Document UZ
16 март 2018

Гулнора Каримованинг «чўнтаги» озодликка чиқарилмоқда

Ўзбекистон собиқ президентининг тўнғич қизи Гулнора Каримованинг яқинлари орасида унинг «чўнтаги» сифатида танилган шахс – Журъат Мелиқулов қамоқдан бутунлай озод этилиш арафасида турибди.

Журъат Мелиқулов © eltuz.com

Бу ҳақда “Элтуз”га хабар қилган Ўзбекистон Бош прокуратурасининг юқори лавозимли мулозимига кўра, 54 ёшли Журъат Мелиқулов февраль ойида Қаршидаги 64/49-жазони ижро этиш колониясидан Пскентдаги 64/75-манзил колонияга ўтказилган.

Журъат Мелиқулов 2012-2013 йиллар оралиғида Фарғона нефтни қайта ишлаш заводидан 100 миллион АҚШ долларидан кўпроқ маблағни ўзлаштиришда айбдор деб топилиб, 2014 йилнинг 20 августида жиноят ишлари бўйича Тошкент шаҳри суди томонидан 15 йилга озодликдан маҳрум этилганди.

Бош прокуратура ходимининг айтишича, халқ орасида ФНПЗ номи билан машҳур Фарғона нефтни қайта ишлаш заводининг собиқ тижорий директори Журъат Мелиқулов яқин келажакда бутунлай озод бўлиш учун бор имкониятларини ишга солмоқда.

Унинг илова қилишича, март ойи бошида Пскентдаги манзил колония раҳбарияти Мелиқуловдан президент номига кечирим номаси ёздириб олган.

Журъат Мелиқуловнинг давлатга етказган моддий зарари қоплангани йўқ.

ФНПЗни ўпирган “ишбилармон”

Тошкентдаги Мелиқуловга тегишли кўчмас мулклар. © eltuz.com

“Элтуз” Мелиқулов ва яна беш нафар шахс устидан олиб борилган 1-472/2014 рақамли жиноят иши хулосасини қўлга киритишга муваффақ бўлди.

Унга кўра, Тошкентнинг Шайхонтоҳур туманида истиқомат қилган Журъат Мелиқулов ФНПЗда масъул вазифаларни бажарган беш киши билан бирга “жиноий тил бириктирган ва ўз вазифаларини суиистеъмол қилган ҳолда… ФНПЗ пул маблағларини тизимли тарзда ўмариш, пора олиш, Ўзбекистон иқтисодий манфаатларига зид равишда битимлар тузиш ва йирик миқдордаги солиқлардан бўйин товлаш билан шуғулланган”.

Ўзбекистон Бош прокуратураси ходимига кўра, ФНПЗ тижорий директори бўлган Журъат Мелиқулов 2012-2013 йилларда нефтдан олинган даромаддан ҳар ой Гулнора Каримованинг шахсан ўзига 10 миллион АҚШ доллари, шунингдек, Гулнора Каримованинг фуқаровий эри Рустам Мадумаровга 8 миллион доллардан етказиб турган.

Жиноят иши хулосасида Гулнора Каримова ва Журъат Мелиқулов ўртасидаги ҳамкорлик ҳақида лом-мим дейилмаган, фақат Мелиқуловнинг “тергов пайтида исми аниқланмаган шахслар” билан ҳамкорлик қилгани қайд этилган.

Аммо жиноят иши хулосасида Рустам Мадумаров ва Журъат Мелиқулов ҳамкорлигига алоҳида тўхталиб ўтилган.

Унда бундай дейилади:

“2012 йил октябридан Р.Мадумаров топшириғи билан ФНПЗда ишлай бошлади. Бунинг учун Мадумаров ундан ҳар ой 8 миллион доллар тўлаб боришни талаб қилди”.

Жиноят иши хулосасидан маълум бўлишича, Рустам Мадумаров Журъат Мелиқулов ва унинг шерикларига ички бозорни нефть маҳсулотлари билан таъминлаш учун ФНПЗ дўконларини очишга топшириқ беради.

Ўз навбатида, Журъат Мелиқулов харидорлардан нефть маҳсулотлари учун “шапка” олиш тизимини йўлга қўяди.

Журъат Мелиқўзиевнинг “Элтуз” ўрганган жиноят иши хулосаси нусхаси. © eltuz.com

Жумладан, шамларнинг бир тоннаси учун 500-600 доллар, бензиннинг бир вагони учун 2000-2500 доллар, дизель ёнилғиси учун тоннасига 200-250 доллар, экстракцион бензиннинг бир тоннаси учун 100 доллар миқдорида “шапка” олинган.

“Олинган пул маблағларини у (Журъат Мелиқулов) ўз шахсий автомобилида Тошкент шаҳрига келтириб, Р.Мадумаровга ёки унинг ёрдамчиларига топширган. Пулни бериш жойлари “Мерси” ва “Сарбон” ресторанлари, шунингдек, Р.Мадумаровнинг Ўзбекистон Республикаси ИИВ ёнидаги офиси бўлган,” дейилади жиноят иши хулосасида.

Бундан ташқари, техник мойлардан олинган “шапка”нинг бир қисми Рустам Мадумаровга қарашли “Таъминот Ойл ММП” (Ta’minot Oil MMP) офшор ширкати ҳисобига ўтказиб борилган.

2014 йил май ойида Рустам Мадумаров одам ўғирлашда айбдор деб топилиб, Ўзбекистон Ҳарбий суди томонидан 9 йилга озодликдан маҳрум этилди.

Гулнора Каримова ҳам 2015 йилда солиқ тўлашдан бош тортиш каби айбловлар билан 5 йилга озодликдан маҳрум этилгани ҳақида Ўзбекистон Бош прокуратураси маълум қилган.

Бош прокуратура Гулнора Каримовага нисбатан иккинчи алоҳида жиноят иши очган ва айни дамгача тергов ишлари ниҳоясига етгани йўқ.

“Чўнтак” яширган мол-мулк

Тошкентнинг Ойбек метроси яқинидаги Мелиқуловга тегишли иккинчи офис биноси. © eltuz.com

“Элтуз” бир ойча давом этган текшируви давомида Журъат Мелиқуловга алоқадор ширкатлар ва мол-мулкларнинг баъзиларини аниқлашга муваффақ бўлди.

Улар қуйидагилардан иборат:

  • Тошкент шаҳри, Ойбек метроси яқинидаги 4 қаватли офис;
  • Тошкент шаҳри, Тарас Шевченко кўчасидаги EVO кўп қаватли биноси;

  • Дубайнинг “Палма” оролидаги қимматбаҳо вилла;

  • Москванинг “Малина Роша” мавзесидаги 7 қаватли бизнес маркази;

  • Stamford Capital Lnc офшор ширкати (бу ширкатда Журъат Мелиқуловнинг қанча маблағи сақланаётгани маълум эмас)

ФНПЗ

Фарғона нефтни қайта ишлаш заводи ёнилғи-мойлаш материалларини чиқарадиган Марказий Осиёдаги энг йирик корхоналардан бири ҳисобланади.

“Ўзнефтмаҳсулот” акциядорлик компаниясининг “Фарғона нефтни қайта ишлаш заводи” унитар шўъба корхонаси нефтни қайта ишлаш соҳасидаги ёқилғи-мой ишлаб чиқариш бўйича деярли барча турдаги нефть маҳсулотлари ишлаб чиқаришга қодир бўлган 35 технологик қурилмани ўз ичига олади.

Фарғона нефтни қайта ишлаш заводи ўзининг 55 йиллик фаолияти давомида 60 хилдан ортиқ нефть маҳсулоти ва халқ истеъмол молини ишлаб чиқарган

Рустам Аҳмедов
“Элтуз”нинг Тошкентдаги мухбири
eltuz.com

Тағин ўқинг
13 март 2017
Мархум президент Ислом Каримов хотирасини абадийлаштириш қарорини изоҳлашни сўраб, Элтуз нашри жамиятшунос олим Баходир Мусаевга мурожаат этди. Бундан илгари ...
22 январ 2019
Ҳукуматнинг фермерлик учун ажратилган ер майдонларини мақбуллаштириш тўғрисидаги қарори шундай ҳам аҳволи оғир бўлган фермерларни яна бир синов қаршисида ...
18 феврал 2016
28 яшар рус таксичи қизнинг пулларини олиб, ўлдириб, кейин машинасига ўт қўйган 24 ёшли Сотволдиев 14 ярим йил қатъий ...
17 январ 2019
Журналист Каримберди Тўрамурод ўзининг фейсбукдаги саҳифасида Самарқанддаги 64-махсус мактаб-интернат директори Шуҳрат Садинов аслида шантаж ва туҳмат қурбони бўлгани, унинг ...
Блоглар
3 июн 2020
Бир нарсага эътибор қаратдим: АҚШда бўлаётган воқеаларга эътибор рус интернетида жуда юқори; рунетда бу воқеаларни ...
28 май 2020
Бош прокуратура коронавирус тарқалиши силсиласини аниқлаш осон бўлиши учун фуқаролардан кундалик тутишни сўраганида баъзилар буни ...
25 май 2020
“Би-Би-Си” радиоси ўзбек хизмати журналисти Муҳаммад Солиҳга: “Коронавирус пандемияси пайти шундай чиқиш қилишингиз ўринлими? Бунинг ...