Дайжест
25 январ 2016

Қўшиқчига эшикочар бўлган сенатор ëки турма бошлиғи нега пора олди?

Қамоқхона бошлиғи ўринбосари порахўр бўлиб чиқди

“Ҳуқуқ” газетасининг ёзишича, Навоий вилоятидаги жазони ижро этиш муассасаси бошлиғининг умумий масалалар бўйича ўринбосари фермердан 5 миллион сўм пора олаётганда қўлга тушди.

Маълум бўлишича, шу вилоятнинг Қизилтепа туманидаги фермер хўжаликларидан бири қамоқхонага қишлоқ хўжалиги маҳсулотлари етказиб берган.
Қамоқхона бошлиғи ўринбосари етказиб берилган маҳсулотлар пулини тўлаб бериш ва ўзаро ҳамкорлик шартномасини узайтириш учун пора талаб қилган.

Таъмагир мансабдор 8 йил муддатга озодликдан маҳрум этилган.

Ўқишга киритувчилар 2 тага камайди

“Куч–адолатда” газетаси Сурхондарёда абитуриентларни пул эвазига ўқишга киритиш билан шуғулланган икки аёл жазога тортилганини маълум қилди.

Айтишилича, бу аёллар бир шахсдан ўғлини ўқишга киритиб қўйишни ваъда қилиб 6 миллион сўм, яна бир қизнинг отасидан 12 миллион 750 сўм пул олган. Аммо ваъда бажарилмаган.

Демак Ўзбекистонда ҳар йили абитуриентларни олий ўқув юртларига киритиб қўювчилар сони икки кишига камайди, деб хулоса қилсак бўлади.

Судлан(ма)ганлик маълумотномаси олишга талабгорлар бисёр

“Адолат” газетаси “my.gov.uz” ягона интерактив давлат хизматлари порталининг 2015 йилги фаолиятига доир мақола эълон қилди.

Мақолада билдирилишича, 2015 йил якунига қадар ягона порталга 391 881 та мурожаат келиб тушган. Уларнинг 60 фоизи юридик шахслар, 40 фоизи эса жисмоний шахсларнинг мурожаатларидир.

Газета “Судланганлик (ёки судланмаганлик) тўғрисидаги маълумотларни бериш” энг оммабоп интерактив хизматлар сирасига кирганини ёзган.

Сон-саноқсиз валютафурушлардан учтаси қўлга тушди

“Ҳуқуқ” газетасининг яна ёзишича, “Қатортол” савдо мажмуаси ҳудудида валюта савдоси билан ноқонуний шуғулланиб келган уч шахс СВОЖЖДЛҚК (солиқ ва валютага оид жиноятлар ва жиноий даромадларни легаллаштиришга қарши курашиш) департаменти ходимлари томонидан қўлга олинган. Улардан катта миқдордаги хорижий ва миллий валюта олиб қўйилган.

Шунингдек, айбдорларга тегишли бўлган “Ласетти” ва “Матиз” русумли автомобиллар ҳам давлат эгалигига ўтказилган.

Тошкентнинг деярли барча нуқталарида очиқ-ойдин фаолият кўрсатаётган бошқа сон-саноқсиз валютафурушларни ушлаш учун “криша”лардан рухсат тегмаяптимикин?

Хонандалар ТВга Иқбол Мирзонинг рухсати билан чиқади

“Тасвир” газетаси эстрада соҳаси вакилларининг рейтинг даражасини раиси шоир Иқбол Мирзо бўлган Миллий эстрада санъатини ривожлантириш ва мувофиқлаштириш кенгаши қошидаги Ижодий кўмаклашувчи вакиллар гуруҳи белгилашини маълум қилди.

Газетанинг ёзишича, лицензия талабгори бўлган хонанда кенгашга мурожаат билан келганда жонли куйлай олиши керак. Телевидениеда чиқиши учун унга 4 та рейтинг гуруҳи берилади. 1 дан 4 гача бўлган рейтинг гуруҳи концерт-томоша фаолияти кўрсатиш, шу жумладан, телевидениега чиқиш ҳуқуқини беради. 5-6 рейтинг гуруҳи эса фақат тўй, ресторан ва кафеларда аҳолига хизмат кўрсатиш ҳуқуқини беради, холос.

Денис Истомин ҳалол ўйнамайдими?

“Кун.уз” интернет нашрининг ёзишича, келишилган ўйинларда иштирок этишда гумонланаётган теннисчилар рўйхатида Ўзбекистоннинг биринчи ракеткаси Денис Истоминнинг ҳам номи бор.

Ушбу рўйхатга киритилган 16 теннисчидан бири бўлган Д.Истомин айни пайтда давом этаётган Австралия очиқ чемпионатининг ҳам яккалик, ҳам жуфтлик баҳсларида иштирок этиб, биринчи даврадаёқ мусобақани тарк этган.

Давлат ижтимоий тармоқлар ишини назорат қила олмаётганидан аламдами?

Sputnik интернет нашри “Камолот” ёшлар ижтимоий ҳаракати Telegram, Facebook и «Одноклассники» каби ижтимоий тармоқлар ишини чегаралаш таклифини тайёрлаётганига оид хабарлар боис, соҳа экспертининг фикрини ўрганди.

Эксперт мессенжерлар билан боғлиқ таҳдидлар ҳақидаги гап-сўзлар, биринчи навбатда, давлат уларни назорат қила олмаслиги сабабли келиб чиқаётганини айтган.

Унинг билдиришича, ижтимоий тармоқлар ишига таъсир ўтказишнинг ягона йўли интернет ёки мобил алоқани ўчиришдир.
“Ҳамма нарсани кутса бўлади, аммо Ўзбекистон Шимолий Кореяга айланмаса керак”, дейди эксперт.

Eltuz.com

Тағин ўқинг
6 ноябр 2016
Шанба эрталаб жони узилган Абдулла Ориповнинг жанозаси ўша куниинг ўзидаëқ Хюстон шаҳридаги масжидда ўқилган. Eltuz.com манбасига кўра АҚШдаги Ўзбекистон ...
23 декабр 2016
Ўзбекистондаги интернет сайтлари шу вақтгача тилга олинмаган муаммоларни ёритиб, ёзма нашрларга қараганда анча «довюраклашиб» бораётгандек таассурот қолдирмоқда. Хусусан, Kun.uz ...
2 октябр 2017
Ўтган ҳафта охирида Рус патриархи Кириллнинг Ўзбекистон бўйлаб сафари бошланди, шунингдек Тошкентда Россиянинг янги ароқ заводи қурилиши ҳақидаги хабарлар ...
19 декабр 2016
Анқарадаги замонавий санъат галереясида рус фотосуратчиларининг «Россия турклар нигоҳида» кўргазмасининг очилиш маросимида ваъз ўқиëтган Россиянинг Туркиядаги элчиси Андрей Карлов ...
Блоглар
22 октябр 2021
Ўғил неварасини қўрқитиб, мунтазам зўрлаган тошкентлик амаки ҳақида видео тарқалди. Бу амаки «ножўя жинсий ҳаракат ...
18 октябр 2021
(Таниқли шоир ва сиёсатчи Муҳаммад Солиҳнинг “Императив” китобидан 36-қисм. Аудиокитоб матнини муаллифнинг ўзи ўқиган. Давоми ...
14 октябр 2021
Дастлаб большевиклар Ёш бухороликлар, жадидларнинг коммунистик партияга қўшилган аъзоларидан иборат Бухоро Халқ Совет Республикасини туздилар.  ...