Гулнора Каримова эгалик қилган «Сижжак» дам олиш маскани касаба уюшмаси федерациясига ўтди

Муқаддам Гулнора Каримова эгалик қилган, 70 миллиард сўмга баҳоланган 5,38 гектарлик объект 2021-2022 йилларда бир неча бор сотувга қўйилди, аммо харидор топилмади.

«Сижжак» дам олиш маскани Ўзбекистон Касаба уюшмалари федерацияси дам олиш зоналари ва болалар соғломлаштириш оромгоҳлари рўйхатига киритилди. Бу ҳақда Вазирлар Маҳкамаси томонидан 2024 йил 27 декабрда қабул қилинган қарорда белгилаб қўйилган.

Ушбу дам олиш маскани Тошкент вилояти, Бўстонлиқ тумани, Сижжак мавзесидаги «Сарбоғ» маҳалласида жойлашган ва марҳум президент Ислом Каримовнинг қизи Гулнора Каримовага тегишли эди.

Маскан 2017 йилнинг 10 февралида Жиноят ишлари бўйича Тошкент вилояти суди ажрими билан мусодара этилган. Дастлаб у Ўзбекистон Триатлон федерациясига вақтинчалик фойдаланишга берилди. Сўнгра аукцион орқали сотувга қўйилди.

5,38 гектар ҳудудни эгаллаган ва 70 миллиард сўмга баҳоланган объект 2021-2022 йилларда бир неча бор сотувга қўйилди, аммо харидор топилмади.

2023 йил 14 июндаги президент фармонига кўра, «Сижжак» дам олиш маскани хусусийлаштириладиган объектлар рўйхатидан чиқарилиб, 124-мактаб-интернатнинг балансида сақланаётган эди.

Элтузга келиб тушган маълумотларга кўра, Гулнора Каримова эгалигида бўлган Сармишсой дарасидаги меҳмонхоналар, катта қурилиш обьектлари, Қибрайдаги дилфинаруми ва ҳатто ўзининг озодлик давридаги яшаб турган уйи ҳам турли ташкилотлар ҳисобига ўтказилиб юборилган.