Хоразм. Ўқитувчи ва шифокорлар асосий теримчиларга айланишди

Хоразм вилоятида оммавий пахта терими 10 сентябрдан бошлаб юборилган. Вилоятдаги “Нажот” Инсон ҳуқуқлари ташкилоти тарқатган хабарга кўра, пахта теримига асосан тиббиёт масканлари ва таълим муассасаси ходимлари, турли давлат бюджетидаги корхона ва ташкилотиларнинг вакиллари мажбурий равишда жалб қилинган.

“Уларнинг ҳар бирига “Мен пахта теримига ўз ихтиёрим билан ҳашарга ёрдам бериш мақсадида чиқаяпман” деган маънодаги тилхат ёздириб олинмоқда”, дея ёзади “Нажот” ташкилоти рахбари Ҳайитбой Ёқубов 17 сентябрда тарқатган хабарида.

Шунингдек у, ҳар куни кечаси бўладиган ҳокимлик мажлисларида, терим кампаниясини уддаламаган раҳбарларни ишдан бўшатиш таҳдидлари янграётгани, улар “ҳамманинг олдида турғазиб қўйилиб” изза қилинаётганини, билдиради.

“Нажот” ташкилоти, терим кампанияси даврида, Хива туманидаги “Янгиобод” шаҳарчаси маҳалла раислари Озиқ-овқат дўконларини беркитиб қўйишгани, Янгиарик, Боғот, Хонқа ва Хазорасп туманларида теримчилар 15 кунлик пулларини олишолмаётгани, 8-10 км узоқликдаги далага теримчилар пиёда қатнашаётгани, сифатсиз ичимлик суви билан боғлиқ шикоятлар келиб тушганини қайд этган.

Эслатиб ўтамиз, Ўзбекистон республикаси бандлик ва меҳнат муносабатлари вазирлиги матбуот хизмати Вазирлар Маҳкамасининг шу йил 8 август қароридан иқтибос келтириб: «2017 йилги пахта йиғим-теримига вояга етмаган ёшлар, шу жумладан, ташкилотлар, соғлиқни сақлаш ва маориф тизими ходимларини жалб қилиш мутлақ тақиқланади» дея баёнот берган эди.

Eltuz.com