«O‘likning tabrigi-2»

Bugun 31 avgust kuni O‘zA axborot agentligi saytida paydo bo‘lgan, prezident Islom Karimov nomidan yo‘llangan tabrik allaqachon g‘oyib bo‘ldi.

«Prezident Islom Karimov O‘zbekiston xalqiga bayram tabrigini yo‘lladi» deyiladi, soat 13.14 da paydo bo‘lgan, uni ko‘chirib bosgan va tezgina olib tashlangan «Darakchi» saytidagi tabrik matni tabrik indallosida.

Tabrikning to‘liq matni esa O‘zA axborot agentligi saytida ekanligi iqtibos qilinadi.

Ayni paytda prezidentning ahvoli hamon noma'lumligicha qolmoqda, boshsiz qolgan mamlakat hukumati o‘zining gilam osti harakatlari haqida xalqqa hech bir ma'lumot sizdirmayapti.

Biroq, yuqoridagi kabi holat kishini sergaklantiradi va beixtiyor salkam bir yil burun yangi yil arafasidagi g‘aroyib holatni esga soladi.

Prezident bayram tabriklarini o‘zi o‘qimasligi, uni boshqalar yozishi va tag‘in boshqalar o‘qib berishi ko‘pchilikka sir emas…

2015 yil 31 dekabr kuni ham huddi shunday bo‘ldi, biroq tabrikni o‘qigan O‘zTV diktori Abdumo‘min O‘tbosarov, tabrik videotasviri efirga ketayotganida allaqachon o‘lib bo‘lgan edi.

Eltuz manbalariga ko‘ra, O‘tbosarov prezidentning tabrigini 30 dekabr kuni o‘qigan 31 dekabr kuni taxminan kunduzgi soat 11 larda kasalxonaga olib kelingan va o‘sha yerda infarktdan jon bergan.

Bor gap shu. “O‘likning tabrigi” degan jumlani ilk bora 1999 yili men Bosh muxarrir bo‘lgan Urganchdagi Ey El Si telekompaniyasi xodimi Nigora Abdullaevadan eshituvdim.

Reklama ishlariga bosh qosh bo‘lgan Nigora o‘sha kuni olamdan o‘tgan mahalliy deputat o‘limi haqidagi xabarni efir setkasiga joylashtirar ekan “O‘likning tabrigi” degan jumlani ishlatdi. Zotan efir setkasidagi “Tabriklar” degan joyga ilk bor ta'ziya e'loni qo‘yilayotgan edi.

Taqdirning hazili bilan, na o‘lik, na tirikligi aytilayotgan prezidentning navbatdagi tabrigi qisqa muddat bo‘lsada omma ko‘ziga chalindi va tezgina olib tashlandi, biroq undan bir skrinshot qoldi, shuni siz bilan baham ko‘ramiz.

Qudrat Bobojon
Eltuz.com