Алламжонов кетди

Ўзбекистон Республикаси Президентининг тегишли фармони билан Комил Исмоилович Алламжонов бошқа ишга ўтиши муносабати билан Президент Администрацияси Ахборот сиёсати департаментининг раҳбари лавозимидан озод этилди.

Бу ҳақда Президент матбуот котиби Шерзод Асадов ўз телеграм саҳифасида маълум қилди.

“Комил Алламжонов юртимизда сўз эркинлигини ривожлантириш, давлат органлари фаолиятининг очиқлигини таъминлаш ва халқ таълими тизимини такомиллаштириш бўйича Президентимиз Ш.М. Мирзиёев белгилаб берган устувор вазифаларни амалга оширишда катта натижаларга эришди.

Комил Исмоилович билан яқиндан ишлаган кўп сонли ҳамкасбларимиз қаторида унинг касбий маҳоратини юксак баҳолаб, келгусидаги фаолиятида улкан зафар ва муваффақиятлар тилаб қоламан,” деб ёзди Шерзод Асадов.
Аммо у Комил Алламжоновнинг қандай ишга ўтганини ёзмаган.

Лекин, нима бўлганида ҳам, Комил Алламжоновнинг Президент Администрацияси Ахборот сиёсати департаментининг раҳбари лавозимидан озод этилиши келгуси ойга белгиланган сайловдан олдинги энг катта янгилик деб бемалол айтса бўлади.

Президент матбуот котиби Алламжоновга қандай вазифа берилгани ҳақида ҳеч нарса дегани йўқ.

Унинг лавозими кўтариладими ёки буткул четлатиладими?

Балки бу катта бир ўйиннинг бир қисмидир?

Кутамиз, кўрамиз.

Нима бўлганида ҳам Комил Алламжонов йўқолиб қоладиган одам эмас.