Асосий мавзулар
11 октябр 2016

Чиқиш визасига қарши петиция эълон қилинди

“Ўзбекистонда чиқиш визасини бекор қилишга даъват” дея номланиб, ўзбек, рус ва инглиз тилларида Сhange.org ижтимоий тармоғида эълон қилинган петиция, Ўзбекистон бош вазири ва муваққат президент Шавкат Миромонович номига уни имзолаган гуруҳ томонидан ёзилган.

Ўзбекистон ҳукуматидан Чиқиш визаси тизимини бекор қилиш ҳақида қарор қабул қилинишини талаб қилаётган петиция муаллифлари, бу тизим халқаро меъёрларга жавоб бермаслигига эътибор қаратишади.

Айни виза тизимининг, сафар қилиш, саёҳатга бориш, юриш ва кўчиш эркинлиги тамойилига зид, қолаверса порахўрликнинг кенгайишига ҳам сабаб бўлаётгани урғуланади.

Петиция ташаббускорларига кўра, дунёнинг деярли бошқа ҳеч бир давлатида, жумладан мамлакатга қўшни бўлган давлатларда ҳам бундай тизим йўқ, бундай амалиёт фақат Ўзбекистонда ва Шимолий Кореядагина қолган.

rasm1957
Ўзбек фаоли Баҳодир Намозовга Ички Ишлар томонидан берилган визани рад қилиш хати

Ўзбекистондаги «Чиқиш визаси» тизими қонунга бўйсунувчи фуқароларнинг мамлакатдан чиқиш ҳуқуқини чеклайди, дейди Умида Ниёзова, Германияда жойлашган Ўзбек Герман Форум ҳуқуқ ҳимоя ташкилоти рахбари.

Унинг сўзларига кўра, мамлакатдан чиқиш тақиқини кўплаб ўзбек фаоллари “чет элга вақтинча чиқиши мақсадга мувофиқ эмас” деган, қонунчиликда кўрсатилмаган мантиқсиз писанда билан олишган.

“Айрим фуқаролар тоифаси борки, уларнинг мамлакатдан чиқиши чекланади. Улар давлат сирига доҳил шахслар, устидан жиноий иш очилган ёки суд қарорига кўра милиция назоратида туриши лозим бўлган, ҳарбий хизматга чақирилган ёки суд ажримини олган шахслар бўлиши мумкин. Бироқ, ҳар бир шахсдан чиқиш рухсати олишни талаб қилиш ўзини ҳеч оқламайди”, дейди у.

БМТ Инсон ҳуқуқлари қўмитаси ўз ҳисоботида 2013 йили Ўзбекистонни чиқиш визаси тизимини бекор қилишга чақирди.

Мазкур ҳужжатда таъкидланишича, чиқиш визаси МХХ томонидан ўз нуқтаи назарини айтишдан қўрқмайдиган шахсларга нисбатан жазо чораси сифатида қўлланиб келинади.

Умида Ниёзованинг тағин таъкидлашича, Ўзбекистонда Милиция ва МХХ, чиқиш визаси сақланишидан манфаатдор, чунки бу чиқишга рухсат сўровчилардан пул таъма қилишнинг қулай имконидир.

“Яна бир муҳим жиҳатни таъкидлаш жоиз. Ўзбекистон ҳукумати чиқиш визасини оқлаш учун, бошқа мамлакатларда ҳорижий паспорт жорий эканини писанда қилади. Ҳақиқатан ҳам, мамлакатни тарк этиш учун фуқароларга паспорт берилади, шунингдек, бу уларнинг самолетга чипта олишлари учун ҳам керак, бироқ бу жараён руҳсат олишни англатмайди.

Яъни нормал мамлакатларда, биз сенга паспорт бермаймиз, чунки сизнинг “чиқишингиз мақсадга мувофиқ эмас” дейилмайди. Ҳар бир инсондан душман қидириладиган Ўзбекистондаги чиқиш виза тизимининг қабиҳ иллати ҳам ана шунда”, дея фикр билдиради Умида Ниёзова.

Ўзбекистонда чиқиш визасини бекор қилиш петициясини ушбу линк орқали имзолашингиз мумкин: Ўзбекистонда чиқиш визасини бекор қилишга даъват

Eltuz.com

Тағин ўқинг
27 ноябр 2017
Бош прокуратура ҳузуридаги департамент “Шаршара” савдо белгиси остидаги колбасалар эшак гўшти қўшилган ҳолда савдога чиқарилишининг олдини олганини маълум қилди. ...
3 октябр 2015
Бугун Термиз шаҳрида соат 10-30 атрофида, вахима Президент Ислом Каримов келяпди деб, толиблардан қўрққан ИИБ ходимлари бутун Термиз шаҳрини ...
19 март 2019
Қозоғистонни 30 йил бошқарган 79 яшар президент Нурсултон Назарбоев 19 март куни ўз лавозимидан истеъфога чиққани ҳақида баёнот берди. ...
Блоглар
26 июн 2019
Ниҳоят 23 июнь куни Истанбул шаҳри ҳокимлиги учун қайта сайлов бўлиб ўтди. Истанбул шаҳри ҳокимлиги ...
3 июн 2019
28 май куни Тошкентда ўтган конференцияда президентнинг тўнғич қизи Саида Мирзиёева маҳаллий оммавий ахборот воситаларининг ...
23 май 2019
Лас-Вегас – гуноҳлар шаҳри. Аҳолиси ярим миллион, даромади казино ва қимордан келадиган бу шаҳарда бир ...