Asosiy mavzular
5 iyul 2018

Matbuot shovqinidan keyingina ayolni tahqirlagan kapitan ushlandi

Bosh prokuratura 5 iyul kuni kattaqo‘rg‘onlik 31 yashar ayolni yechintirib tahqirlagan IIB xodimi, kapitan San'at Umarovga jinoyat ishi ochilgani va ehtiyot chorasi sifatida uni hibsga olish masalasi ko‘rib chiqilayotgani haqida xabar berdi.

Bir oy oldin, shu yilning 3 iyunida Kattaqo‘rg‘onda yuz bergani aytilayotgan bu voqea yuzasidan ish, «Eltuz» nashrining o‘rganishicha, o‘zaro «bosti-bosti» qilingan.

Biroq 4 iyulga kelib «Ozodlik» bu haqda yozganidan keyingina Bosh prokuratura bu yuzadan ish ochilgani haqida xabar berdi.

«Ozodlik» radiosida bu video berilganidan so‘nggina militsiya kapitaniga ish ochildi

Rasmiy xabarga ko‘ra, N.T ismli ayol DXXga 22 iyunda ariza yozib, militsiya kapitani S.Umarov va boshqalar uni shahar IIB binosida haqorat qilib, yechinishga majburlashgani haqida bildirgan.

N.T. shu kuni, tergovga qadar tekshiruv ma'lumoti bo‘yicha, IIB shahar ma'muriy binosiga keltirilgani bildiriladi Bosh prokuratura xabarida.

«Hozirgi kunda mazkur ish bilan Bosh prokurorning shaxsan o‘zi shug‘ullanmoqda. Umumiy holat bo‘yicha xizmat tekshiruvi ham boshlangan. To‘liq u ekanligini bilish uchun yuzlashtirish, videodagi ovozlarni tekshirish kerak. Chunki uning yuzi ko‘rinmagan. Hozirda Umarov ushlangan, unga nisbatan qamoq ehtiyot chorasi qo‘llanishi masalasi ko‘rib chiqilmoqda», deya ma'lumot bergan Bosh prokuratura jamoatchilik bilan aloqalar va huquqiy axborot bo‘limi boshlig‘i Surayyo Rahmonova.

Biroq ayolning uni tahqirlagan militsiya kapitaniga «da'vosi yo‘qligi» va uning «shikoyat qilmagani» ham iddao etilmoqda.

Ikki bolasi borligini aytgan N.T ismli jabrlanuvchi «Xabar.uz» saytiga voqea aynan sodir bo‘lgani, San'at Umarov uni yechintirib videoga olishdan oldin ikki marta oyog‘iga tepganini ham bildirgan.

«U kiyimlarimni yechishga majburlab, o‘zi videoga oldi. Yalang‘och holda bozorga olib bormoqchi edi, yalinib-yolvorganimdan keyin navbatchi militsiyalarning oldigacha olib borib, izimga qaytardi. Keyin soat beshgacha ushlab o‘tirib qo‘yib yubordi.

Mening San'at Umarovga hech qanday da'vom yo‘q. Chunki Kattaqo‘rg‘onda ikki bolamdan boshqa hech kimim yo‘q. Bular bilan dushmanlashsam o‘zimga, bolalarimga ziyon yetkazishidan qo‘rqaman. Shuning uchun hech qaerga shikoyat ham qilganim yo‘q», deydi ayol.

Shuningdek, ayolning saytga bildirishicha, prokuraturaga u tanimaydigan odamlar murojaat qilishgan. Lekin ochiqlangan bu ma'lumotlar rasmiy manbalar tomonidan tasdig‘ini topgani yo‘q.

Prokuratura xabarida S.Umarovga qamoq ehtiyot chorasini qo‘llash masalasi ko‘rib chiqilayotgani, shuningdek, Kattaqo‘rg‘on shahri IIBda mazkur holat yuzasidan xizmat tekshiruvi o‘tkazilayotgani bildiriladi.

Eltuz.com

Tag‘in o‘qing
11 aprel 2019
«Eltuz» nashri Muhammad Bekjonning «Qo‘rquvning nariyog‘ida» (Alvido, Jasliq!) ikkinchi kitobining audio versiyasini taqdim eta boshlaydi. «Bu kitob “O‘zbekiston qamoqxonalarida ...
14 yanvar 2020
Rossiya tashqi ishlar vaziri Sergey Lavrovning 15-16 yanvar kunlari Toshkentga tashrifi arafasida mediatarmoqda O‘zbekistonning YeOII (Yevroosiyo iqtisodiy ittifoqi)ga qo‘shilishi ...
9 may 2017
Bolaligimizda Do‘stjon dadamning Ulug‘ Vatan urushi ishtirokchisi ekanligidan faxrlanardik. Har 9 may bayrami arafasida dadamni maktabga va boshqa majlislarga ...
25 oktyabr 2017
23 oktyabr kuni «Eltuz» nashrining mobil muxbiri jo‘natgan fotosuratda supurgi ko‘targan maktab formasidagi bir guruh maktab o‘quvchilarini ko‘rish mumkin. ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...