Cатира
24 июл 2018

Машина ойнасини қорайтириш фақат пулдорлар учун

Совет ҳукумати синфийлик жамиятини йўқотиш, ҳамманинг тенглиги йўлида 70 йил сиёсат юритди. Ислом Каримов эса “Бизда ўта бойлар ҳам, ўта камбағаллар ҳам бўлмайди”, деган сиёсатни байроқ қилди.

Тўғри, бугунги кунда Каримовнинг кўнглида “биздан бошқа ўта бойлар бўлмайди”, деган кечинма бўлгани ойдинлашди. Совет ҳукумати тенглик жамияти яратишда собитқадамроқ эди.

Ўзбекистоннинг бугунги ҳукумати эса аҳолини бойлар ва камбағалларга ажратиш борасида мақсадли сиёсат юритаётгандек таассурот қолдирмоқда.

Аввалроқ автомобилларнинг “крутой” давлат рақамларини фақат бойлар олиши тизими йўлга қўйилганди. Бугун кимоши савдода сотилаётган бундай рақамлар давлатга миллиардлаб сўм даромад келтирмоқда.

Энди нафақат тегишли идоралар вакиллари, балки оддий одамлар ҳам машинанинг давлат рақамига қараб, унинг эгаси қай даражада бойлигини чамалаб кўриши мумкин.

Ҳукумат яқинда бой билан камбағални визуал тарзда ажратиб олишни янада осонлаштиришга ёрдам берадиган навбатдаги қарорини қабул қилди.

“Туси ўзгартирилган (қорайтирилган) ойнали автотранспорт воситаларидан фойдаланишни тартибга солиш чоралари тўғрисида” деб номланди бу қарор.

Қарорга кўра, жисмоний шахслар машинасининг ойнасини қорайтириш учун энг кам иш ҳақининг 90 баравари (16 587 000 сўм) миқдоридаги тўловни тўлаши лозим.

Аввалроқ бу қарор лойиҳаси умумхалқ муҳокамасига қўйилганди ва қаттиқ танқидга учраганди. Ҳатто давлатга тегишли марказлардан бирининг экспертлари ҳам уни қоралаб чиққанди.

Шунга қарамай, ҳукумат бу қарорни қабул қилди ва ижтимоий тармоқларда янада кўпроқ танқид остида қолди.

Фойдаланувчилар Ўзбекистон конституциясининг бош ғояси барча фуқаролар тенглиги ва ижтимоий адолат кафолатланиши эканини эслатиб, ҳукуматнинг сўнгги қадамлари бу ғояга тескари йўналишда бўлаётганини таъкидламоқда.

Жумладан, телеграммдаги davletov.uz канали “фуқаролар мамлакатдаги имкониятлардан, қулайликлардан иқтисодий имкониятига қараб фойдаланишни ёки давлат мавжуд имкониятни пуллашни бошласа, бу давлатчиликнинг фалсафаси ўзгараётганини кўрсатишини” билдирди.

“Қиммат тонировка жамиятда бой ва камбағални аниқ кўриш, кўрсатиш ва ажратиш йўлидаги илк қадам. Тонировка ё бўлиши, ёки бўлмаслиги керак. Ҳеч қачон давлат томонидан бунақа ақлга сиғмайдиган нархда эмас. Бу цинизмнинг энг олий кўриниши”, деб ёзди ушбу юзер.

“Давлат идоралари ёки давлат улуши бор ташкилотлар тонировка қилмасин. Ҳурмат ила, солиқ тўловчи”, дея истеҳзо қилди бошқа бир фойдаланувчи.

Уларга навбатдаги юзер жўр бўлди: “1 августдан бошлаб жазирамада куйиб кетмаслик учун йилига 16 587 000 сўм тўлаб қўйишингизга тўғри келади. Савол туғилади: тонировка кимнинг бизнеси?”

Ижтимоий тармоқларнинг кўпгина фойдаланувчилари эса халқ фикри умуман ҳисобга олинмаса, бундай қарорлар лойиҳаси нега умумий муҳокамага қўйилаётганига истеҳзо билан қаради.

Уларнинг айтишича, машина ойнасини қорайтиришга оид қарор лойиҳасини деярли ҳеч ким ёқламаган, бирорта ижобий фикр билдирилмаган.

“Шундай экан, бундай кўзбўямачилик сиёсати, бундай кўзбўямачи демократия нимага керак, кимга керак?!” деб ёзди улардан бири.

Автомобилларнинг “чиройли” рақамларини кимошди савдода сотиш ғояси ўз вақтида бу тизимдаги коррупцияга қарши курашиш билан изоҳланганди.

Аммо йилнинг 9 ойи қуёшли бўладиган Ўзбекистонда машина ойналарини қорайтириш ҳуқуқи ҳам бойларга тақдим этилаётгани ҳамон оддий халқ учун тушунарсиз бўлиб турибди.

Баҳодир Шариф
Eltuz.com

Тағин ўқинг
23 май 2017
23 май куни Марказий Банк Бошқаруви раиси Муллажонов Файзулла Мақсуджонович 67 ёшида оламдан ўтди. 1950 йил Сирдарё вилоятида туғилган, ...
21 сентябр 2019
Сумкасидан Муҳаммад Солиҳ китоблари чиққани учун устидан жиноят иши очилиб, терговга чақирилган хоразмлик 56 яшар шоир Маҳмуд Ражаб 20 ...
6 март 2018
«Бош вазирдан тортиб, ҳокимларгача тўй маросимларига бориши ман этилади», деди Шавкат Мирзиёев 2 март куни ижтимоий тармоқда пайдо бўлган ...
4 октябр 2018
Дубайдаги қимматбаҳо меҳмонхонага 2 октябрда келиб жойлашган Гулнора Каримова аслида россиялик миллиардер Сулаймон Каримовнинг қизи қизи экани билдирилмоқда. Бундан ...
Блоглар
3 январ 2023
Улуғ ўзбек шоири ва муҳолифат лидери Муҳаммад Солиҳ билан суҳбатнинг 20-қисмида журналистнинг «Адабиёт нима?» деган ...
25 декабр 2022
Улуғ ўзбек шоири ва муҳолифат лидери Муҳаммад Солиҳ билан суҳбатнинг 18-қисмидан 90-йилларда таниқли адабиётшунос Иброҳим ...
20 декабр 2022
Улуғ ўзбек шоири ва муҳолифат лидери Муҳаммад Солиҳ суҳбатнинг 17-қисми мухолифат ва ҳокимиятнинг келажаги ҳақида ...