Қовоқ ҳақига мадҳия тўқиш бошланди

«XXI аср» газетаси Ўзбекистон президентининг «ўз вақтида қабул қилинган» «Мева-сабзавот, картошка ва полиз маҳсулотларини харид қилиш ва улардан фойдаланиш тизимини такомиллаштириш чора-тадбирлари тўғрисида»ги қарори аҳамиятини тушунтиришга зўр бермоқда.

Газетада Ўзбекистонда мева-сабзавот ва полиз етиштириш беқиёс фойда келтириши илгаридан маълум бўлса-да, президент мустақилликнинг йигирма бешинчи йилига келибгина буни англаб етгани сабаблари очиқланмайди.

Бунинг ўрнига, газета фермер ва тадбиркорлар «бу қарорнинг истиқболли аҳамиятга эга эканидан руҳланаётгани»ни таъкидлайди.

Эсингизда бўлса, сал аввалроқ бош вазир барча фермерларни қовоқ экишга мажбурлаш кампаниясини бошлаб юборгани ҳақида хабарлар пайдо бўлганди. Ҳатто корхона ва ташкилотлар ишчилари фермерларга бу ишда «ёрдам бериш»га жўнатилганди.

Шунинг учун бўлса керак, мақолада қовоқ етиштириш масаласига ҳам катта эътибор қаратилган. Журналистга интервью берган фермер эса қовоқнинг аҳамиятию фойдаси ҳақида тўлиб-тошиб гапиради.

«…Ўзбекистонда ётиштирилган қовоқ жаҳон бозорида тобора харидоргир бўлиб бормоқда. Бир сўз билан айтганда, ҳужжат (яъни президент қарори) қовоқни ҳам катта миқдорда экспорт қилиш имконини беради», дея хулоса қилинади газетада.

Eltuz.com