Ўзгаришлар эҳтиёжи

Қудрат Бобожон
Eltuz.com

Мамлакат қонуни, оддий водопровод жўмраги, ёки халқ қўлидаги шиор бўлсин, ҳаммаси ўзгаришга муҳтож. Аксинча уларни моғор босади. Бу тараққиётнинг эски қоидаси. Бусиз ривожланиш ҳам йўқ.

Тажрибамда шу нарсага амин бўлдимки агар одам, жумладан миллат ҳеч нарса яратмас, фақат борини ейишда давом этаркан, у кўп нарсадан маҳрум бўлади. Бунинг нуқси бошқаларга ҳам юқади.

Бу ҳасадни агар миллат миқёсига ёйсангиз, янада фожиалироқ…

Албатта бой бўлиш камбағал бўлишдан афзал, айниқса яратувчан одам учун. Ҳеч нарса яратмайдиган одам, фикримча, аста секин мавжуд эски нарсаларнинг бандасига айланади.

Айни нарсаларни пул ва ришват эвазига қўлга киритади. Мамлакатда коррупция авж олади. Юқорининг амри билан, бу нарсалар энди сеники, соққасини олиб яна кимнидир ўзингга тенг шерик қилишинг ҳам мумкин.

Билимсиз билимлиларга йўл бермайди. Улар шароитга мослашишга мажбур. Баҳиллик кучаяди. Менинг шунча билимим бор, фалончи эса дипломини пулга олиб, элга ҳоким бўлди… балки унга пора берсам мени бирор ишга қўяр.

Оддий ўғирлик — пора билан жазодан қутилиш мумкин бўлган мамлакатда яшашнинг энг осон усули. Бировнинг томини теш, киссавурлик қил, ўлдир, милиция сенга шерик. Уларга қонун йўқ, чунки дипломини пулга олган ҳуқуқшуносларда буни ёзишга уқув ҳам йўқ.

Уйингда газ, сув йўқми, ўғринча қувурга улан. Газчи келса ҳақини олади кетади. Пулинг бўлмаса текинга яша.

Тоқатсизлик ривож. Норозилар тилини тийдириш чораси ҳам бор. Нега қизинг рўмол ўрайди, ёки нима ҳақинг бор очиқ-сочиқ юришга, бу ер сенга Робинзон ороли эмас, демократия қилгани!

Водопровод қувуридан оқаётган итбалиқ аралаш сув ичаётган халқ муаммосига бу гапларнинг нима даҳли бор, дея ўйлаганмисиз?

Сув идораси ходимлари саводсиз бўлмаса, муаммони ҳал қилган, айбини пора билан ҳал қилишига кўзи етмаган қўшнингиз эса қувурини ўғринча улашга юраги бетламаган бўлмасмиди?

Доира ёпилди. Бироқ бир нарсани айтмадим. Яратишдан, қуришдан аввал майдон эски нарсалардан тозаланиши, демак юқорида ўтирган президент ва унинг аймоқлари ўринларини бўшатишлари лозим.

Қолган ҳаммаси сизнинг қўлингизда.