Асосий мавзулар
29 сентябр 2016

Парламент қарори қонунийлигига шубҳа билдириш «ахборот хуружи»га тенглаштирилди

«Ҳуррият» газетаси (28.09) яна ахборот хуружи мавзусига эътибор қаратди. Бу сафар эркин кузатувчилар ва мустақил нашрларнинг амалдаги бош вазир Шавкат Мирзиёевнинг президент вазифасини бажарувчи этиб тайинлангани қонунчиликка зид экани тўғрисидаги фикрларига эътироз билдирилди.

«Давлатимизга нисбатан таъсир ўтказишни режа қилган кучларнинг малайлари бўлмиш айрим ахборот воситалари, «журналистлар», «ҳуқуқ ҳимоячилари» парламентимиз 8 сентябрда қабул қилган президент вазифасини юклаш ҳақидаги қарорига нисбатан ахборот хуружи ташкил қилишди», дея иддао қилди газета.

Мақолада «совуқ уруш» даврида фаол ахборот ва психологик уруш олиб бориш учун бир қатор ОАВлар ташкил этилгани айтилади ва бу ОАВлар қаторида «Озодлик», «Америка овози», «Немис тўлқини», ББС каби радиостанциялар номи санаб ўтилади.

Шу билан бирга, «Озодлик» радиоси АҚШ Давлат департаменти ва Марказий разведка бошқармаси томонидан молиялаштирилгани, айни пайтда бир қатор давлатларда, хусусан, Беларус, Эрон, Тожикистон, Туркманистонда бу радио эшиттиришлари тақиқлангани таъкидланади.

Аммо шу ўринда бу радиони тақиқлаган давлатларнинг деярли барчаси нодемократик ва авторитар мамлакатлар сифатида тилга олинишига тўхталиб ўтирилмайди.

«Таҳлиллар шуни кўрсатадики, яқин ва узоқ давлатларда содир этилган давлат тўнтаришлари («рангли инқилоблар», «араб баҳори») манфаатдор кучлар томонидан ғаразли мақсадга йўналтирилган тарзда аҳолига нисбатан амалга оширилган ахборот таъсирининг оқибатидир», дейилади газетада.

Муаллиф «қичийдиган жойини аввалдан қашиб қўяди», яъни бўлажак президент сайлови натижалари бўйича «турли шубҳа, «миш-мишлар»ни тарқатиш, сайлов жараёнининг қонуний, демократик тарзда ўтганини шубҳа остига олиш кучайиши»ни башорат қилади.

«Башарти шундай бўлса, бу ҳақиқий халқ танлови амалга ошганидан, ахборот хуружи ташкилотчилари хоҳлаган нарса рўй бермаганидан далолат беради», дейди муаллиф.

У «ахборот хавфсизлигини таъминлашга қаратилган алоҳида қонун ҳужжати қабул қилиш масаласи кўриб чиқилиши керак»лигини шарт қилиб қўяр экан, ахборот хуружларига қарши курашда эътибор қаратиш муҳим бўлган бешта жиҳатга ҳам эътибор қаратади.

Хусусан, муаллиф «мамлакатимиз, давлат аппарати, раҳбарлар ҳақида нотўғри маълумотлар, туҳмат, уйдирмалар, нотўғри ахборот тарқатувчи ҳар қандай ахборот воситалари фаолиятига қонун доирасида чек қўйиш» таклифини илгари суради.

У «аҳолига чет элларга туриб мамлакатимиз тўғрисида нотўғри, бир тарафлама ахборот тарқатувчи ахборот воситалари, шахсларнинг асл қиёфасини очиб берувчи ахборотни етказиш»ни ҳам таклиф этади.

Аввало, мақола «парламент қарорига қарши ахборот хуружи» ҳақида бўлса-да, унинг «ташкилотчилари» бу ҳужжатнинг қайси жиҳатларига эътироз билдирилаётгани тўғрисида бир оғиз ҳам айтилмаган.

Қолаверса, биз иқтибос келтирган икки таклиф ҳам янгилик эмас. Ўзбекистондаги жараёнлар, мамлакат раҳбарияти ҳақида муқобил фикр билдирадиган интернет нашрларига чеклов қўйилганига кўп йиллар бўлди.

Бундай фикр билдирадиган ОАВлар, шахсларнинг «асл қиёфасини очиб бериш» эса маҳаллий телевидение ва нашрларда васваса даражасига олиб чиқилган, дейиш мумкин.

Eltuz.com

Тағин ўқинг
17 июн 2020
Менга берилган қамоқ жазосининг тугашига саноқли кунлар қолганида, яъни январь ойи ўрталарида ёнимга Антоненконинг чопари келди ва СПП Антоненко ...
5 август 2019
Ҳайдовчиларни қайта тайёрлаш ва бу ҳақда сертификат бериш тизимини тўлалигича монополия қилиб олган “Avtotest Report” МЧЖнинг кутилмаганда “ўйиндан чиқиши”ни ...
13 октябр 2015
Мана, денгиз тубидаги майда тошларни ҳам кўра оладиган ғаввослар пахтага чиқди.  Улар ҳам футболчи, киночи, имом ва фоҳишалар ортида ...
11 апрел 2017
Март ойининг охирларида рус тилида чиқадиган Uzmetronom сайти «ишончлик манбалари»дан иқтибос қилиб, Ўзбекистон электрон оммавий ахборот воситалари миллий ассосиацияси ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...