг кучи етармикин?

Қизилтепа юз фоиз газлаштирилганми?

rasm3002«Қишлоқ ҳаёти» газетаси (27.08.2016) Навоий вилоятининг Қизилтепа тумани юз фоиз газлаштирилганини эълон қилди.

Газетанинг ёзишича, туманни газлаштириш ўтган асрнинг 50-йиллари охирларидан бошланиб, ўшанда туман маркази ва Бўстон қўрғони табиий газ билан таъминланган. Бошқа ҳудудларини газлаштириш лойиҳалари эса мустақилликкача фақат қоғозда қолиб кетган.

«Бугун Қизилтепа вилоятнинг юз фоиз газлаштирилган туманларидан бири. Унинг энг чекка ҳудуди – Ўртачўл массивига ҳам мустақиллик туфайли табиий газ етиб бориб, уй бекаларининг оғири енгиллашди», дейилади газетада.

Шу муносабат билан ўртачўллик фермерлардан бири тилидан «айниқса, биз, аёллар, оналарга муҳтарам юртбошимиз томонидан кўрсатилаётган эътибор ва рағбатдан бошимиз осмонда…. Барча соҳаларда оталарча ғамхўрлик, оқилона сиёсат туфайли тинчлик ва барқарорликнинг самарасини ҳар қадамда сезиб, ҳис этиб турибмиз», дейилади.

Нашр эндиликда тумандаги 24 минг 725 хонадон газдан фойдаланиб, 17,5 мингдан ортиқ оилага газ қувурлар орқали, 7 мингдан ошиғига эса суюлтирилган ҳолда етказиб берилаётганини билдирган.

Ўзбекистоннинг Тошкентдан ташқари барча вилоятлари, туман ва шаҳарлари, айниқса, қиш мавсумида газсиз ўтирганини маҳаллий журналистлар «кўрмаётган» бўлса-да, халқ билиб-кўриб турибди.

Шунинг учун Қизилтепада газ муаммоси юз фоиз ҳал этилганига ишониш қийин.

Қизилтепаликлар, ҳақиқатан ҳам газ билан таъминланиш борасидаги муаммоларингиз тўлиқ ҳал этилганми ёки газета муштарийларни яна алдаяптими?

Eltuz.com

Тағин ўқинг
18 ноябр 2016
Абдулла Ориповнинг вафоти халқимизнинг севимли шоири сўнгги вақтларда норасмий тақиқ остида яшагани, бундан бир қанча вақт илгари «Озодлик» радиоси ...
23 май 2017
Ўзбекистон ва Тожикистон орасида мина майдонлари зарарсизлантирилмаган, визали бориш келиш бекор қилинмаган бўлса ҳам, икки давлат рахбарларининг Саудия Арабистонида ...
5 феврал 2016
Арамаис ва унинг шериклари устидан суд тугади. Ҳукмни кутиш қолди. Прокурор унга 18 йил сўради. 2015 йилнинг 4 сентябрида, ...
27 март 2017
Ўзбекистонда шу пайтгача кўкларга кўтарилиб мақталиб келинган таълим тизимининг асл аҳволи тўғрисида аччиқ ҳақиқатлар ошкор бўлаётгани, оммавиий ахборот воситаларида ...
Блоглар
19 июн 2017
Ўзбекистон президенти Шавкат Мирзиёев яқинда Тошкентда дин арбоблари, жамоат ва давлат идоралари вакиллари билан ўтказилган ...
9 май 2017
Болалигимизда Дўстжон дадамнинг Улуғ Ватан уруши иштирокчиси эканлигидан фахрланардик. Ҳар 9 май байрами арафасида дадамни ...
8 май 2017
3 май – Жаҳон матбуот эркинлиги кунига бағишлаб “Олтин қалам” мукофотларини топшириш маросими журналистлар ва ...