Кундалик
19 июл 2016

Бухарбоеваларга ҳамдардлик

Бугун Ўзбекистоннинг таниқли ва жасур журналистлари бўлган Галима ва Багила Бухарбоеваларнинг оналари Манзура Бухарбоева вафот этгани ҳақида хабар топдик.

Манзура опа 71 ёшида вафот этди. Унинг узоқ вақт касал ётгани ва бундан бир неча кун илгари вафот этгани ҳақида эшитдик.

Узоқ йиллик дўстларим ва ҳамкасбларим Галима ва Багилага ҳамдардлик билдираркан, ўтган суронли даврни эсладик.

Улуғбек Ҳайдаров: Журналист Галима Бухорбоеванинг онаси Манзура опанинг оламдан ўтгани хақидаги хабар Ванкуверга ярим тунда етиб келди.

Ошхонага тушиб, турк қаҳваси хозирладим ва Манзура опа билан бўлган сўнгги учрашувимизни хотирладим. 2006 йилнинг 8 ноябрида, Навоийдаги зонадан озодликка чиқдим.

3 ойлик маҳкумлик давридаги руҳий ва жисмоний қийноқлар хибсда унчалик ўзини сездирмаган бўлсада, очиққа чиққанимдан сўнг деярли тўшакка михлаб қўйди. Шифокор назоратида ўн кунча уйда даволандим.

Бироз ўзимга келгач, хорижий давлатларнинг Тошкентдаги элчи ва консуллари бирин кетин учрашувга чақира бошлашди.

Ана шундай кунларнинг бирида, Манзура опа мени уйларига таклиф қилиб қолди. Аввалари хам Галима Бухарбаеванинг хонадонида кўп бўлганман. Манзура опа билан турли мавзуларда кўп сухбатлашганмиз.

Фикрлаши кенг, маданиятли ва ўқимишли бўлган Манзура опа ўзининг пазанда экани билан ҳам ёдимда қолган.

Хуллас, уйларига чақиргач, бордим. Мени кўриб, кўзларига ёш пайдо бўлган ва «Жуда озиб кетибсана» дегандилар. Оқсоқланиб юришимни кўриб, «Зудлик билан оёқларингни рентгенга тушириш керак» дедилар ва қаёққадир телефон қилдилар.

Гаплашиб бўлгач, «Давай, яхши бир таниш врач травматолог бор. Унга, мени укам келган, оёғини рентген қилиш керак дедим. Тез бўл, бориб келамиз» дедилар. Такси чақирдилар ва биз 15 дақиқа ичида ўша травматолог олдига етиб бордик.

Ишимиз тез битти: шифокор йигит Манзура опанинг «укаси»ни навбатсиз қабул қилди. Манзура опанинг хавотири бежиз эмас экан. Рентген суратлари ўнг оёғимнинг товони суягида дарз борлигини аниқлади. Шифокор рентгент суратларини кўриб, «Манзура опа, укангизни вақтида олиб келибсиз.

Товон суягидаги дарз хавфли. Агар чора кўрилмаса, дарз орасига эт битиб қолади ва кейин фақат жаррохлик амалиёти билан даволанишга тўғри келарди» деган эди ўшанда. Манзура опанинг харакати билан амалга ошган муолажа туфайли, тез орада оёқларимни бемалол босиб юрадиган бўлдим.

Орадан бир мунча вақт ўтгач, олис Канада менга бошпана бергач, бу ерда яна бир маротаба шифокорлар кўригидан ўтдим. Бир вақтлар Манзура опанинг таниш травмотологи берган маълумотнома ва рентгент суратларини уларга бердим. «Ўз вақтида малакали шифокорга кўринган экансан, акс холда хозир анча қийналган бўлардинг» деганди доктор Хансен ўша рентген суратларини кўриб…

Жойингиз жаннатда бўлсин, мехрибон ва мунис Манзура опа…

Қудрат Бобожон: Мен Манзура аянинг Тошкентдаги «Болалар дунёси» биноси тепасида жойлашган уйида бир неча бор меҳмон бўлганман, у мени яхши танир, менда ҳам улар юксак маданиятли бир оила сифатида таассурот қолдиган эди.

Бухорбоеваларнинг бизнинг оилага менгзайдиган томони 2014 йили вафот этган Бухарбоеваларнинг отаси Сулаймон Бухарбоев ҳам Давлат телерадиокомпаниясида, менинг отам, рахматлик Ражаббой Бобожонов каби журналист бўлиб ишлаган, чин маънодаги профессионал журналистларни вояга етказган…

Ўлим ҳақ… Мен бугун оиламиз ва журналист дўстларим, ҳамкасбларим номидан бухарбоеваларга ўз таъзиямни билдираман, Манзура опани Оллоҳ раҳмат қилсин, яқинларига сабр бардош тилайман.

Eltuz.com

Тағин ўқинг
27 июл 2016
Бугун Марказий Осиëда ишлаб чиқарилаëтган “хонтахта” филмларининг чучмал қахрамонлари одамни зада қилар экан, ўтган аср киноэкранларини тўлдирган жиддий санъаткорлар ...
20 сентябр 2015
“Ҳокимият томонидан ерим ноқонуний тортиб олиб қўйилди” деган шикоят билан ўтган йили Тошкент вилоятининг Қуйи Чирчиқ туманида истиқомат қилувчи ...
28 июн 2016
Тошкентлик Мухиддинов Самад Муродович ва Наманган шаҳридан 22 яшар Аброржон Устабоев Аюбхон ўғли Истанбулдаги Отатурк халқаро аэропортида юз берган ...
24 январ 2017
«Ҳуррият» газетаси (18.01.) янги президентнинг сўнгги вақтлардаги чиқишларидан илҳомланиб, «Чапани чапдан турганда» (рукннинг номи) нималарни айтиб юбориши мумкинлигини ҳукуматга ...
Блоглар
16 ноябр 2017
Сал аввалроқ ўзбек матбуотида Меҳнат вазирлиги ва Миграция агентлиги масъуллари Росссияга сафар қилиб, кўплаб учрашувлар ...
13 ноябр 2017
Ўзбекистонлик 1 миллиондан ортиқ меҳнат мигрантлари Санкт-Петербургда ишлаётгани расман тан олинди. Демак, РФнинг Ўзбекистонга масофа ...
10 ноябр 2017
9 ноябрь куни Тошкентга Пуйоль келди, биласиз-а? Карлес Пуйоль «Барселона»нинг собиқ ҳимоячиси. Жамоа тарихидаги энг ...