Асосий мавзулар
15 сентябр 2016

Қонунсизликни хаспўшлаш бошланди

Дунёнинг қатор оммавий ахборот воситалари, хусусан, ўзбек тилли мустақил нашрлар Ўзбекистон бош вазири Шавкат Мирзиёев «Конституцияга зид равишда ўзининг президент вазифасини бажарувчи этиб тайинланишига эришгани»га оид мақолалар чоп этаётган бир пайтда Ўзбекистон Миллий ахборот агентлиги – ЎзА мамлакат парламенти депутатларининг бу фикрни рад этувчи иддаоларини эълон қилди.

Хусусан, 11-12 сентябр куни ЎзА сайтига қўйилган мақолаларда Олий Мажлис Қонунчилик палатаси депутати А.Саидов ва Сенат девонининг юридик бўлими мудири ўринбосари А.Маҳмудов Ш.Мирзиёевнинг президент вазифасини бажарувчи этиб тайинланишини Конституция ва бошқа қонуний ҳужжатлар асосида оқлаб беришга уринади.

Улар бу тайинлов «Ислом Каримов юритган сиёсатнинг бардавомлигини таъминлаш» мақсадида амалга оширилганини ҳам таъкидлайди.

Мақолалар муаллифлари ўз фикрини мустаҳкамлаш учун АҚШ, Франция, Россия ва Чехия каби давлатлар тажрибасини ҳам тилга олади.

«Юқорида қайд этиб ўтилган хорижий мамлакатлар қонунчилиги таҳлили асосида амалдаги Президент ўз зиммасидаги вазифаларни бажара олмаган ва Парламент юқори палатаси раҳбари ушбу вазифаларини ўз зиммасига олишни рад қилган ҳолларда, ушбу вазифалар Ҳукумат раҳбари зиммасига юклатилиши энг илғор хорижий тажрибага ҳамда замонавий ва демократик тартиб-таомилларга мутлақо мос келишининг гувоҳи бўлишимиз мумкин», дейилади мақолалардан бирида.

Энг эътиборлиси, мақолалар муаллифларининг барчаси ўз фикрларини ҳуқуқшунос олим сифатида билдирганига урғу беради.

Депутат Раҳимжон Ҳакимов эса бош вазирнинг президент вазифасини бажарувчи этиб тайинланишини шубҳа остига олганларни тўғридан-тўғри қонунбузарликда айблайди.

«Айрим қўштирноқ ичидаги экспертларнинг турли Интернет саҳифаларида Олий Мажлис Қонунчилик палатаси ва Сенатининг жорий йил 8 сентябрдаги Ўзбекистон Республикаси Президентининг вазифа ва ваколатларини бажаришни Ўзбекистон Республикаси Бош вазири зиммасига вақтинча юклаш тўғрисидаги қарори қонунийлигини шубҳа остига олишга қаратилган уринишларни Бош Қомусимизнинг 16-моддасини қўпол равишда бузиш, дея баҳолашимиз мумкин», дейди депутат.

Яна бир эътиборли жиҳат шундаки, одатда ЎзА материаллари маҳаллий матбуотда биринчи даражада эътибор қаратиш лозим бўлган мақолалар ҳисобланади ва улар мажбурий равишда чоп этилади.

Аммо ЎзАнинг юқорида биз тилга олган материаллари маҳаллий босма нашрларда эълон қилинганига кўзимиз тушмади. Назаримизда бу материаллар маҳаллий ўқувчилар, кузатувчилар учун эмас, хориждагилар учун мўлжалланган. Маҳаллий аҳоли эса бош вазирнинг президентликни ноқонуний равишда эгаллаб олганини билмагани маъқул кўринади.

Дунё ОАВлари Каримов даврини мақтаяптими?

rasm1865
SPIEGEL Online Ўзбекистон ҳеч қачон демократик мамлакат бўла олмагани, бу давлат ғирром сайловлар, ҳар қандай мухолифатга нисбатан шафқатсиз қатағонлар ва қийноқларга асосланганини ёзди.

Куни-кеча eltuz.com нашрида Ислом Каримов вафоти муносабати билан немис ОАВларида эълон қилинган мақолалар таҳлили эълон қилинган эди.

Ундан сал олдинроқ эса «Халқ сўзи» газетаси (10.09.2016) «Жаҳон» ахборот агентлигининг «Чет эл оммавий ахборот воситалари Ўзбекистон қайғусига шерикдир» сарлавҳали мақоласини чоп этди.

Бу мақолада Франция, Испания, Италия, Жанубий Корея, Япония, Ҳиндистон, Осиёнинг бошқа қатор давлатлари оммавий ахборот воситаларида «замонавий Ўзбекистон тарихида Ислом Каримовнинг тутган ўрни, мамлакатимизнинг суверен, демократик ва гуллаб-яшнаётган давлат сифатида шаклланишида буюк йўлбошчимизнинг беқиёс ҳиссаси хусусида ҳам атрофлича фикр юритилаётгани» айтилади.

Хусусан, Германиянинг «Berlin City Report» газетаси «Ислом Каримов халқнинг кенг қўллаб-қувватлашига эришгани, 2015 йилги президент сайловида 90 фоиздан зиёд овоз тўплагани бу фикрни тасдиқлаши»ни ёзгани таъкидланади.

«Ислом Каримов раҳбарлиги даврида республика ривожланишнинг муваффақиятли йўлини босиб ўтди», деб хулоса қилибди бу газета журналисти.

Сайтимизда немис ОАВларида бу мавзуда эълон қилинган мақолаларда уларнинг аксарияти И.Каримовни автократ, шафқатсиз диктатор сифатида тилга олгани билдирилганди.

Хусусан, И.Каримов ўз халқига нисбатан қатағон сиёсатини юритгани таъкидланиб, бунинг исботи сифатида 2005 йилги Андижон воқеаларига ишора қилингани айтилганди.

Шундай экан, гарчи Ўзбекистон матбуоти дунё ОАВлари Ислом Каримов шахсияти ҳақида мақтовли мақолалар эълон қилгани айтилаётган бўлса-да, немис матбуотининг юқорида биз тилга олган шарҳи уларга эҳтиёткорона муносабатда бўлиш талаб этилишини кўрсатади.

Зеро, бу матбуот биринчи марта ёлғон тарқатаётгани йўқ. Тил билганлар бу мақолаларнинг аслияти билан танишиб кўрса, ёмон бўлмасди.

Eltuz.com

Тағин ўқинг
30 ноябр 2016
Наманган шаҳридаги бюджет идоралари ва мактаб ходимларига Артел дўконларида сотилаëтган лампочкалардан камида икки донадан сотиб олишга мажбур этилаётгани ҳақида ...
17 июн 2020
Менга берилган қамоқ жазосининг тугашига саноқли кунлар қолганида, яъни январь ойи ўрталарида ёнимга Антоненконинг чопари келди ва СПП Антоненко ...
26 феврал 2018
Ўзбекистон Республикаси Бош прокуратураси собиқ бош прокурор Рашиджон Қодиров ҳибсга олинганини расман тасдиқлади. 24 февраль куни прокуратура сайтида чоп ...
15 ноябр 2018
Ўзбекистонда баъзан «ютуб», баъзан «фейсбук» каналлари узилишидан шикоятлар ортмоқда. 15 ноябрь куни «Элтуз» нашри Downdetector сайти орқали «ютуб» каналидаги ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...