Пенсионерлар ҳақини талаб қилгани учун…

Навоийлик ногирон ва икки фарзандини ёлғиз тарбиялаётган Боймуродова Дилдора пенсионерлар ҳақини талаб қилиб норозилик акциясида қатнашгани учун жазога тортилди.

Унинг билдиришича, туман пенсионерлари сентябр-октябрь нафақаларини ололмаганлиги сабаб, катта трасса йўлини тўсиб қўйиб, норозилик билдиришган.

Мактубида у, 90 ёшли саводсиз бир кекса аёл Самиева М.нинг ишончли вакили сифатида қатнашгани, воқеага аралашмай четда тургани, шунингдек, кўча акцияси иштирокчиларига ҳеч бир жазо қўлланилмаганини билдиради.

Бироқ кучишлатар тизими ходимлари биргина уни “жазога тортишган” – унга 7 миллион 104 минг сўм жарима солишган.

Уч йилдан буён ишсиз қолаётгани боис, фарзандлари 12 йиллик мажбурий таълим олиш ҳуқуқидан ҳам маҳрум қолаётган аёлга нисбатан бу бедодлик “Ўлганнинг устига тепган бўлди!” дея ёзади Дилдора ўзининг ҳукумат рахбарларига ёзган хатида.

Жабрдийданинг билдиришича, унинг ўнлаб идораларга ёзган шикоятлари ҳамон жавобсиз қолмоқда.

Эндиликда эса суд қарори билан ҳар ойда ногиронлик нафақасининг ярми – 226 минг сўм жаримани қоплаш учун уриб қолинади.

“Наҳот инсон қадр-қиммати шу қадар ерга урилган бўлса мамлакатимизда?”, дея нола қилади аёл президентга мурожаатида.

Eltuz.com