Ойлик камлигидан хорижга қочаётган аёллар

«Оила ва жамият» газетаси (15.02) бугун ўзбек жамиятининг оғриқли нуқтаси – аёлларнинг хорижга чиқиб кетаётгани масаласига бағишланган мақола чоп этди.

Мақола хорижга чиқиб, таҳқирланган, аянчли бир аҳволда юртига қайтган айрим аёлларнинг ҳикоялари билан бошланади. Уларнинг аччиқ тақдири тилга олинади. Аёллар миграцияси билан боғлиқ баъзи рақамлар тилга олинади.

Хусусан, Тошкентнинг Бектемир тумани кўп тармоқли поликлиникаси мудирининг айтишича, ўтган йили бу ерда ташқи миграциядан қайтган хотин-қизларнинг 289 нафари тиббий кўрикдан ўтказилган. Уларнинг иккитасида ОИТС аниқланган.

Мазкур туман бандликка кўмаклашиш маркази вакили эса хориждан қайтган хотин-қизларнинг баъзилари 500-600 минг сўм маош учун ишлашни хоҳламаслигидан ёзғирган.

«Ўтган йили хориждан қайтган бир қизни ўқув маркази орқали қайта касбга тайёрлаб, ишга жойлаштирдик. Аммо уни маоши қониқтирмай, яна Туркияга кетиб қолди», дейди марказ вакили.

Мақолада ўзбекистонликларнинг, хусусан, хотин-қизларнинг хорижга чиқиб кетаётгани асл сабаблари очиб берилмаган бўлса-да, уларни юртда қолишга даъват этувчи «ақлли маслаҳатлар» қоп-қоп.

«Бир бурда нонни оиласи бағрида, хотиржам ейишдан кўра кўпроқ хорижни орзу қилаётган аёллар ҳақида нима дейиш мумкин?» дея савол ташланади мақола сўнггида.

«Инсон бир марта дунёга келади. Яхши, эркин ва озод яшашни, ҳуқуқлари ҳимоя қилинган бўлишини истайди. Бундай шароит бўлмаган давлатдан эса кўпчилик қочишга ҳаракат қилади», деганга ўхшаш «бузғунчи гаплар»ни эса мақоладан топа олмайсиз.

Баҳодир Шариф
Ўзбекистонлик газетхон таҳаллуси
Eltuz.com