Дайжест
11 май 2017

Адлия вазирлиги «Жамият»га қарши раддия берди

Нотариал идораларнинг юлғичликлари  ҳақида мақола чоп этган “Жамият” газетасига Адлия вазирлиги дағдаға оҳанги юқори бўлган жавобни йўллади.

2017 йилнинг 10 мартида «Жамият» газетасида нотариал идоралардаги қинғирликлар ҳақида «Нотариал идорадаги найранглар» салавҳали мақола эълон қилинган, Элтуз нашри бу мақола ҳақида ёзган эди.

«Жамият» газетаси (05.05) Адлия вазирлигининг мазкур мақолада тилга олинган ҳолатлар юзасидан жавоб хатини чоп этди.

Мақолада айтилишича, мақола муаллифи бўлмиш журналист келтирган маълумотлар ўз тасдиғини топмаган.

«Бу эса (мақола муаллифи) Ж.Ниёзов томонидан чоп этилган мақолада кўрсатилган фактлар асоссиз маълумотларга таянган ҳолда ёзилганлигидан далолат беради», дейилади жавобда.

Шундан сўнг, вазирлик қонун ҳужжатларидан кўчирмалар келтириб, ОАВ ва журналистларнинг ўзлари тайёрлаётган ва тарқатаётган хабарлар ва материалларнинг ҳаққонийлиги учун жавобгар эканини писанда қилади.

Ҳатто Жиноят кодексида «ОАВ орқали туҳмат, ҳақорат қилиш ва рақобатчини обрўсизлантирганлик учун жиноий жавобгарлик белгилангани» билдирилади.

Вазирлик мақолада ўтган йилнинг 19 октябридаги ҳолат тилга олингани, аммо бу ҳақда адлия органларига ҳеч қандай маълумот келиб тушмаганини эслатганки, ушбу эслатмадан «эски гапларни кўтарган», деган маъно келиб чиқади.

Шунингдек, вазирлик аҳоли мурожаатлари билан ишлаш учун ўз виртуал қабулхонасини ишга туширгани, ишонч телефони ишлаб турганини айтиб, мурожаатлар бўйича айбдорлиги аниқланган ходимларга жазо чоралари қўлланилаётганини қўшимча қилади.

Жавоб хати сўнггида Адлия вазирлиги «мақолада кўрсатилган ҳолатлар ўз тасдиғини топмаганлиги сабабли» таҳририятдан белгиланган тартибда раддия эълон қилиш ва натижаси ҳақида вазирликка маълум қилишни сўраган.

Таъкидлаш керакки, «Жамият» газетаси Адлия вазирлигининг дағдаға, пўписа, таҳдид руҳи анқиб турган бу жавобини эълон қилар экан, раддия эмас, таҳририят фикри баён этилган ўз муносабатини билдира олган.

Таҳририят бу мақола турли учрашувларда тилга олингани, ижтимоий тармоқларда баҳсларга сабаб бўлгани, бу эса нотариал идоралар фаолиятидан қониқмаётганлар кўплигини кўрсатаётганини ёзади.

«Мақоладаги ҳолатлар ўз тасдиғини топмади, дейилиши журналист ҳақиқатдан йироқ маълумотлар тарқатибди, дегани эмас», дея фикридан қайтмайди таҳририят.

Ҳақиқатан ҳам, юлғичлик қилаётган, иши тушганлардан ортиқча пул олиб келаётган нотариуслар ўз таъмагирлигини расмийлаштириб қўядимики, ёзишмаларини текширганда бу ҳолат ошкор бўлиб қолса, деган ҳақли савол туғилади.

Ҳолбуки, аҳвол айнан шундай эканини ҳамма билади, бироқ Адлия вазирлиги мутасаддилари буни тан олгиси келмайди.

Эътиборлиси шундаки, «Жамият» газетаси айнан шу жиҳатларни тилга олар экан, вазирликка яхшигина тарсаки туширган.

«Нотариал идораларда фуқаролардан ортиқча пул ундириш ҳолати одат тусига айланганини мутлақ рад этиш, жуда юмшоқ айтганда, инсофдан бўлмаса керак. Қолаверса, ортиқча ундирилган пул тўлов патталарида акс эттирилмайдики, соҳа ходимлари яланғоч қўлга тутқич бермаслигининг сабаби ҳам шунда», деб ёзади газета.

Сўнгги вақтларда маҳаллий матбуот озгина эркинлик томон одимлаётгани кўплаб амалдорларга ёқмаётгани бор гап.
Матбуот деганда қўлга ўргатилган тўтини тушунишга одатланган шундай мутасаддилар, идораларга бу ҳолат ёқмаслиги, улар матбуот экинлашувига жиддий қаршилик кўрсатиши табиийдир.

Адлия вазирлигининг ҳамма биладиган, аммо маддалаб ётган ярани тиғ каби тилган биргина мақолага турли дағдағалар билан жавоб бергани сабаби ҳам аслида шунда.

Шундай экан, маҳаллий матбуот мана шу озгина эркинлигини сақлаб қолиш, аста-секин уни ошириб бориш йўлида ҳали кўп қаршиликларга дуч келишини кутиш мумкин.

Ҳатто бу йўлда пичоқнинг сопини ўзидан чиқариб, ўша тўтисимон журналистлардан ҳам фойдаланиши ҳеч гап эмас.

Мана шундай қаршиликларга дош бериб, уларни янчиб ўтиш йиллар давомида обрўси оёқ ости бўлишига чидаб келган ўзбек матбуотининг ўз ғурурини, нуфузини ҳимоя қилишга қанчалик тайёрлигини кўрсатиб беради.

Баҳодир Шариф

Ўзбекистонлик газетхон таҳаллуси
Eltuz.com

Тағин ўқинг
25 март 2016
«Жаҳон» ахборот агентлигининг бир қанча маҳаллий нашрларда босилган хабарида Шанхай ҳамкорлик ташкилоти расмий сайтида «Ўзбекистон иқтисодиётидаги барқарор ўсиш тамойили ...
30 октябр 2017
Манқурт десам, манқуртга ўхшамайди. Ҳаммаси зиёлидай кўринади. Оддий одамлар эмас. Бири ҳатто мажбурий обуна йўқ деб қовун туширган бўлса-да, ...
4 июл 2017
Шифокорлар далаларда ишлашга мажбур этиларкан, шифохоналарда беморлар ҳаёти учун таҳликали вазият юзага келади. 28 июн куни Брюссел анжуманида эълон ...
16 феврал 2017
Президентнинг 15 февралдаги фармонига кўра, Ўзбекистон Маданият ва спорт ишлари вазирлиги иккига ажратилиб, Ўзбекистон Маданият вазирлиги ҳамда Жисмоний тарбия ...
Блоглар
16 ноябр 2017
Сал аввалроқ ўзбек матбуотида Меҳнат вазирлиги ва Миграция агентлиги масъуллари Росссияга сафар қилиб, кўплаб учрашувлар ...
13 ноябр 2017
Ўзбекистонлик 1 миллиондан ортиқ меҳнат мигрантлари Санкт-Петербургда ишлаётгани расман тан олинди. Демак, РФнинг Ўзбекистонга масофа ...
10 ноябр 2017
9 ноябрь куни Тошкентга Пуйоль келди, биласиз-а? Карлес Пуйоль «Барселона»нинг собиқ ҳимоячиси. Жамоа тарихидаги энг ...