Asosiy mavzular
11 iyun 2019

Uchtaga “Kobalt”, oltitagachi?

Veterinar bilan gurunglashib qoldim. Qo‘ylarga bitta ukol qilaman, ikkita, uchta tug‘adi, dedi. Oxirgi bir-ikki yilda O‘zbekistonda uchta tug‘adiganlar ko‘payib ketayotganining sababi shunaqa ukolga bog‘liq emasmikin, degan xayolga bordim.

O‘zi keyingi paytlarda erkaklarimiz sha'niga aytilayotgan turli ta'nalardan so‘ng shunday o‘yga borishni shakkoklikka yo‘ymaysiz.

Xudoning ishiga aralashib bo‘lmaydi. Kimgadir egiz, kimgadir uchta, to‘rtta, hatto oltita farzand beradi.

Lekin so‘nggi paytlardagi uchta tug‘adiganlar ko‘payib ketgandan keyin veterinarlarning gaplari esga tushadigan bo‘lib qoldi. Nahotki ular ham mashina olish ilinjida ukolga o‘tib qolishgan bo‘lsa?!

Nima bo‘lganda ham O‘zbekistondagi tendentsiyani ko‘rib, yurtdoshlarimizdan biri birdaniga oltita tug‘ib qo‘ysa, qanday ismlarni tanlar ekan, deb o‘ylanib qoldim.

Menimcha, katta egizlarga Shavkat, Miromon, Mirziyo otlari tayyor. Qolgan uchtasiga ism tanlash qoladi. Eski amalni eslab, Islom, Abdug‘ani, Karim ismlari tanlanarmikin?!

Lekin egizlar orasida qizlar ham bo‘lsa-chi? Avvalgi prezidentga aloqador qizlarning otini qo‘yish baloga qolish bilan barobar. Chunki bittasi qamoqda. Ikkinchisi esa marhum otasining “hurmati” soyasida amallab jazodan qochib yuribdi.

Oltita farzandning uchtasi qiz bo‘lsa, boshqa variant bor. Ularga Ziroatxon, Saida, Shahnoza deb ism qo‘ysa bo‘ladi.

O‘shanda uchta egizga atalgan “Kobalt” oltita egiz uchun “Malibu”ga aylanishiga kafil topish bizga qolmaydi. Har holda hamma ham oltita tug‘ayotgani yo‘q-ku!

Lekin “Avtosanoat”da ozgina xavotirga tushish xavfi baribir bo‘ladi. Chunki hozir uchta tug‘ayotganlar “Malibu”ning daragini eshitib oltita tug‘ib yubormasligiga kafolat yo‘q.

Elimiz ko‘paysin. Uchta tug‘ing, kelinlar, oltita tug‘ing! Piru badavlat bo‘ling.

Shuncha ezgulikni tilab turgan paytimizda hatto o‘zbek matbuoti ham sizlarning uchtadan tug‘ib, yana mashina talab qilayotganingizni o‘zicha talqin etyapti.

Ularning yozishicha, uchta farzandni tug‘dirib qo‘yganlar bu xizmati uchun mashina berilmayotganidan shikoyat ham qilayotgan ekan. Axir bu qonunga zid-ku, deyayotganlar ham topilib turibdi.

“Kobalt” ilinji shu qadar urchidiki, odamlar bunday xabarlarni ochiqdan-ochiq istehzo bilan kutib ola boshladilar, boqimandalik, laganbardorlik va ta'magirlik qorishmasi deb baholadilar”, deya yozdi mahalliy hamkasblarimiz.

Ularning e'tirozlarida jon bor. Chunki ular ham oldingi shunday an'ana jamiyatga nima bergani haaqidagi savolga javob topa olmay, xavotirga tushayotgan bo‘lishi mumkin.

To‘g‘ri-da, bir vaqtlar tug‘ilgan Islom, Abdug‘ani, Karimlar bugun xalqimizga nima qilib berdi, degan savol paydo qilishi tabiiy-ku.

Ularning oldi yigirma yoshdan oshdi. Keyingilari ham ancha-muncha yoshga borib qoldi.

Ichidan o‘zbek xalqiga rahmat olib kelgan, elu xalq orasida ezgu amallari bilan nomi chiqqanini hali eshitganimiz yo‘q. Agar bo‘lganida bugun matbuot to‘lib-toshib yozgan bo‘lardi.

Bugungi Shavkat, Miromon, Mirziyolar ham bir kun kelib, Xudo nasib etsin, katta yigitlar bo‘ladi.

Ammo ulardan ertaga elga ne naf bo‘lishi mumkin? Balki shu haqda o‘ylash kerakdir?

“Eltuz”ning Toshkentdagi muxbiri

Tag‘in o‘qing
20 iyun 2016
Kam ta'minlanmagan xonadon qolmagan Shibzon mahallasi haqida yozgan “Qishloq hayoti” gazetasini sinchiklab qayta o‘qigan odam, o‘z tomorqasiga tezak olib ...
7 yanvar 2016
Saudiy Arabistoniga rasmiy safari doirasida Tojikiston prezidenti Imomali Rahmon Makkai Mukarramaga borib, o‘z yaqinlari bilan Umra ibodatini ado etdi. ...
6 fevral 2016
Har bir o‘quv yili, choragi O‘zbekiston maktablarining eski an'anasi bo‘lgan makulatura, temir-tersak, obuna, turli jamg‘armalardan tashqari, tug‘ilgan kun, archa, ...
25 may 2018
Markaziy osiyolik bir guruh faollar O‘zbekistonning marhum prezidenti Islom Karimovning qizi Gulnora Karimovaga tegishli, kelib chiqishi korruptsion aktivlarning mazkur ...
Bloglar
1 dekabr 2020
«Oshin» – 1983 yilda Yaponiyada suratga olingan ko‘p qismli film. Bosh rollarda Nobuko Otova, Yuko ...
25 noyabr 2020
Kuzda ketib kuzda qaytdim Sovet Armiyasi safidan. Bizni armiya safiga oliy o‘quv yurtlarining kunduzgi bo‘limidan ...
24 noyabr 2020
“Humo” nomli uchoq shirkati haqida gap chiqishi bilan eronlik do‘stlarim o‘zbeklarni plagiatda aybladi. Eronda “Humo” ...