Fermerlar nega ishlamayapti?

Prezidentning topshirig‘iga labbay deb javob berayotgan partiyalar deputatlari shu kunlarda tumanma-tuman chopib yuribdi. Bu partiyalarning nashrlari ham mazkur safarlar haqidagi hisobotlarni peshma-pesh o‘quvchiga yetkazib yotibdi.

Xususan, «Adolat» gazetasi shu nomdagi partiyaning parlamentdagi fraktsiyasi rahbari Qumqo‘rg‘on tumanida bo‘lib, aholining muammolarini o‘rganib kelgani haqida yozar ekan,»Kamchiliklar o‘rganildi, navbat amaliy ishga», deya e'lon qildi.

Maqolada senator va deputatlarning qanchalik faol ishlayotganini ko‘rsatishga ishora beradigan raqamlar to‘lib yotibdi. Ular yechimini topib bergan ba'zi muammolarni o‘qir ekansiz, kulishni ham, kuyishni ham bilmaysiz.

To‘g‘ri, baraka topgurlar tumandagi 417 ta xonadonda bo‘lib, tadbirkorlar bilan uchrashuvlar o‘tkazgan, ta'lim, kredit kabi ayrim sohalardagi kamchiliklarni bartaraf etgan.

Lekin gazeta tushmagur bir guruh senator va deputatlarning qilgan amaliy yordamlariga keltirgan misollari bilan ularni sal kulgiga qo‘ygani yaxshi bo‘lmagan.

Ya'nikim, senator va deputatlar Surxon mahallasi hududidan o‘tgan 300 metrdan ziyod eskirgan elektr simi tuman elektr tarmoqlari korxonasi tomonidan almashtirilishiga erishibdi.

Shunday nufuzli xalq vakillarining qilgan ishlarini arzimagan misol bilan ko‘rsatib, ularning xizmatlarini yerga urish shartmikin, deb o‘ylanib qoladi odam.

Maqolada ayrim raqamlar ham keltirilganki, ular tumandagi ahvol ancha nochor ekanidan darak beradi.

Xususan, tumanda 938 ta korxonadan 128 tasi yoki 14 foizi faoliyat ko‘rsatmayapti. Fermer xo‘jaliklari bo‘yicha vaziyat esa bundan ham battar. Tumandagi jami 1022 ta fermer xo‘jaligidan 437 tasi umuman faoliyat yurgizmayotgan ekan.

«Demak, tumanda qanchadan qancha yer bekor yotgan ekan-da? Fermerlarning ishlashni xohlamayotganiga sabab nima?» kabi savollar paydo bo‘ladi bu raqamni ko‘rganingizdan keyin.

Ammo maqolada senatorlar va deputatlar bu masala yechimini topish uchun nima ishlar qilgani haqida hech narsa deyilmagan.

Bahodir Sharif
O‘zbekistonlik gazetxon tahallusi
Eltuz.com