Асосий мавзулар
4 феврал 2019

Бош вазирдан улги олган ҳоким

Тадбиркорликни ҳимоя қилиш шиорини кўтариб олган амалдорлар аслида ишбилармонларнинг саъй-ҳаракатларига энг катта тўсиқ бўлиб қолаётир.

Хоразмда ўзи хон, кўланкаси майдон ҳокимдан жабр чеккан навбатдаги бизнесмен туризмни ривожлантириш борасидаги баландпарвоз сиёсатга ишонган тадбиркор бўлди.

“Хоразм беклари” МЧЖ томонидан Урганч шаҳрида барча расмиятчиликлари адо этилган, яъни тегишли ҳужжатлар асосида қурилаётган меҳмонхона шаҳарнинг янги ҳокими буйруғи билан бузиб ташланди.

Kun.uz сайтининг ёзишича, тадбиркор бу лойиҳа учун банкдан 6,5 миллиард сўм кредит олган. Иморат бузилгунга қадар кредит маблағларидан 4 миллиард сўмга яқинини, ўз маблағидан 1 миллиард сўмдан ортиғини сарфлаган.

Шунча меҳнат, маблағ, қанчадан қанча асаблар сарфланган иш ҳокимнинг бир оғиз топшириғи билан йўққа чиқди.

Шаҳар ҳокими Шуҳрат Абдуллаев “лойиҳа вилоят ҳокими тасдиғидан ўтмагани, эски ҳоким ерни бериб юборгани”ни баҳона қилиб, бузғунчиликка бош бўлди.

Энг афсусланарлиси, судсиз, сўровсиз, тегишли ҳужжатларсиз, бор-йўғи бир амалдорларнинг оғзаки буйруғи билан қилинаётган бундай ишлар Ўзбекистон учун бегона эмас.

Ўтган йил ноябрда Тошкентда “Unique arh project” ширкати томонидан қурилган турар жой биноси бош вазирнинг худди шундай оғзаки топшириғи билан бузиб ташланган эди.

Шу кунларда Янгибозор турбазасини Миллий гвардия манфаати йўлида тортиб олиш ҳаракатлари давом этмоқда. Ҳолбуки, бу тузилма учун янги, замонавий объектни шу атрофдан қуриш учун барча шароитлар бор.

Урганчнинг ҳокими ҳам бузғунчилик борасида кимдан улги олганини кўряпсизми? Ҳаммаси тепадагилардан намуна олиб қилиняпти.

Энг ёмони, шов-шув кўтарилиб, ноқонуний иш қилгани ойдинлашган ҳокимлар тадбиркорларга етказилган зарарни давлат ҳисобидан қоплаш (агар қопланса) ваъдасини беришмоқда.

Урганчдаги битай деб қолган меҳмонхонани бузган ҳоким ҳам “тадбиркорнинг ери, банкдан олган кредити ва зарарини қоплаш масалалари кўриб чиқилади”, деганда тадбиркорнинг зарарини давлат ҳисобидан, яъни сизу бизнинг чўнтагимиздан тўлашга ишора қилаётгани кўриниб турибди.

Шу ўринда савол туғилади? Битта амалдорнинг гап-сўзи билан ноқонуний бузилаётган бундай бинолар товонини нега ўша мансабдор эмас, балки давлат тўлаши керак?

Ахир қонун бузилдими, унга жавоб бериш ҳам ўша қонунбузар зиммасида бўлиши керак эмасми?

Нега уларнинг аҳмоқликлари учун давлат бюджети зарар кўриши керак?

Шунинг учун тадбиркорлик ҳимояси ҳақида баландпарвоз ваъдалар қилаётган ҳукуматга битта таклиф.

Қонуний қурилишни ноқонуний равишда бузаётганларнинг бир-иккитаси етказилган зарарни ўз ҳисобидан қоплашига эришиш зарур. Яъни ноқонуний хатти-ҳаракат учун қонунан жазо қўллансин.

Ўшанда ҳукуматнинг сиёсатига ишонч ортиши билан бирга, ўзини қонундан устун кўрадиган амалдорларнинг эси кирармиди!

Баҳодир Шариф
Eltuz.com

Тағин ўқинг
6 июл 2016
30 июнда Сурхандарё вилояти Термиз туманида маҳаллий деҳқон-фермерлар билан учрашуви чоғида Ўзбекистон президенти Шанхай Ҳамкорлик Ташкилоти саммитида Хоразм лазгиси янграганда ...
11 декабр 2017
9 декабрдан Тошкент шаҳридаги умумий овқатланиш шохобчаларини табиий газ тармоғидан бутунлай узиш бошланди. Газ идораси назоратчилари кафема-кафе юриб, уларнинг ...
22 ноябр 2016
Шундай иштиёқни билдирганлар орасида 68 яшар фарғоналик фермер, 63 яшар хоразмлик пенсионер, андижонлик новвой бор. Жумладан, фарғоналик кекса фермер ...
25 декабр 2018
Ўзбекистонда импорт ҳажми экспортга нисбатан давомий равишда ортиб бораётгани қисқа ва ўрта истиқболда мамлакат ташқи қарзларининг кескин кўпайишига олиб ...
Блоглар
7 октябр 2019
Мен 10 кунлик қамоқдан уйга келган заҳотим интервью берганимда Шабнамнинг тақдиридан мутлақо бехабар эдим. Менинг ...
7 октябр 2019
Мажбуран руҳий касалликлар шифохонасига ётқизилган хоразмлик блогер Нафосат (Шабнам) Оллошукурованинг отаси Болтабой Оллошукуров қизининг соғлом ...
6 октябр 2019
Руҳий соғлом Нафосат Оллошукурова руҳий касаллар шифохонасида. У ёшлигидан меҳрибон қиз бўлиб ўсди. Атрофдаги ноҳақликларни ...