Мирзиëев сўкма деса ҳам ҳокимлар сўкаверади

Андижон шаҳри ҳокими Дилмурод Раҳматуллаев мактаб директорлари ва ўқитувчиларини «ҳайвон», «шоқол», «эшшак», «гадой», «падарингга лаънат» дея ҳақоратлади.

16 октябрдаги мажлисдан ёзиб олингани айтилган,»Озодлик» радиоси очиқлаган 27 минутлик аудиода Раҳматуллаев пахта теримига кам одам жўнатган эркагу аёл педагогларни тубан сўзлар билан ҳақорат қилади.

Маълум бўлишича, мажлисда шаҳардаги 50 та мактаб, 12 та коллеж, лицей, 70 та боғча раҳбарлари, масжидлар имомлари, тиббиёт ходимлари, милиция ва прокуратура раҳбарлари қатнашган.

“Тупурганман сенларга, эй тварлар! Нафас оладиган ўзингга ўхшаган нечта шоқол бор, эй ифлос?” дейди ҳоким коллеж раҳбарларини бирма-бир турғазиб.

Бу йилги пахта мавсумида ҳокимларнинг сўконғичлиги тенденцияга айланди

1 ноябрда Паркент тумани ҳокими Неъматулла Абдуллаевнинг йиғилишда айтган болахонадор сўкишлари ҳам одамни ваҳимага солади.

45 минутлик аудиода Паркент ҳокими бюджет ташкилотлари раҳбарлари шаънига 120 дан зиёд уят сўз ишлатган.

Бундан олдинрок ижтимоий тармоқда Сайхунобод тумани ҳокими Носиржон Эгамбердиевнинг мактаб директорларини битталаб савалагани тасвирли видео тарқалганди.

15 ноябрдаги селектор йиғилишида Шавкат Мирзиёев раҳбарларнинг «хизмат ваколатини суиистеъмол қилиб, қўл остидагиларга қўпол муносабатда бўлаётгани»ни қоралаб гапирганди.

Бироқ ўзи ҳам қўли остидагиларга қўполлиги билан танилган президент сўзларининг самимийлиги шубҳали. Чунки юқорида номи келтирилган ҳокимлар ҳамон ўз мансабида қолишмоқда. Одамларни ҳақорат қилишгани учун уларга қандайдир жазо берилгани жамоатчиликка маълум эмас.

Рассом Туз
Eltuz.com