Cатира
25 январ 2018

Шу ҳоким ҳам одамми?

Ҳали Ўзбекистон аҳли қалбида Оқтўбада ҳалок бўлган 52 нафар юртдошимизнинг мотами оғриғи сусаймай туриб, марҳумлар шаънини ҳақорат қилган Фарғона вилояти ҳокимини тўғрисида гап кетганда шундай саволни ўртага ташлаш адолатсизлик бўлмаса керак.

Бутун интернет бўйлаб тарқалиб кетган бу ҳақоратларнинг ҳаммасига тўхталиб ўтиш шарт эмас. Аммо шундай жиҳатлари борки, айтсанг тилинг, айтмасанг дилинг куяди.

Аввало, ҳокимнинг вилоят миқёсида бўлиб ўтган видеоселекторда айтган гаплари давлат раҳбариятининг мазкур фожеа муносабати билан кўрган ва кўраётган чора-тадбирларига жуда улкан соя бўлиб тушди.

Энди бутун халқ ҳукуматнинг бу чора-тадбирларини миннат ўрнида қабул қилмаслигига ким кафолат беради?

Азадор оилаларга берилган бор-йўғи 80 миллион сўм (тошлоқлик ҳар бир марҳумга минг доллардан ҳам тўғри келмайди) ҳомийлик ёрдамини бутун бошли вилоят ҳокими миннат қилиб турганидан кейин яна нима деб ўйлаш мумкин?!

Яна «таъна қилаётганим йўқ», деяётганига ўласизми. Таъна, миннат бўлмаса, нима бу гаплар?!

Яхшиям чўнтагидан бермаган. Акс ҳолда қолган халқни ҳам ўлмаганига пушаймон едириб, терисини тириклайин шилиб олармиди бу ҳоким.

Бошқа томондан, «ҳоким менинг одамим» деб уларнинг нуфузини кўтаришга ҳаракат қилаётган президентнинг ишончига берилган зарба эмасми бу?

Ҳоким тириклайин оловда ёнган 16 нафар тошлоқликка эмас, улар ўлгани учун «айбдор қилиниши» эҳтимолидан фол очиб, «бечора участка нозири»га ачиняпти.

«Ёзса ёзаверсин», деяпти ҳоким матбуотдан, жамоатчиликнинг фикридан қўрқмаслигини билдириб.

Бу гаплари билан шунчалик оғзи шалоқлигига қарамай, яна уни шу пайтгача мансабида ушлаб турган президентга орқа қиляптими?

Аслида давлат раҳбарининг орқасига урилган ханжар эмасми бу?

Ҳокимнинг ҳақоратларини эшитиб, бир вақтлар Андижон воқеалари ҳақида гапирган ëзувчи Хуршид Дўстмуҳаммад исён қатнашчиларини «шўрванинг кир кўпиклари», дея атагани ёдга тушади.

Ҳар ҳолда Хуршид Дўстмуҳаммад депутат ëзувчи эди. Халқимиз бу «эркалик»ни уни севгани учун кўтара оларди.

Лекин иш қидириб, рўзғор ташвишида ўзга юртларга отланган чоғида тириклайин ёниб кетган ҳамюртларига ҳатто ўлимидан кейин ҳам бир оғиз яхши сўзини раво кўрмаган валломатнинг ҳақоратларини халқимиз кечирармикин?

Қолаверса, азадор халқнинг ярасига туз сепган бу ҳокимнинг ўз мансабида қолиш-қолмаслик масаласи халқ давлатга эмас, давлат халққа хизмат қилиши кераклигини айтаётган давлат раҳбари учун ҳам бир имтиҳон кабидир.

Сардор Азим
Eltuz.com

Тағин ўқинг
4 март 2016
Ўтган февраль ойида ҳам Ўзбекистон телеканаллари “эски ашулалари”ни баралла куйлашдан чарчамади. Яъни телеканалларнинг бош мавзулари яна ўша “маънавиятни юксалтириш”, ...
29 апрел 2021
(Шоир ва сиёсатчи Муҳаммад Солиҳнинг “Императив” китобининг давоми. Матннинг аудиоверсиясини муаллифнинг ўзи ўқиган. Боши “Элтуз”нинг “Императив” рукнида. Давоми бор.) ...
19 август 2020
Беларусдаги норозилик намойишлари ўн биринчи кун давом этмоқда. Намойишчилар иқтидордаги президент Александр Лукашенко сайловларда ютқазди, дея ҳисоблашмоқда ва тинч ...
22 декабр 2017
Марҳум президентнинг жияни Жамшид Каримов ҳақида тасвирлар олаётган журналист Улуғбек Ашур 22 декабрь куни фильм трейлерини тақдим этди. У ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...