Асосий мавзулар
22 май 2018

Андижонда ҳатто мактаб ўқувчилари ҳам “қимор” ўйнамоқда

Кейинги пайтда “Борига барака” капитал шоуси одамлар хаёлини ўргимчак тўридек ўзига қамраб олди. 7 ёшдан 70 ёшгача ҳамма “Борига барака” кўрсатувида иштирок этиб, катта миқдордаги ютуқ соҳибига айланишни хоҳлаб қолган. Уламолар бу кўрсатувни расмий қимор деб аташмоқда.

Кимдир телефонидаги “Клик” ҳаволаси орқали 5 минг сўм пул ўтказиб, кўрсатув иштирокчисига айланса, кимдир капитал шоу ҳомийси бўлган “Атлас” кўнгилочар мажмуига бориб, керакли анкетани тўлдиради. Тасодифий танланган телефон рақам эгаси “Борига барака” капитал шоусига таклиф қилинади.

“Мен телефондаги “Клик” орқали 3 марта 5 000 сўмдан пул ўтказдим. Шоуни ҳар хафта кутаман. Ўша пайтда ана энди менинг телефон рақамим терилади, дея умид қиламан”, дейди шоу ишқибозларидан бири.

У омади келиб, кўрсатувга чақириб қолишсаю, машинами ёки 2 хонали квартирами ютиб олишни орзу қилаётганини яширмайди.

“Менга уй жиҳозлари ҳам бўлаверади. Янги уйга кўчиб ўтганман. Уйни маиший жиҳозлар билан тўлдириш керак. Шунинг учун “Борига барака”га илиниб қолишга ҳаракат қиляпман”, дейди яна бир мухлис..

Кўрсатувда иштирокчи тескари ўгирилган ютуқлар рўйхатини компьютерга уланган тугмача орқали босиб, бир-бир рўйхатдан чиқариб юборади. Рўйхатда охири қолган ютуқ иштирокчига насиб этади.

Шу кунгача “Борига барака” капитал шоуси орқали иштирокчилар “Кобальт” автомобили, телевизор, музлатгич, кир ювиш машинаси каби маиший буюмлар соҳибига айландилар.

Айрим иштирокчилар шоуда қатнашиш учун ҳеч қандай пул тикмаганлар, анкета тўлдирганлар, холос. Аммо кўпчилик кўрсатув соҳибига айланиш учун ҳар ҳафта 5 минг сўмдан пул ўтказиб, анча-мунча маблағини совуриб ҳам бўлишди.

“Борига барака” кўрсатувида автомобиль ютган фуқаро айнан андижонлик экани ва унинг шаҳар кўчалари бўйлаб ютуққа чиққан “Кобальт” автомобилида айланиб юргани аҳолининг шоуга оммавий қизиқишига туртки бўлди.

77 ёшли кекса онахон Х.Азимова невараси унинг пенсия пулидан икки-уч марта шоу ўтказиладиган “ЗўрТВ” телеканали ҳисобрақамига пул ўтказганини таъкидлайди.
Онахоннинг айтишича, мабодо шоуда иштирок этмаган тақдирда ҳам 5 минг сўм пул ҳеч қанча маблағ эмас, у набиралари учун омадини синаб кўрмоқчи.

Мактабларда эса ўқувчилар орасида аллақачон капитал шоуга тақлид кучайиб кетган. Ютуққа қўйилган совринлар ҳам камтаргина: ширинликлар, салқин ичимликлар, ўқув қуроллари, майда сувенирлар, фаст-фуд таомлар, пул ютуғи ва ҳоказо…

“Синфимдаги бир ўқувчимдан болаларнинг дарсдан сўнг йиғилишиб, лотереяга ўхшаш ўйин ўйнашаётгани ҳақида эшитиб қолдим.Секин пойласам, орқа ҳовлида ўғил болалар “Борига барака” ўйнашяпти. Ўйин ташкилотчиси синфдаги ҳаммадан 2 минг сўмдан пул йиғибди. Бугун кичикроқ пул тикиб бошланган ўйин эртага катта қиморга айланмайди, деб ким кафолат бера олади”, дейди Андижон шаҳридаги мактаблардан бирида ишловчи муаллима.

Яқинда Кun.uz сайти “Борига барака” капитал шоуси юзасидан ислом уламоларининг фикрини эълон қилди. “Зикр аҳлидан сўранг” ҳайъати ушбу саволга қуйидаги тартибда жавоб берган:

“Икки ёки ундан кўп томон пул тикиб, оқибатда бирининг фойдасига бўладиган ҳар бир ҳолат қимордир. Агар шу қоидага тушса, жоиз эмас. Турли ўйинлардаги ютқазган пулини тўлаш ҳам қимордир”.

Бундан келиб чиқадики, Ўзбекистонда аёлу эркак “қимор” ўйнамоқда. Гарчи айримлар бу расмий қимор ўйинда иштирок этиш учун ҳеч қандай маблағ сарфламаганини таъкидлаётган бўлса-да, ютуққа қўйилган совринлар одамлардан йиғилган маблағлар ҳисобига шакллантирилган.

“ЗўрТВ” телеканалида ишловчи ходимнинг “Элтуз”га билдиришича, ҳафтадан ҳафтагача шоу ҳисоб рақамига 2 млрд сўм атрофида маблағ тушмоқда. Аммо ҳозирча бу маълумот расмий тасдиғини топганича йўқ.

Eltuz.com

Тағин ўқинг
25 ноябр 2017
Андижон шаҳри ҳокими Дилмурод Раҳматуллаев 20 ноябрь куни таълим тизими ходимлари билан ўтказган мажлисида ўқитувчиларга «ойлик беришнинг янги шарти»ни ...
16 январ 2018
Чимкентлик тўй эгаси буюртирган қимматбаҳо торт видеоси ижтимоий тармоқни ҳайратга солди. Унинг нархи 179 минг АҚШ долларига баҳоланган. Дастлаб ...
15 декабр 2016
Ўзбек фаоллари бу пулларни коррупция жабрдийдалари бўлган Ўзбекистон халқига қайтарилишини исташмоқда. Электрон петицияни шу ерда имзолашингиз мумкин. Ўзбекистон телекоммуникация ...
12 май 2016
Ўтган жума куни Истанбулда ўз дўстининг туғилган кунини нишонлаш учун кунлик уй киралаган 19 яшар турк қизи ўша уйда ...
Блоглар
22 октябр 2018
Яқин кунларда Ўзбекистонда қимматчилик бошланиши ҳақида аҳоли ўртасида шу кунларда анча кенг тарқалган хавотирнинг асоссиз ...
19 октябр 2018
Муҳаммад Бекжон эсдаликларидан иборат биринчи китобнинг сўнгги қисми 1999 йил 16 февраль портлашлари ёритилган мақолаларга ...
19 октябр 2018
Россиянинг Ўзбекистонда АЭС қуриш ғояси ўзбек жамоатчилигининг жиддий хавотирларига сабаб бўлмоқда. «Элтуз» нашри «Кўзқараш» рукни ...