Асосий мавзулар
16 ноябр 2017

Ҳолва ичидаги аччиқ қалампир

Сал аввалроқ ўзбек матбуотида Меҳнат вазирлиги ва Миграция агентлиги масъуллари Росссияга сафар қилиб, кўплаб учрашувлар ўтказгани, бўлажак мигрантлар учун иш шарт-шароитлари борасида музокаралар олиб боргани ҳақида бир қанча мақолалар чиққанди.

Яқинда эса «Элтуз»да меҳнат мигрантлари экспорти мамлакатимиз учун стратегик мақсад бўлмаслиги ҳақидаги фикрларни ўқидик.

Дарҳақиқат, меҳнат миграцияси Ўзбекистон учун, унинг халқи учун мажбурий қадам бўлиб турибди. Чунки бу жараён ижобий жиҳатлари билан бирга кўплаб салбий омиллари билан ҳам аҳамиятлидир.

Аввало, Ўзбекистонда жуда авж олган ва бугун ҳам давом этаётан оммавий миграция миллатнинг генофондини абгор қилаётганини эсдан чиқармаслик керак.

Россиядан ўлиб келаётган юзлаб, балки минглаб ўзбеклар ҳақида кўп йиллардан бери эшитяпмиз. Бундан ташқари, ноқулай меҳнат шароитлари, ноинсоний муносабатлар сабаб қанчадан-қанча юртдошларимиз касал бўлиб қайтмоқда.

Иккита яқин танишим бир неча йил Россияда ишлаганди. Уларнинг иккаласи ҳам буйрак касали орттириб келиб, охир-оқибат ёшгина ўлиб кетди. Ортида фарзандлари қолди, бевалари қолди.

Бундай мисолларни минглаб келтириш мумкин бугун Ўзбекистонда ва бу ҳолатлар жамиятга ҳам ўз таъсирини ўтказади. Зеро, отасиз қолган фарзандлар ва бева қолган ёш аёллар ҳам шу жамият аъзоларидир.

Бундан ташқари, ойлар, йиллар давомида ота-онасиз ўсаётган фарзандларнинг тарбияси оқибатлари ҳам эртага жамиятда шундай кескин акс-садо бериши мумкинки, бу яхшиликка эмаслиги аниқ.

Албатта, ҳозир миграцияни тартибга олиш жуда муҳим масала. Лекин ҳар қандай ҳолатда ҳам асосий иш ўринларини юртимизнинг ўзида яратиш чораларини кўриш керак.

Германия ёки Япония аҳолисининг қариётгани ҳисобига мигрант таклиф этади. Иқтисодиёти тобора гуркираётган Жанубий Кореяга арзон ишчи кучи керак.

Жадал ривожланаётган Польшага Европанинг тараққий этган давлатларига йўл олган фуқаролари ўрнини тўлдирадиган ишчи кучи лозим.

Аммо бугун президентнинг аввалги ўтмишдошидан фарқ қиладиган ижобий саъй-ҳаракатлари билан халқ оғирини енгил қилиш, тўғри ривожланиш сари юз тутаётгандек кўринаётган юртимизга ўзимизнинг меҳнаткашлар керак эмасми?

Ахир улар орасида ҳам қанчадан-қанча малакали мутахассислар бор-ку. Ривожланишни истар эканмиз, аввало, ана шулар учун иш ўринлари яратиш зарур.

Тепада ўтирган амалдорлар фақат таниш-билишлари, соққасини чўзганларни ишга олаверса, имконсиз бошқа мутахассислар четга чиқиб кетаверса, бугун кўзланаётган мақсадга эришиш шунчалик қийинлашиб бораверади.

Меҳнат мигрантлари экспорти бизга ҳозир қанчалик ширин кўринмасин, бу ҳолванинг ичига аччиқ қалампир қўшилганини ҳам унутмаслигимиз керак.

Шуҳрат Омон
Eltuz.com

Тағин ўқинг
31 май 2018
31 май куни ижтимоий тармоқларда тарқалган 3D пиёдалар йўлакчаси сурати Наманган кўчаларида олингани айтилади. Ўзбекистонда шусиз ҳам тузукроқ асфальт ...
11 октябр 2017
Бобомурод иши, нўноқ режиссер саҳналаштирган, бироқ чинакам жаллодлар иштирокидаги қонли театрни эслатади. Ўзбекистон Ташқи ишлар вазирлиги собиқ мулозими, ҳозирда ...
4 апрел 2017
Ўзбекистон телеканаллари баҳорнинг биринчи ойини анъанавий тарзда буткул байрамона ўтказди. Хотин-қизлар байрами муносабати билан ўзбек аёлларининг қанчалик «бахтиёрлиги, ватанпарварлиги, ...
20 декабр 2016
Маҳрум президент Ислом Каримовнинг ҳар бир чиқиши, ваъдалари ортидан халқнинг турли қатлами вакилларининг бу чиқишларга муносабат билдириши совет давридан ...
Блоглар
18 январ 2019
Ўзбек матбуоти Бухоро вилоятининг Олот тумани ҳокими Шерали Саломов йиғилишда фермер Ориф Дурматовни калтаклагани ва ...
16 январ 2019
Лондондаги Шарқ ва Африка тадқиқотлари институти таҳлилчиси Алишер Илҳомов фейсбук саҳифасида Президент Шавкат Мирзиёевнинг Ўзбекистон ...
15 январ 2019
Ўзбекистонда Ватан ҳимоячилари куни нишонланди… бу эса болалар боғчасида олинган сурат… Нимага болаларга армия формасини ...