Асосий мавзулар
19 июн 2017

Президент ишора берди: диний маҳкумлар озодликка чиқадими?

Ўзбекистон президенти Шавкат Мирзиёев яқинда Тошкентда дин арбоблари, жамоат ва давлат идоралари вакиллари билан ўтказилган учрашувда мамлакат учун жуда муҳим бўлган бир масалага тўхталди.

Лекин негадир на мустақил нашрлар, на шу масала ҳақида ўнлаб йиллардан буён гапириб келаётган инсон ҳуқуқлари фаоллари бунга жиддий эътибор қаратмади. Ҳар ҳолда шу кунгача бу ҳақда ўқимадик.

Гарчи видеоселектор шаклида ўтган мазкур тадбир ҳақида кўп гапирилди. Аммо Мирзиёевнинг дипломатларга хос тарзда айтган гаплари қанчалик муҳим бўлмасин, эътибордан четда қолди, деб дейишга тўла асосимиз бор.

Гап шундаки, президент диний айбловлар билан қамалганларнинг бир қисмини озодликка чиқаришга тайёр эканига ишора берди!

«Адашган ёшларни тарбиялашимиз, керак бўлса, жазони ўташ жойларига ҳам бориб, улар билан гаплашишимиз лозим. Чин дилдан тавба қилиб, ота-онаси, оиласи бағрига, тўғри йўлга қайтишни ният қилган одамларга амалий ёрдам беришга мен давлат раҳбари сифатида доимо тайёрман», деди президент Мирзиёев.

Бу жуда муҳим ишора эмасми? Ахир у ерда гап Ўзбекистон қамохоналарида ётган минг-минглаб диний маҳкумлар тақдири ҳақида боряпти-ку?!

Гап айнан улар ҳақида бораётганини президентнинг: «Агар у эътиқодсиз бўлиб, чаласавод бўлиб, хиёнат қилиб, боя айтганимдек, икки томон билан ҳам “ўйин” қиламан, бу давлат кетса, анавилар келиб қолса, улар билан ҳам тил топишаман, деб найранг қиладиган бўлса, билиб қўйинглар, бундай “номер”лар бизга ўтмайди«, деган сўзлари ҳам тасдиқлаб турибди.

Яъни президент тавба қилганидан сўнг озодликка чиқарилажак маҳкумларни огоҳлантиряпти!

Бундан ташқари, у Ўзбекистонда давлатнинг давлат сифатидаги ролини таъминлашга, керак бўлса, радикал диндорларнинг танобини тортиб қўйишга, бунинг учун қаттиққўл сиёсат юритишга тайёрлигини ҳам билдирди.

«Ўзбекистонда давлат давлатчилигини қилади, қонун устувор бўлади. Худога шукур, давлат раҳбари сифатида буни таъминлашга менинг кучим ҳам, билимим ва салоҳиятим ҳам албатта етади. Бу ҳақиқатни ҳеч ким, ҳеч қачон эсидан чиқармасин!» деди Мирзиёев.

Шу билан бирга, президент «ашаддий террорчи ва экстремистлар»ни аяб ўтирмаслигини баён этди. Чунки «уларга гап уқтириб, инсофга чақиришнинг ҳеч қандай фойдаси йўқ», деган қарорга келганини билдирди.

Шавкат Мирзиёев уларга қарши шафқатсиз курашиш борасида дунёнинг зўрлари, хусусан, АҚШ президент Дональд Трамп билан фикри бир жойдан чиқаётганини қистириб ўтганида катта маъно бор.

У бундай курашиш учун ана шу зўрлардан «добро» олганига ишора қилмоқда.

Албатта, президентнинг нутқида арзимаган сабаблар, туҳматлар билан қамоққа тиқилган диний маҳкумларни оқлаш ёки уларни тўлиқ реабилитация қилиш ҳақида гап бормаяпти.

Улар барибир айбдор ҳисобланиб қолаверади. Зеро, гап тавба қилганлар ҳақида бормоқда.

Аммо мана шу қадамнинг ўзиёқ некбин кайфиятлар уйғотишга асос бўла олади назаримизда. Биринчи қадам ҳар доим оғир бўлади.

Балки бу кейинроқ айбсиз қамалганларни реабилитация қилиш йўлида пойдевор бўлиб хизмат қилар?!

Ҳуқуқ ҳимоячилари ҳисобига кўра, Ўзбекистонда, ҳукумат томонидан «диний экстремистик ташкилотларга аъзоликда айбланган»  10 минг нафар атрофидаги маҳкумлар бор. Уларинг аксарият кўпчилиги ҳеч қандай зўровонлик ҳаракати содир этишмаган, бироқ номутаносиб тарзда узоқ муддатли жазолар олишган. Халқаро ташкилотлар Ўзбекистон ҳукуматини, «давлат ташкилотлари доирасидан ташқарида» исломни ўрганаётган одамларга нисбатан ортиқча шафқатсизлик қилаётганини қоралаб келади.

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
31 октябр 2015
Ўтган йили шу пайтларда украиналик қочқинлар кўп эди. Ҳужжат ишларим сабаб тегишли ташкилотларга бориб тураман. Кўп йиллардан буён қатнайвергач ...
1 феврал 2016
Режиссер Саид Мухторов, “Хиёнат гирдоби” фильми туфайли анча обрў топди, матбуот назарига тушди. Чунки, фильм триллер жанрида бўлиб, ўзбек ...
13 июл 2018
Наманган муҳандислик технология институтининг собиқ домласи, талабалари томонидан калтакланганини айтаётган Сирожиддин Ашуров жиноятчилар тегишли жазони олишида президентдан нажот кутмоқда. ...
27 ноябр 2017
Бош прокуратура ҳузуридаги департамент «Шаршара» савдо белгиси остидаги колбасалар эшак гўшти қўшилган ҳолда савдога чиқарилишининг олдини олганини маълум қилди. ...
Блоглар
3 август 2018
Бир пайтлар нефтбазадан бензин, солярка олиб чиқиб сотар эдик. Яширинча олиб чиқар эдик, ишчиларига пул ...
2 август 2018
Муҳаммад Бекжоннинг «Алвидо, Жаслиқ!» китобидан навбатдаги қисм 1999 йилги Тошкент портлашларининг асосий гувоҳи Зайниддин Асқаров ...
1 август 2018
«Талқончи» нон ушатишда давом этади… Ўзбек маҳбуслари учун чақимчи камерадош билан яшаш қандай ёқимсиз… Собиқ ...