Asosiy mavzular
12 mart 2019

Gulnoraning hukumatdagi sheriklari kim bo‘lgan?

O‘tgan 2018 yilning birinchi choragida Rossiyadan O‘zbekistonga jami 726 mln dollar pul o‘tkazilgan. Uning 200 million dollari Rossiya fuqarolari, qolgani bu mamlakatda mardikorlik qiladigan millionlab o‘zbeklar tomondan jo‘natilgan.

Bu raqamlarni nega keltiryapmiz? Millionlab o‘zbek uch oy tinimsiz ishlab ham Gulnora Karimovaning uchtagina shirkatdan olgan porasichalik daromadga ega bo‘la olmaganini ko‘rsatish uchun.

Shuncha xalqning oylar davomidagi mehnatining qadri avtoritar hukmdorning tantiq qizi aytadigan bir so‘zchalik emasligini anglatish uchun keltirdik yuqoridagi raqamlarni.

Gulnora Karimova faqat telekommunikatsiya emas, boshqa daromadli sohalarga ham tinimsiz aralashgani bugun hech kimga sir emas.

Shunday ekan, bu sohalarga kirib kelishni istagan boshqa sarmoyadorlar ham malikaning huzuriga quruq qo‘l bilan tashrif buyurmagan bo‘lsa kerak, degan shubha uyg‘onadi.

Masalaning yana bir jihati borki, agar uni aytmasak, O‘zbekistonning boyligini, xalqning qonini kanadek so‘rgan korruptsionerlarga himmat ko‘rsatgan bo‘lamiz.

Xo‘sh, hukumatda rasmiy jihatdan bunday yirik masalalarni hal qiladigan vakolatga ega bo‘lmagan (tashqi ishlar vaziriga bir muddat maslahatchi bo‘lganini aytmaganda) Gulnora Karimova hujjatlar bilan bog‘liq ishlarni qanday hal qildi ekan?

Axir o‘sha yirik telekommunikatsiya shirkatlarining O‘zbekistonga kirib kelishi uchun hujjatlarni Gulnora emas, hukumatdagi qandaydir vakolatli mansabdorlar imzolashi kerak-ku.

Axir birovning egaligidagi firmani boshqargan Gayane Avakyan va o‘rtamiyonadan ham past qo‘shiqchi Rustam Madumarovda bunday vakolatlar bo‘lmagan bo‘lsa kerak?

Demak o‘sha mansabdorlar kimligini ham ochiqlash lozim. Ular hozir qanday lavozimlarda ishlayotgani yoki qanday ishlar bilan bandligini xalq bilishga haqli.

Ayni paytda AQShda Gulnora Karimova uchta telekommunikatsiya kompaniyasidan 865 million dollar miqdorida pora olish va keyinchalik bu poralarni AQSh moliya tizimi orqali yuvish uchun o‘z rasmiy mavqeidan foydalanishda ayblanmoqda. 

Bu jinoyat ishi “xorijiy korruptsiya amaliyotlari to‘g‘risidagi qonun tarixida eng yirik holat” deya baholanishga ham ulgurdi.

Ayblovda Gulnora Karimova O‘zbekiston Aloqa va axborotlashtirish agentligi qarorlariga ta'sir o‘tkazganligi ham bildirilmoqda.  

Agar O‘zbekiston prokuraturasi AQShda boshlangan jinoyat ishiga qiziqish bildirib, o‘z tekshiruvini o‘tkazishga qaror beradigan bo‘lsa, e'tibor qaratish lozim bo‘lgan nuqtalardan biri mana shu nazarimizda.

Bu idora rahbarlari Gulnora olgan poralarga sherik bo‘lmagandir ehtimol. Chunki “korruptsiya malikasi” birovga bir tiyin beradigan ayolga o‘xshamaydi. Aks holda O‘zbekistonda sud qilinganda o‘zaro kelishuv bo‘yicha o‘g‘irlagan pullarini mamlakatga qaytarishga harakat qilardi.

Shunday qilmagani, buning ustiga, o‘zini haq-huquqi poymol etilayotgan jabrdiyda sifatida ko‘rsatishga urinib, internet orqali dunyoga jar solish harakatida bo‘lmaganida bugun uy qamog‘idan turmaga jo‘natilmagan bo‘lardi.

Har holda O‘zbekiston bosh prokuraturasining shu munosabat bilan tarqatgan bayonotidan mana shunday xulosa kelib chiqadi.

Endi prokuraturada AQSh adliya tizimi tomonidan Gulnoraga e'lon qilingan ayblovlar asosida qo‘shimcha tekshiruvlar o‘tkazishga hamma asos bor.

Yuqorida aytganimizdek, bu tekshiruvlar Gulnoraning buyrug‘i bilan o‘z vakolatlarini suiiste'mol qilgan boshqa amaldorlarni ham qamrab olishi zarur.

Aks holda biz bu amaldorlarning kimligi haqida yana AQSh tarqatadigan navbatdagi bayonotlardan bilib oladigan ahvolga tushmaylik!

Sardor Azim
Eltuz.com

Tag‘in o‘qing
22 may 2018
Prezident kelib ketgach, andijonliklar yengil nafas olishdi. Bugun menimcha rahbarlar ham to‘yib uxlashgan bo‘lishsa kerak. Xalqimiz mehmondo‘st, mehmon kutib ...
5 sentyabr 2016
O‘zbekiston ichidagi jurnalistika yana bir bor navbatdagi sinovdan o‘ta olmadi. TVsi ham, gazetayu jurnallari ham o‘ta olmadi. O‘zbekistonda prezident ...
15 sentyabr 2017
15 sentyabr kuni Toshkentdagi «Zeroline» galereyasi «Qochish» (Pobeg) deb nomlangan tasviriy san'at ko‘rgazmasida, mamlakatni tark etgan rassom Shuhrat Bobojon ...
30 noyabr 2016
Namangan shahridagi byudjet idoralari va maktab xodimlariga Artel do‘konlarida sotilayotgan lampochkalardan kamida ikki donadan sotib olishga majbur etilayotgani haqida ...
Bloglar
18 yanvar 2022
Tarmoqda ikki toifa mullalar bir-biri bilan qirpichoq bo‘lmoqda. 1-toifa: Hukumat va DXX yo‘rig‘ida yurib chiziqdan ...
16 yanvar 2022
O‘zbekistondagi har bir mulozimning ichida bitta shoir, har bir shoirning ichida bitta mulozim yashaydi. Bu ...
10 yanvar 2022
O‘zini bir guruh faollar deb tanishtirgan guruh Eltuz telegram kanaliga yozib, quyidagi murojaatni chop qilishni ...