Асосий мавзулар
8 октябр 2017

Улуғбек Ҳайдаров: Бобомурод иши жамият ва ҳукуматни икки йўл орасига келтирди

Ўн кундирки, Бобомурод Абдулладан бирон хабар йўқ. Унинг олдига бугунга қадар адвокати қўйилмаяпти. Уни ҳимоя қиламан деган адвокатларга эса босимлар бўлаяпти.

Бу холат қанчалик ноқонуний бўлса, шу қадар қўрқинчлидир. Чунки бу, Бобомуроднинг ҳибсда қаттиқ қийноқларга солинаётганини англатади.

Бошимдан ўтган. Биламан. 2006 йилнинг 13 сентябрида мени товламачиликда айблаб қамоққа олишди. Бир хафтагача ҳеч кимни ёнимга йўлатишмади: товонимга урилган таёқлар зарбидан оёқ босиб юришим қийинлашди, буйракларим ва жигарим ишдан чиқди, ўнг елкам суяги жароҳат олди. Уларнинг шифокори қилган укол эса аҳволимни янада оғирлаштирди. Маълум вақтгача ҳаттоки, гапиришга қийналдим ва фикрлашим хиралашди.

Бироқ, жисмоний қийноқ азоби, терговчи ва ёрдамчиларининг “Хотининг ва опангни шу ерга чақирамиз ва кўз олдингда бадном қиламиз” деган гапларидан кейин ҳеч нарса бўлмай қолганди. Ва мен ўша куниёқ терговчининг версиясига иқрорлигим ҳақидаги барча қоғозларга имзо чекиб берганман.

Кўплаб хамкасбларимнинг саъйи харакатлари туфайли ҳалқаро ташкилотлар ҳаракатга келди. Натижада мен 6 йиллик жазони ўташ учун Навоийдаги зонага етиб борганимнинг 7 чи куни озодликка чиқдим.

Канада ҳукумати менга сиёсий бошпана бергач, шу мамлакатга рафиқам билан келдим. Бу ерда мени дарҳол кенг кўламли тиббий кўрикдан ўтказишди ва қамоқхоналарда менга нисбатан қўлланилган жисмоний ва руҳий қийноқларнинг “излари” тиббий мутаҳассисларни жиддий ҳавотирга солди. “Постравматик синдром” ташхиси билан 6 йил даволандим, жигар ва буйракларимнинг фаолияти бутунлай тикланишига ҳам анча вақт кетди. Ногирон дея маълумотнома ҳам беришди… Ҳозиргача, шифокорлар соғлиғимни назорат қилиб боришади.

Дўстим Бобомурод Абдулланинг ҳибсга олинганини эшитганимдан буён ҳаёлимда шу гап тинмай айланади.

“Садист терговчилар, майда-чуйда нарсалар ҳақида мақолалар ёзиб юрган мен каби бир журналистни шунчалик қийнаб, ногирон қилишган бўлса, Усмон Ҳақназаров дея қўлга олинган Бобомуроднинг аҳволи нима бўлди экан терговда?”

Надоматлар бўлсинки, Бобомуродни ҳеч кимга кўрсатишмаяпти ва бу яхшилик аломати эмас!

Журналист дўстимиз Бобомурод Абдулланинг қамоққа олиниши, ўзини ислоҳотчи рахбар сифатида дунё аҳлига тақдим қилаётган президент Шавкат Мирзиёевнинг сиёсий обрўсига жиддий зарар келтириши муқаррар.

Журналистнинг ҳибсга олингани ҳақида ҳалқаро ташкилотлар бонг уришмоқда, демак бундан буёғига Ўзбекистон ҳукумати таққилатадиган жиддий ҳамда нуфузли халқаро “дарвозалар”нинг эгалари, энг аввало қамоқдаги журналистнинг аҳволи ҳақида сўрашади.

Бу сўровнинг жавоби ўзбек жамияти шу пайтгача кўниккан аҳволнинг янада юз тубан кетиши ёки ўнгланишига сабаб бўлиши мумкин.

Бугун яна бир овози бўғилган журналист панжара ортида қоларкан, ўзбек жамиятининг жим туришга ҳаққи йўқ.

Эркинликни, миллатини севадиган ҳар бир ўзбек, бугун “Журналистни ҳибсда тутма!” дея ҳайқириши керак.

Бобомурод дўстимизнинг қамоққа олиниши Ўзбекистон ҳукуматининг юзини ташқи дунё олдида ўзгартираётган бир пайтда, ўзини ўзбекман деганларни ҳам икки йўлнинг ўртасига қўйди. Ё Инсон бўлиб ҳайқиринг, ёки қўй каби маъраб яйловга йўл солинг!

Бугун барчамизга бошқа танлов йўқ.

Улуғбек Ҳайдаров
Ванкувер шахри, Канада
Eltuz.com

Тағин ўқинг
27 июл 2016
Ўзбекистонда инсон ҳуқуқлари билан боғлиқ вазият сўнгги олти ой давомида ўзгаришсиз қолган, дейилади ҳисоботда. Маҳкумларга нисбатан ғайриинсоний муносабат, дин ...
10 январ 2017
Ўзбекистондаги кадрлар алмашуви кишини сергаклантиради. 20 йиллик шартли қамоққа ҳукм этилган Козим Тўлаганов ҳокимият тизимига қайтди. Корруцияга алоқадор Абдулла ...
6 июн 2016
Ўқувчиларимизга маълуму машҳур Қуддус Аъзамовнинг навбатдаги бир кўрсатуви “Тинчлик учун курашмоқ керак” мавзусига бағишланди. Ана ток шоу, мана ток ...
26 ноябр 2018
“Элтуз” нашри ўз суриштирув гуруҳи томонидан йиғилган маълумотлар асосида тайёрланган фильмнинг иккинчи қисмини эътиборингизга тақдим қилади. Фильмнинг дастлабки қисмида ...
Блоглар
3 июн 2019
28 май куни Тошкентда ўтган конференцияда президентнинг тўнғич қизи Саида Мирзиёева маҳаллий оммавий ахборот воситаларининг ...
23 май 2019
Лас-Вегас – гуноҳлар шаҳри. Аҳолиси ярим миллион, даромади казино ва қимордан келадиган бу шаҳарда бир ...
16 май 2019
Ҳақиқатга қайси томонидан қарасанг ҳам бир хил кўринади, дейишади. Маҳмуд Ражаб -шоир, ёзувчи, шу миллатнинг ...