Аҳмадбойга 13 йил берилди

Молиявий пирамида яратган чинозлик тадбиркор, 40 ёшли Аҳмад Турсунбоев 13 йилга ҳукм этилди. Амнистия қўлланиб, жазо тўртдан бирга қисқартирилди.

Шунингдек, Турсунбоев бир йилга тадбиркорлик билан шуғулланиш ҳуқуқидан маҳрум этилиб, унга тағин 52 миллион 96 минг сўм жарима жазоси тайинланди.

16 февраль куни жиноят ишлари бўйича Тошкент вилояти судида унга сўнгги сўзни айтиш имкони берилганди.

«Мен фуқароларни алдамаганман. Одамлар ўз хоҳишлари билан пулларни олиб келган. Мен деҳқончилик, қассоблик ва чорва билан шуғулланганман. Мен ҳеч қачон халқни алдамаганман, бировнинг ҳақини емаганман. Шу ёшимгача ҳеч қачон инсонларни алдамаганман», деди Аҳмадбой суддаги сўнгги сўзида.

Чиноз «Авто Ҳамкор» ширкати раҳбари Аҳмад Турсунбоев устидан Ўзбекистон Жиноят Кодексининг 165-моддаси (товламачилик), 168-моддаси (фирибгарлик) ва 170-моддаси (алдаш ёки ишончни суиистеъмол қилиш йўли билан мулкий зарар етказиш)бўйича жиноят иши очилган.

Шунингдек, Турсунбоев 177-модда – валютани қонунга хилоф равишда олиш ва 178-модда – чет эл валютасини яшириш бўйича ҳам айбланмоқда.

Молиявий пирамида яратганликда айбланаётган Аҳмадбой 2016 йилнинг июнь ойи ўрталарида қамалган, унинг уйидан 13 миллиард сўм ва 12 миллион АҚШ доллари чиққан эди.

Eltuz.com