Андижонда аскарлар ҳарбий хизматни пахта даласида ўташмоқда

Ўзбекистон ҳарбий қисмларидан биридаги аскарнинг «Элтуз»га билдиришича, улар вақтли ҳарбий хизматни Андижон вилояти далаларида пахта териш билан ўташмоқда.

Ётоқда пахта тераётган ва кунлик теримга бориб келаётган теримчилар орасида 1 йиллик ҳарбий хизматдаги аскарлар, 5 йиллик шартнома асосида ишлайдиган ҳарбий хизматчилар ва ҳатто 1 ойлик ҳарбий хизматга чақирилганлар ҳам бор.

Айниқса, 1 ойлик хизматга чақирилганлар ҳарбий хизмат даври бошлангандан буён пахта термоқда, 1 ойлик хизмат ўтовчиларнинг айримлари айнан пахта терими мавсуми учун чақирилган.

«Хўжаобод тумани далаларида айни кунда 400 га яқин аскар пахта теряпти. Умуман, Андижондаги барча ҳарбий қисмлардан аскар ва хизматчилар пахта теримига юборилган», – дейди ҳарбийга чақирилиб, пахта теримида қолаётган аскар.

Унинг билиришича, улардан пахтага боришни хоҳлаш ё хоҳламаслиги хақида сўраб ўтирилмаган. «Элтуз» манбасининг айтишича, улар умумий буйруққа кўра, “кўнгилли бўлиб ёрдам бериш” ниқоби остида пахта даласига юборилганлар.

«Биз Улуғнор тумани далаларида пахта теряпмиз. 100 кг дан кунлик норма белгиланган. Лекин бунча пахтани теришнинг иложи йўқ, ҳозирда 60-70 кило атрофида пахта теряпмиз, холос. Нормани бажармаганлар ҳарбийчасига жазоланади. Шунинг учун ёнимизда пахта тераётган илғор теримчи опалардан 1 кг пахтани 800 сўмдан сотиб оламиз ва қўшиб топширамиз. Пахта тераётганимизга 20 кундан ошди. 2-3 кундан сўнг ҳарбий қисмга кетиб сафга тайёргарлик кўрамиз ва ҳарбий қасамёд қабул қиламиз, қарабсизки, хизмат тугайди. Энг ёмони, ҳарбий хизмат деганда пахта йиғим-терими ҳақидаги таассуротлар билан қоламанми энди, деб алам қиляпман. Афсус, бундай бўлади, деб ўйламаган эдим», дейди исми-шарифини айтишни хоҳламаган аскарлардан бири.

Хўжаобод тумани адирларида пахта тераётган аскарлардан бирининг маълум қилишича, 7-8 октябрь кунлари ҳаво жуда совиб кетган, қор аралаш ёмғир ёққан.

Ёғин тинганидан сўнг улар яна далага пахта тергани юборилганлар. Аскарлар совуқда қоринлари тез-тез очиб кетаётганлиги ва тўймаётганидан нолишган.

Айримлар уйидан нон ва овқат олиб келишларини сўраб қўнғироқ қилганлар.

«Пахта йиғим-терими биз учун қачонгача давом этиши маълум эмас», – дейди далада қолаётган аскар йигит.

Eltuz.com