Virtual qabulxonaga murojaat ish bermadi, fuqaroning uyi buzildi

«XXI asr» gazetasi (08.12) bosh vazirning virtual qabulxonasiga kelayotgan murojaatlarga oid navbatdagi maqolani e'lon qildi.

«Murojaatlar haqqoniy bo‘lsa..» sarlavhali maqolada dastlab Taxtako‘pir tumanilik Roza Kaipovaning virtual qabulxonaga murojaatiga e'tibor qaratiladi. Ushbu murojaatda R.Kaipova bemorlarga noto‘g‘ri tashxis qo‘ygani uchun muqaddam uch marta sudlangan, hatto mudhish xatosi tufayli shikoyatchining eri o‘limiga sababchi bo‘lgan shifokor amnistiya aktiga ko‘ra ozodlikka chiqarilgandan so‘ng yana o‘z ishida ishlayotganidan arz etgan.

Bu murojaat asosida noshud shifokor ishdan bo‘shatilgani ortidan shikoyatchi bosh vazirga tashakkurnoma yozgan.

Yana bir murojaatchi esa bosh vazirga ish haqini ololmayotganidan shikoyat qilganidan so‘ng maoshi olib berilgani bildiriladi. Albatta, gazeta oylar davomida ish haqini ololmayotgan katta-katta mehnat jamoalari ham borligini esga olmagan.

Ishtixonlik fuqaro esa bosh vazirga o‘g‘lining uy-joyi buzib tashlanayotganidan shikoyat etgan.

«O‘rganish jarayonida uy-joy aslida fermer xo‘jaligiga tegishli yerda noqonuniy qurilgani, bir necha bor tushuntirish berilganiga qaramay, fuqaro uni o‘z ixtiyori bilan buzmagani sababli uy sud qarori bilan buzilib, bu haqda dalolatnoma tuzildi», deyiladi gazetada.

Gazeta virtual qabulxonaga murojaat qilayotganlarning hammasi ham jabrlanuvchi emasligini bildirib, bu «joylarda sekin-asta adolat tarozisi tenglashayotganidan dalolat beryapti», deya xulosa qiladi.

Bahodir Sharif
O‘zbekistonlik gazetxon tahallusi
Eltuz.com