Асосий мавзулар
13 декабр 2016

Президентнинг тепкисини кутадиган партия фаоллари

Президент сайлови ўтар-ўтмас матбуот худди Ислом Каримов давридаги ҳолатига қайтди-қўйди. «Йўлчи юлдузи»ни бир муддат йўқотиб қўйган партия нашрлари ҳатто куни-кеча бўлиб ўтган сайловга ўз муассисларининг тўлиқроқ муносабатини билдирмай туриб, сайланган президентга ҳамду сано ўқишни бошлади.

Хусусан, «Ўзбекистон овози» газетаси (10.12) ўз муассиси бўлмиш ХДПдан сайланган депутатлар ва партия фаолларининг ЎзЛиДеП номзоди ўлароқ президентликка сайлаган Шавкат Мирзиёевнинг кейинги йилни «Халқ билан мулоқот ва инсон манфаатлари йили» деб эълон қилгани ортидан ура-ура фикр-мулоҳазаларини чоп этди.

ХДПнинг Қонунчилик палатасидаги фракцияси аъзоси Шуҳрат Турсунбоев янги президентнинг Конституция кунидаги нутқини «ҳар жиҳатдан кенг қамровли ва концептуал маъруза», дея баҳолади.

Аввал марҳум И.Каримовнинг чиқишлари депутатлар томонидан яна шундай «юксак баҳо»га сазовор кўриларди. Бу каби чиқишларда бирор ўзгариш бўлса, у ҳам Ислом Каримов номи ўрнига Шавкат Мирзиёев рутбаси ишлатилаётганидир. Қолгани аввал қандай бўлса, ҳозир ҳам шундай.

Янги президент ҳокимият халқдан узоқлашганини очиқ айтганидан кейин депутатнинг «виждони бирдан уйғонган» кўринади шекилли, ҳамма айбни ўз бўйнига олиб: «Тўғрисини айтиш керак, биз депутатларда қатъийлик ва фидойилик етишмагани, ҳақиқатнинг юзига тик қарамаганимиз учун ҳам вазият шу аҳволга келиб қолди», деб мардлик қилади.

Лекин унинг мардлиги янги юртбоши белгилаб берган чизиқдан чиқмаслигини ҳозирдан тахмин қилиш учун авлиё бўлиш шарт эмаслигини кўпчилик чин дилдан ҳис қилиб тургани шубҳасиз.

ХДП марказий кенгаши бўлим мудири эса «қабулхона» ўйинини янада ишончлироқ ўйнаш кераклигини таъкидлаган.

«Биринчи навбатда, партиямиз тизимида мавжуд бўлган «жамоатчилик қабулхоналари» ишини жонлантиришимиз, керак бўлса, тубдан қайта кўриб чиқишимиз керак. Шу орқали одамларни ўйлантираётган масалаларни ўз вақтида аниқлаш, мавжуд муаммоларин ҳал қилиш имконияти пайдо бўлади», дейди ХДП амалдори.

Чорак асрдан бери одамлар муаммоларини кўрмай келаётган бу партия фаоллари халқнинг дардини англаши учун Ш.Мирзиёевнинг тепкисига зор бўлиб турган экан-да, деган гап келади кўнгилга.

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
26 апрел 2022
Жаҳон банки лойиҳаларида иштирок этиш ҳуқуқидан камида тўрт йил муддатга маҳрум этилган бу шахс Ўзбекистондаги кенг доираларда унчалик машҳур ...
2 сентябр 2019
«Ака, мен уларни оқламоқчи эмасман, ундай ниятим ҳам йўқ. Мен уларнинг одам ажратишига ишонқирамай тургандим, холос. Агар ҳақиқатан ҳам ...
21 июн 2023
Дунëдаги илк бошқарув тизими ғор даврида бўлган. Қабила оқсоқоли қўтосни ушлай олмай қочириб юборган овчининг ўзини қозиққа ўтқазиб, гулҳанда ...
9 сентябр 2021
6 cентябрдан Ўзбекистон олий ўқув юртларида янги ўқув йили бошланди. Айни пайтда вилоятлардан пойтахтга келиб ўқиётган талабалар учун турар-жой ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...