Асосий мавзулар
21 июл 2016

Йўқ машина теримига тайёргарлик бундай бўлибди-да!

Аввал ҳам айтганмиз, «Қишлоқ ҳаёти» ажойиб газета. Қишлоқ одамларига, деҳқонларга экинни қачон экиш, гўнгни қачон қаерга ишлатиш борасидаги қиймати йўқ маслаҳатлари билан кишини хурсанд қилади.

Бу сафар эса газета бутун ўзбек халқининг қарийб 25 йилдан буён ушалмаган орзуси – пахтани машинада териш мавзусини кўтарди. Кўтаргандаям шунақа кўтардики, Афанди болаларни фалон жойда ерга чалпак ёғди, деб алдаб, болалар ўша ёққа чопиб кетгандан сўнг ўзи ҳам шу гапига ишониб, болаларнинг орқасидан югурганига ўхшаш лофни урди.

Аввало, Ўзбекистонда пахтани машина териш амалиёти йўқолганига жуда кўп йиллар бўлгани бор гап. Кейин бу жараённи қайта тиклаш ишлари ҳам бугунги кунгача самара бермаганини ҳатто қишлоқ хўжалиги вазири ҳам билади (Бошқалар билганига ўнлаб йиллар бўлган. Лекин нимагадир шу соҳага масъуллар сал кечикиброқ эшитади).
Ҳозир пахта фақат қўлда, ўшандаям, халқаро ташкилотлар эътирофича, мажбурий меҳнатга асосланган ҳолда териб олинади.

Ҳар йили юз минглаб ўқитувчи ва шифокор, турли касб эгалари давлат учун «оқ олтин» териб беради.

Осмондан чалпак ёққандек, «Қишлоқ ҳаёти» ҳе йўқ, бе йўқ, машина терими мавзусини кўтариб қолганини ўқиб: «Наҳотки бу йил Ўзбекистонда пахта машинада терилса?» деб таажжубга тушиб қолади одам.

Ўтган йили баъзи хўжаликларга далага терим машинаси солингани бор гап. Аммо икки марта у ёқ-бу ёққа бориб келган машинага нима жин урди, дарров уни дала четига чиқаришиб, фақат комиссия келганда бир кўрсатиш учун эшакка ўхшаб дала четига боғлаб қўйишди.

Шу-шу пахтани машинада териш мавзуси ўз-ўзидан четга чиқиб қолганди. Шунча гапга қарамай, «Қишлоқ ҳаёти» «Ғўзани теримга қулай, машинага ўнғай қилиб ўстиринг», деб маслаҳат солиб қолди.

Ҳатто чилпишни машиналар ёрдамида қандай амалга ошириш тўғрисида ҳам эслатиб, совет давридаги айрим чилпиш машиналарининг номларини (маркаларини) келтиришдан ҳам тортинмади.

Мақолада далани машина теримига қандай тайёрлаш, қандай ишларни амалга ошириш борасида қатор маслаҳатлар берилган.
Ўзбекистонда машина терими деярли бўлмаса, бу мақола нима мақсадда чоп этилди экан, деган савол туғилди.
Саволга эса юқорида эслатганимиз Афанди латифасидан жузъийроқ жавоб топгандек бўлдик.

Ўзбекистонга ҳаваси ортган дунё

«Тошкент оқшоми» газетаси Олий Мажлис Қонунчилик палатаси депутатининг «мустақил тараққиёт йўлимизга дунёнинг ҳаваси ортаётгани» тўғрисидаги мақоласини эълон қилди.
Депутатнинг ёзишича, «1989-1990 йилларда катта иқтисодий қийинчиликлар даври эди. Экинзорларнинг бор-йўғи 8-10 фоизида буғдой, 0,8 фоизида картошка экилган».

«Ўзбек модели»даги кучли ижтимоий сиёсат, қонун устуворлиги, иқтисодиётнинг сиёсий масалалардан устунлиги, бозор иқтисодиётига босқичма-босқич ўтиш ва давлатнинг бош ислоҳотчилиги тўғрисидаги тамойилларнинг қатъий белгиланиши бугун халқаро майдонда рўй бераётган турли муаммолар олдида мамлакат ва халқларни тинчлик ва тараққиётга олиб чиқишнинг энг тўғри йўли эканини кўрсатаётганини» таъкидлайди депутат.

Депутат дунёни иқтисодий қийинчиликлардан қутқаришнинг бу йўлини кўрсатиш билан қониқмайди. Ангрен-Поп электрлаштирилган темир йўлининг қурилиши «Ўзбекистон аслида қандай буюк давлат экани, халқи қандай қудратга, салоҳиятга эга эканини яна бир бор жаҳон ҳамжамиятига намоён этгани»дан суйлайди.
Хитойликлар қуриб берган туннели, бир неча ўн километр темир йўлни электрлаштиргани билан мақтанадиган элга «ҳавас қилаётган дунё» наҳотки шунчалик ношуд бўлса?! Ёки депутат ўзининг ношудлигини яширяптимикин!?

Пулсизни ўлдираётган «беқиёс ғамхўрлик»

«Халқ сўзи» газетаси Олий Мажлис Сенати Фан, таълим ва спорт масалалари қўмитаси раисининг «Беқиёс ғамхўрликнинг ёрқин намунаси» тўғрисидаги мақоласини эълон қилди.
Мақола соғлиқни сақлаш тизимига бағишланган бўлиб, у давлатимиз раҳбари ва ҳукуматимизнинг «мустақилликнинг илк йилларидан бошлаб кўрсатиб келаётган ғамхўрликлари» ҳақидадир.

Аввало, қўмита раисининг ўзига у қадар алоқадор бўлмаган соҳага катта эътибор қаратаётганининг ўзи диққатга сазовор. Фан, таълим ва спорт соҳасидаги сон-саноқсиз муаммолардан ортиб, тиббиётга эътибор қаратаётган раисга балли.

Қўмита раиси тизимда мустақиллик йилларида «қўлга киритилган улкан ютуқлар»ни санаб ўтар экан, дунёнинг бечора «ривожланган давлатлари ҳам биринчи навбатда ижтимоий соҳага харажатларни камайтираётгани»дан қайғуради.

Ўзбекистонда эса 2015 йилда тизимни «равнақ топтириш учун давлат бюджетидан 4,3 триллион сўм ажратилгани ҳеч кимни бефарқ қолдирмагани»ни эслатиб ўтади.
Албатта, депутат «улкан ютуқлар»га соя солмаслик учун бугун Ўзбекистон тиббиёт тизими коррупциянинг улкан манбаига айлангани, пули бўлмаган одам «дунё ҳавас қиладиган давлат»нинг бу тизимидан фойдалана олмай ўлиб кетаётгани ёки ногирон бўлиб қолаётгани, шу каби бошқа муаммолар гирдобига тортилганини айтишни ўзига эп кўрмаган.

Eltuz.com

Тағин ўқинг
16 апрел 2019
Тошкент шаҳрининг Шайхонтоҳур тумани маъмурий ишлар суди 15 апрель куни ҳуқуқ фаоли, 68 яшар Аъзам Турғуновнинг ички ишлар ходими ...
9 октябр 2018
Ахборот технологиялари ва коммуникацияни ривожлантириш вазирлиги октябрь ойининг бошида Ўзбекистонда кўриш тақиқланган 103 фильм рўйхатини провайдерларга тақдим этди. Назорат ...
28 июл 2018
Қадрли вебсаҳифамиз ўқувчилари. «Элтуз» нашри жамоаси таътилга чиқади. Бу вақт ичида ўтган давр мобайнида босилган эътиборга лойиқ айрим мақолалар, ...
9 май 2016
Eltuz.com манбасининг айтишича, бош вазир ўринбосари, айни пайтда «Ўзавтосаноат» АК бошқарув раиси, Машинасозлик, электротехника ва авиация саноатини ривожлантириш, маҳсулотларни ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...