Cатира
28 май 2018

Тадбиркорларга берилаётган кредит коррупционерлардан ундирилмоқдами?

Андижон вилоятида тадбиркорликни ривожлантириш мақсадида шу кунларда жисмоний ва юридик шахсларга ажратилаётган уч фоизлик кредитнинг манбаи коррупционерлардан мусодара қилинаётган маблағлар бўлиши эҳтимоли бор.

Ҳозирги кунда халқ орасида фақат Андижон вилояти учун “Ҳар бир оила – тадбиркор” шиори остида берилаётган бу арзон кредитлар ҳақида тарқалган гаплар шундан дарак беради.

Маълумотларга кўра, Шавкат Мирзиëевнинг Андижонга қилган сўнгги сафаридан сўнг бошланган бу жараён давомида тадбиркорлик билан шуғулланиш учун жисмоний шахсларга 17 миллион сўмгача, юридик шахсларга 172 миллион сўмгача кредит таклиф қилинмоқда.

Банк ходимлари уйма-уй юриб, “Президент ҳисобидан”​ экани айтилаётган 3 фоизлик бу кредитлар 3 ойлик имтиëзли давр билан 3 йилга таклиф этяпти.

“Озодлик” радиоси Андижон вилояти учун ажратилган бу кредитнинг умумий миқдори бир триллион сўм деб ёзди. ЎзА хабарида эса бу миқдор 800 миллиард сўм кўрсатилган.

​Ҳар қандай ҳолатда ҳам бу жуда катта сумма ва Марказий банкнинг қайта молиялаш ставкаси 14 фоиз бўлиб турган бир вазиятда 3 фоизлик кредит берилиши турли миш-мишлар ва қарашларни келтириб чиқариши табиий.

Энг эътиборлиси, ҳатто бу кредитни тарқатишга масъуллар ҳам унинг манбаси ҳақида тасаввурга эмас. Зеро, агар улар банк ҳисобидан берилаётган бўлса, молиявий қонуниятларга суянилса, бу ҳар қандай банкнинг синишига олиб келишини англатади.

Шундай экан, 3 фоизлик кредитнинг манбаси коррупционерлардан қайтариб олинган пуллардир, деган гапларда ҳам асос бордек кўринади.

Сўнгги йилларда Ўзбекистонда коррупцияга оид жуда катта ва шов-шовли жараёнларга гувоҳ бўляпмиз.

Собиқ Миллий хавфсизлик хизматининг энг юқори бўғини амалдорлари бўлмиш ака-ука Шарифхўжаевлардан юзлаб миллион доллар мусодара қилингани ҳақида норасмий хабарлар ҳам тарқалган.

Бундан ташқари, МХХ раисининг биринчи ўринбосари Шуҳрат Ғуломовнинг қамалиши ортидан унга тегишли жуда катта маблағ давлат ҳисобига олиб қўйилгани тўғрисида ҳам норасмий маълумотлар бор.

Энг сўнгги маълумотнинг манбаси эса президент Шавкат Мирзиёевнинг ўзидир. У яқинда Андижонга ташрифи чоғида собиқ бош прокурор, айни пайтда ўзи ҳибсда, иши терговда бўлган Рашид Қодиров миллион-миллион долларни давлатга қайтараётгани, унинг ўғли эса миллиардер эканини билдирганди.

Банк тизимида ишловчи ходимлардан бири “Элтуз” билан суҳбатда Андижон учун ажратилган кредит манбаси тўғрисидаги гап-сўзларда жон борлигини билдирди.

“Чунки бундай шартларда кредит беришга Ўзбекистонда ҳеч қайси банкнинг кучи етмайди. Уларни синдириб қўяди бундай кредит. Қолаверса, банкларимизда ҳозир бунга етарлича резерв йўқ”, деди банк ходими.

  • Президентимиз жуда катта ислоҳотларга қўл уряпти,- дея қўшимча қилди у. – Шавкат Мирзиёев коррупционерлар халқдан тортиб олган пуллар яна халқнинг ўзига хизмат қилсин, деган эзгу ниятда шундай қарорга келган бўлиши мумкинлигига ҳам шубҳа қилмайман.

Ҳозирча “Элтуз” ихтиёрида арзон кредитларнинг асл манбаси тўғрисида аниқ маълумотлар йўқ. Расмийлар ҳам бу ҳақда халқни хабардор қилишга шошилмаяпти.

Баҳодир Шариф
Eltuz.com

Тағин ўқинг
22 апрел 2017
Россиялик мухолифатчи блогер Алексей Навальнийнинг фикрича, таги ўзбекистонлик бўлган миллиардер Алишер Усмонов турли йўллар билан пора берганини яширмоқчи. Апрел ...
18 декабр 2015
18 ноябр куни Жиззах вилоят ИИБ катта терговчиси Ориф Анарбоев Ўктамни 168 модда (фирибгарлик) ва 211 (пора олиш)да  айблаш ...
15 феврал 2024
Бухоро муҳандислик-технология институти ходими Ғолиб Шодиев айни истититут рахбариятини коррупция ва непотизмда айбламоқда. Бироқ унинг аризаси ва унда келтирилган фактлар юзасидан очилган жиноят ...
23 август 2017
Муҳаммад Солиҳ шоир ва сиёсатчи. 1949 йил 20 декабрда Хоразмнинг Урганч туманида дунёга келган. Тошкент Давлат Университетининг журналистика факультети ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...