Самандар Қўқоновнинг озод этилгани ҳақидаги хабар тасдиқланмади

Бугун ўзбек турмасида 23 йилу 4 ой қолган 72 ёшли Самандар Қўқонов озод этилгани ҳақида тарқалган хабар нотўғри бўлиб чиқди.

Бундан бир хафта бурун унинг терговга тортилгани ва унга қўшимча муддат берилиши мумкинлиги ҳақида хабар тарқалган ва ҳатто уни амнистия бўйича озод этиш ҳаракатлари бошлаб юборилган эди.

27 октябр куни эрталаб ижтимоий тармоқда Самандар Қўқоновнинг озод этилгани ҳақида хабар пайдо бўлди, бироқ eltuz.com манбаларининг ўрганишича, у ҳамон Навои турмасида қолаётгани маълум бўлди.

Ислом Каримовнинг шахсий душмаи сифатида қамоқда сақланаётган сиёсий маҳкумнинг бошқа муассасага этап қилиш ҳаракатлари, унинг озод этилгани ҳақидаги гап сўзларнинг тарқалишига сабаб бўлган.

Ўзбекистон Олий кенгаши депутати, «Эрк» Демократик партияси аъзоси ва Чиноз нефтни қайта ишлаш корхонаси собиқ бошлиғи бўлган Самандар Қўқоновга берилган сўнгги қамоқ жазоси 6 октябрь куни тўлиқ тугагани маълум ва у бугунги кунда Ўзбекистон тарихида қамоқда энг узоқ қолаётган сиëсий маҳкумдир.

Самандар Қўқоновнинг озод этилгани ҳақидаги хабарни Жазони Ижро этиш Бош Бошқармаси ҳам тасдиқлагани йўқ.

Eltuz.com