Асосий мавзулар
26 феврал 2018

Каламушларни ушланг!

Каламушлар кема чўкаётгани учун эмас, балки уларга қарши курашишга бел боғлагани учун қочиш ҳаракатига тушиб қолди.

Бир неча кун олдин Ўзбекистоннинг собиқ бош прокурори Рашид Қодиров ҳибсга олингани ҳақида хабарлар тарқатилган ва бу хабарлар зўр бериб инкор этилаётган пайтда бир нашрнинг у мамлакатни тарк этиш чоғида ортига қайтарилгани ҳақидаги маълумоти кўпчиликнинг назаридан четда қолганди.

Ўша хабарга ишонилса, 22 февраль куни хорижга чиқиб кетишга отланган Рашид Қодиров Тошкент халқаро аэропортида чегара хизмати томонидан тўхтатиб қолинган. Унинг ўғли Алишер Қодиров аллақачон Ўзбекистондан қочиб улгурган.

Ниҳоят, Бош прокуратура вазиятга ойдинлик киритди ва Р.Қодиров ҳибсга олиниб, Жиноят кодексининг «товламачилик» (165-модда), «ҳокимият ёки мансаб ваколатини суиистеъмол қилиш» (205-модда) ва «пора олиш» (210-модда) моддалари бўйича айбланаётганини маълум қилди.

Шу ўринда собиқ бош прокурорнинг ўғли Алишер Қодиров ҳақида қисқача маълумот бериш ўринли кўринади.

ОАВда тарқатилган маълумотларга кўра, А.Қодиров «Консул» хусусий адвокатлик идораси, консалтинг фирмалари, Bang&Olufsen, Choppard, Svarovski ва Montblanc каби люкс тоифадаги дўконлар хўжайинидир. Унинг адвокатлик идораси орқали прокуратура билан боғлиқ масалаларни «ҳал қилиш» нархи 250 минг доллардан 20 миллион долларгача бўлган.

Яъни бой тадбиркорлар учун аввалига прокуратура орқали «муаммо яратилган», Рашид Қодировнинг ўғли уларга қудратли отаси соясида «холисона хизмат кўрсатган».

Мазкур маълумотларни келтиришимизга сабаб шуки, Ўзбекистон бойлигини чорак асрдан кўпроқ вақт давомида талон-тарож қилганлар бу мулкларни ўз номига эмас, анъанага кўра, энг яқин инсонлари, оила аъзолари ёки уларга бўйсунувчи кимсалар номига ўтказиб қўйган.

МХХнинг собиқ раҳбари Рустам Иноятов қудрати «соя»сида орттирилган бойликлар унинг яқинлари номига дунёнинг турли давлатларида сақланаётганига оид маълумотлар ҳақида яқинда «Элтуз» нашри эълон қилган маълумотлар ҳам сўзимизни исботлаб турибди.

Яқин ўтмишимизда халқнинг қонини сўриб, улкан бойлик орттирган амалдорларнинг бир қанчаси ҳозирча юртни тарк этиб улгургани йўқ.

Рашид Қодировнинг қамалиши эса уларнинг келажаги анча қоронғу эканига аниқ ишора бераётир. Унинг ўғли аллақачон юртдан чиқиб кетгани эса катта каламушларнинг четга чиқишига қандайдир тўсиқ қўйилган бўлса-да, каламушзодаларнинг ҳали қочиш имконияти борлигини кўрсатиб турибди.

Бу маълумотлар яқинда Шавкат Мирзиёевнинг кўча жаргонида «ичкарига олинган» деб айтилаётган МХХ амалдорлари «булбулдек сайраётгани» ҳақидаги гаплари ортидан юзага чиқяпти.

Демак, МХХ ёки Бош прокуратура ҳимоясида халқ бойлигини талон-тарож қилганлар ҳақида кўплаб маълумотлар тез орада юзага чиқади.

Айни шу хавфни ҳис қилаётган каламушлар бугун кемадан қочиш ҳаракатига тушиб қолганини ишонч билан айтишга асос бор.
Эндиги вазифа уларнинг қочиб кетишига йўл қўймасликдир. Улар ватан олдида, халқ олдида жавоб бериши керак.

Биз улар деяётган одамларимизнинг номлари эса кўпчиликка маълум. Каримов даврида ўзи хон, кўланкаси майдон бўлиб, халқимизнинг қонини ичганлар, юртимиз бойлигини ташмалаганлар ўз қилмишларига яраша жавоб бериши адолатли жамият қуриш йўлидаги муҳим қадам бўлиши лозим.

Уларнинг жавобгарликка тортилиши эса халқнинг ҳукуматга нисбатан ишончини ошириш билан бирга бугун мансаб курсисига ўтирган амалдорлар учун ҳам сабоқ бўлади.

Сардор Азим
Eltuz.com

Тағин ўқинг
25 сентябр 2017
25 сентябр куни «Элтуз» мухбирининг Андижондан хабар беришига кўра, ўқитувчиларнинг теримдан қайтарилиши ортидан пахта учун пул йиғиб олинмоқда. Андижон ...
15 феврал 2017
«Жамият» газетаси (10.02) нодавлат нотижорат ташкилотлар фаолиятининг «сирли қирралари» ҳақида мақола эълон қилди. Унда ёзилишича, «дунёда ўз манфаатини бошқаларникидан ...
29 октябр 2015
Eltuz манбасидан олинган хабарга кўра, 28 октябр куни Қашқадарё вилоятининг Қамаши туманида ички ишлар ходимлари Шуҳрат Рустамовни ушлаб олиб ...
22 май 2016
Ўзбекистон президентининг кенжа қизи Лола Каримова хизматларининг Испания ҳайрия жамғармаси томонидан юксак тақдирланиши Жамғарманинг Ўзбекистондаги реал вазиятдан мутлақо бехабар ...
Блоглар
24 сентябр 2018
Сўнгги кунларда Ўзбекистондаги пахта йиғим-терим мавсумига оид турли ОАВларда эълон қилинаётган хабарлар мамлакатда мажбурий меҳнат ...
21 сентябр 2018
Алишер Навоий номидаги Ўзбекистон миллий кутубхонаси маъмурияти Рауф Парфининг 25 сентябрга мўлжалланган юбилейини тўхтатиш ортидан ...
19 сентябр 2018
Жорий йилнинг ўтган саккиз ойида Ўзбекистоннинг ташқи савдоайланмасида импорт суръатининг ўсиши экспортникидан қарийб етти баробардан ...