• Фото: ca-irnews.com
Асосий мавзулар
14 август 2019

Азизов Покистонда нима қилди?

Ўзбекистон Давлат хавфсизлик хизмати раиси Абдусалом Азизовнинг Покистонга ташрифи ва “Толибон” ҳаракати вакилларининг Тошкентга сафари орасида ўзаро боғлиқлик бор. 

Мустақил таҳлилчи Ўрозбой Абдуллаев “Элтуз” билан суҳбатда шундай фикр билдирди. 

Унинг сўзларига кўра, ДХХ раисининг ўтган ой охирида Покистонга бориши воқеаси деярли барча ОАВДа таҳлилсиз, шунчаки юзаки ёритилди. Ҳолбуки, бу ташриф ортида жуда кўп “ҳикматлар” бор. 

“Бу ташрифдан кўп ўтмай, Афғонистоннинг расмий ҳукумати билан келишилмаган ҳолда толиблар етакчиларининг Ўзбекистонга сафари амалга оширилиши, улар жуда иззат билан кутиб олингани шундай “ҳикмат”лардан биридир. Чунки Покистон “Толибон”нинг ҳомийси эканини унутмаслигимиз керак”, деди Ў.Абдуллаев.

“Толибон” ҳаракати айнан Покистонда ташкил этилган, кейинчалик Афғонистонда қанот ёзиб, ҳатто бир муддат мамлакатда ҳукмронлик қилишга ҳам улгурган. Ҳаракат етакчилари Покистон мадрасаларида таълим олган ва улар расмий Исломобод билан келишган ҳолда фаолият юритиши айтиб келинади. 

Сўнгги вақтларда Ўзбекистон афғонлараро музокараларда фаол роль ўйнаш ҳаракатида. Марҳум президент Ислом Каримов давридаги шундай уринишлар муваффақиятсиз якунланган эди. 

Янги давлат раҳбари Шавкат Мирзиёев ўтмишдошининг бу муваффақиятсизлигига эътибор қаратмай, шу йўналишда янги қадамлар қўймоқда. Унинг бу саъй-ҳаракатлари Россиянинг “Толибон” билан алоқалари яхшиланиши фонида кечмоқда. 

Шу нуқтаи назардан олиб қараганда, ДХХ раисининг Покистонга ташрифи ортидан толибларнинг Тошкентга ҳаллослаб етиб келишида, эгнига зарбоф тўн ёпилишида мантиқ кўринади. 

Аммо “Толибон” раҳбариятининг расмий Кобул билан келишилмаган ҳолда Тошкентга таклиф этилиши Ўзбекистон раҳбарияти ташқи сиёсат масаласида ҳали хом эканини намойиш этади. Чунки Афғонистонда тинчликка эришиш мазкур мамлакат раҳбарияти иштирокисиз мумкин эмас. 

Юқорида айтилганидек, Абдусалом Азизовнинг Покистонга ташрифидан қандай мақсад кўзлангани масаласи ОАВда очиқ қолдирилди.

“Аслида бу ташрифнинг Ўзбекистон учун аҳамияти катта. Аввало, Покистон воситачилигида “Толибон” раҳбариятини Тошкентда тинчлик музокаралари ўтказишга кўндиришда олға қадам ташланди. Энди кеч бўлса-да, бу музокараларда расмий Кобулнинг иштирокини таъминлашга келишилади”, дейди таҳлилчи Ўрозбой Абдуллаев “Элтуз” билан суҳбатда. 

Унинг таъкидлашича, Суриядан ўзбек жангариларининг оилалари қайтарилиши ортидан Покистондан қўним топган ўзбекистонлик оилаларни қайтариш масаласини муҳокама қилиш ҳам муҳокама қилинган бўлиши мумкин. Чунки бу мамлакатда Ўзбекистон исломий ҳаракати жангариларининг оилалари жуда кўп ва уларнинг ватанга қайтарилиши мамлакат имижига ва ЎИҲга қарши курашга ижобий таъсир этади. 

Яна бир масала, таҳлилчининг сўзларига кўра, ЎИҲ ҳақида қўшимча разведка маълумотлари алмашишдир. Зеро, сўнгги вақтларда ЎИҲ жангарилари ИШИД билан биргаликда ҳаракат қилмоқда. Бу эса Ўзбекистон хавфсизлигига таҳдидни кучайтиради. 

Бундан ташқари, Сурияда ИШИД сафларида жанг қилган ўзбек жангарилари Покистон орқали Афғонистонга ўтмоқда. 

“Ўзбекистон Покистон ёрдамида бу кўчишнинг олдини олишга ҳаракат қилиши табиий. Чунки сўнгги вақтларда кучсизланиб қолган ЎИҲ янги жангарилар ҳисобига кучайиши турган гап. Бунга ҳозирдан қарши туриш Ўзбекистон учун фойдадан холи бўлмади”, дейди Ўрозбой Абдуллаев “Элтуз” билан суҳбатда. 

“Элтуз”нинг Ўзбекистондаги ҳамкори
Eltuz.com

Тағин ўқинг
3 май 2018
Олий Мажлис Қонунчилик палатасида Ўзбекистон парламенти тарихидаги илк ҳукумат соати ҳукумат аъзоларисиз ўтказилди. “Ўзбекистон Республикаси Олий Мажлиси Қонунчилик палатасининг ...
3 июн 2019
Андижонда 25 май куни эълон қилинган шанбалик 29 май куни ҳам давом этди. Марҳамат тумани электр тармоқлари корхонаси ишчисининг ...
7 апрел 2017
Эркакларнинг доялик қилишини “шармандалик” дея атаган 42 ёшли тошкентлик имом хатиб Раҳматуллоҳ Сайфутдинов чақириғи ортидан вазирликка шикоят қилган Фарида ...
12 апрел 2017
2017 йил 12 апрел куни Ўзбекистон Республикаси Конституциявий суди раисининг ўринбосари 68 яшар Бўритош Мустафоев юрак касаллиги боис юзага ...
Блоглар
2 июл 2020
6-синфда ўқирдим, Кампучияда давлат тўнтариши бўлиб ҳукуматга Пол Пот раҳбарлигидаги “Қизил кхмерлар” келганини, улар бутун ...
25 июн 2020
​​Халқаро пресс-клубда матбуот анжумани бўлиб ўтибди, унда Инсон ҳуқуқлари бўйича Миллий марказ директори Акмал Саидов ...
21 июн 2020
(бўлган воқеа) Таржимон сифатида Россиянинг милиция бўлимларидан бирига чақиришган эди. Бўлимда жиноятчи сифатида гумон қилинган ...