Блоглар
17 январ 2017

Далаларда танклар пахта теради

Ўзбекистонда Ватан ҳимоячилари куни байрами халқ орасида тантана қилинмаган бўлса-да, расмий доиралар томонидан анча дабдабали кутиб олинди. Мамлакат нашрларда ана шу юзаки дабдабаларнинг инъикосини кўриш мумкин бўлди.

Янги йил мавзуси эскириши билан барча нашрлар бутун диққат-эътиборини Ватан ҳимоячилари мавзусига қаратди. Уларда «қудратли ва шавкатли» армиямиз ҳақида бири-биридан нуқс олган мақолалар чоп этилди.

Аммо мамлакат президентининг байрам табригини ҳижжалаб ўқиб, сал мулоҳаза қилинса, аслида армиямиз унчалик ҳам мақтанадиган даражада эмаслиги, ҳал этилиши керак бўлган масалалар жуда кўплиги аниқ кўринади.

Аввало, президентнинг бу галги табриги аввалги йиллардагидан кўра ҳажман анча йирик, залворли ва айтиш мумкинки, дастурий бўлгани эътиборлидир. Бу табрик орқали давлат раҳбари армия тараққиётининг янги йўналишларини белгилаб берди, дейиш мумкин.

Эътиборни тортадиган биринчи жиҳат шуки, президент миллий хавфсизлик соҳаси қонун талаблари асосида бошқарилмаётганини билвосита тан олган ва буни «…ўта муҳим соҳани қонун талаблари асосида бошқариш самарадорлигини ошириш устувор вазифаларимиз қаторига киради», деб юмшоқроқ ифодалаган.

Албатта, бу ўринда гап Миллий хавфсизлик хизмати, Ички ишлар вазирлиги манзили томон ҳам йўналганини англаш қийин эмас. Зеро, сўнгги вақтларда бу идораларнинг ўзини қонундан устун қўйиб, жиғилдонни Ватан манфаати билан адаштириб қўяётганини ўз тақдирида тинимсиз синовдан ўтказиб келаётир.

Давлат раҳбари оғиз кўпиртириб мақталган миллий армиямизни замонавий қурол-яроғ ва ҳарбий техника билан таъминлаш ҳам кўнгилдагидек эмаслигини айтган. Бу борада 2017-2021 йилларга мўлжалланган комплекс дастур ишлаб чиқиш биринчи галдаги вазифа этиб белгилангани бунинг исботи сифатида кўринади.

Табрикда Қуролли кучлар академиясини янгидан ташкил этиш ташаббуси илгари сурилгани қўшинлар учун қўмондонлар тайёрлаш сифати талабга жавоб бермаслигига ишорадир.

Президент қўшинларни тайёрлаш борасидаги тадбирларни режалаштиришга янгича ёндашувни ишлаб чиқиш аҳамиятга эгалигини ҳам билдирган.

Албатта, ҳар йили кузда минглаб аскарлар пахта йиғим-теримига жалб этиладиган мамлакатда қўшинлар тайёргарлиги масаласи долзарб эканлигини сир тутиб бўлмайди.

Балки бу ёндашув аскарлардан бевосита белгиланган мақсадлар йўлида (по назначению дейди ўрислар) фойдаланишни назарда тутар?!

Далаларда танклар пахта теради, дея ёзганди тинчликни куйлаган шоир бир вақтлар. Афсуски, ҳақиқатан ҳам танклар, тўғрироғи, аскарлар пахта терадиган даврда яшаяпмиз.

Тинчлик замони бўлгани учун эмас, ҳамма ўз ишини қилмай, фуқаролар кимларнингдир манфаати йўлида бошқа ишларга жалб этилаётгани учун шундай бўляпти.

Президентнинг дастурий каби кўринадиган табригида айтилган сўзлар қўшинларнинг ишончли ватан ҳимоячилари бўлишига қаратилган, деган некбин мулоҳазаларга чорлаётгандек…

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
5 октябр 2017
Президент Мирзиёев 30 сентябр куни Мактабгача таълим вазирлигини тузиш ҳақидаги фармонни имзолади. Фармонда, мамлакат бўйлаб боғчалар сонини кўпайтириш, мактабгача ...
2 март 2016
Бугун, мен учун ва мен мансуб бўлган миллат учун азиз инсоннинг туғилган куни. Совет Иттифоқининг илк ва сўнгги президенти ...
20 июн 2018
Ўзбек расмийлари 16 июнь куни хибсга олинган АҚШ ватандоши Зокир Алиев Афғонистонда ҳарбий тайëргарликдан ўтиб, ҳукумат ва халқаро коалиция ...
11 апрел 2018
«From Me to You» (Мендан сенга) — Леннон ва Маккартни дуэти ижро қилган зариф бир қўшиқдир. Айтилишича, бу қўшиқ ...
Блоглар
22 октябр 2018
Яқин кунларда Ўзбекистонда қимматчилик бошланиши ҳақида аҳоли ўртасида шу кунларда анча кенг тарқалган хавотирнинг асоссиз ...
19 октябр 2018
Муҳаммад Бекжон эсдаликларидан иборат биринчи китобнинг сўнгги қисми 1999 йил 16 февраль портлашлари ёритилган мақолаларга ...
19 октябр 2018
Россиянинг Ўзбекистонда АЭС қуриш ғояси ўзбек жамоатчилигининг жиддий хавотирларига сабаб бўлмоқда. «Элтуз» нашри «Кўзқараш» рукни ...