Asosiy mavzular
22 aprel 2022

Haykalga halaqit bermasligi uchun bino boshidan judo qilindi

“Smart Houses” MChJ tomonidan Toshkent shahrining Olmazor tumanida qurilayotgan uy-joylarning ulushdorlari mazkur binolarda qurilish ishlari yakuniga yetkazilmayotgani, ko‘plar firibgarlik qurboniga aylanganidan shikoyat qilmoqda. 

Ma'lum bo‘lishicha, ushbu korxona tumandagi G‘alaba bog‘i yonida 8 qavatli, 7 ta blokda 200 dan ziyod xonadondan iborat “Olmazor” turar joy majmuasini ulush kiritish sharti bilan qurishni 2018 yilda boshlagan. 

Ulushdorlar bilan tuzilgan shartnomaga ko‘ra, “Smart Houses” 2020 yil 31 dekabr kuniga qadar uylarni qurib bitkazishi belgilangan bo‘lsa-da, ishlar nihoyasiga yetkazilmagan. 

Ulushdorlarning Oliy Majlis Senati raisi Tanzila Norboeva nomiga jo‘natilgan shikoyat arizasida aytilishicha, MChJ rahbari Rasuljon Fayzievdan bu haqda izoh so‘ralganida, u asoslanmagan turli bahona va vajlari keltirib, ulushdorlar bilan aloqaga chiqishdan bosh tortib kelmoqda. 

“Natijada yuzdan ortiq oila o‘z xonadoniga ega bo‘la olmay jabr chekmoqda. Yangi uyli bo‘lish niyatida to‘lov qilgan aksariyat oilalar turar joyini sotib, ijaraga kvartira olib yashashga majbur bo‘lib kelmoqda. Hatto ba'zi oila vakillari shu muammoli vaziyat tufayli kasallikka chalinib, uyi bitishini ko‘rolmay vafot etib ketdi”, deyiladi arizada. 

Nusxasi “Eltuz”da mavjud mazkur arizadan ma'lum bo‘lishicha, korxona rahbari 8 qavatga mo‘ljallangan qurilish ob'ekti shu yaqinda joylashgan G‘alaba bog‘idagi monument balandligidan yuqori bo‘lib qolayotgani sababli tepa qavatlarni qurishga davlat tashkilotlari tomonidan ruxsat berilmaganini aytgan. 

Oldindan 100 foiz to‘lov qilib qo‘ygan yuqori (6, 7, 8) qavatlardagi xonadon egalari bundan ogohlantirilmagan va ulushiga mos ravishda boshqa qavatga o‘tkazilmagan.

Ulushdorlarning bildirishicha, muammoli vaziyatni hal qilish maqsadida bir necha oy oldin Olmazor tumani hokimligi va tuman prokuraturasi iqtisodiy jinoyatlar departamentiga murojaat bilan chiqilgan bo‘lsa-da, vaziyat ijobiy tomonga o‘zgarmagan. 

Aholi vakillari O‘zbekiston Prezidenti, Oliy Majlis Qonunchilik palatasi spikeri, Bosh prokuror, DXX raisi, ichki ishlar va qurilish vazirlari nomiga ham jamoaviy ariza yo‘llagan. Shundan so‘nggina 2022 yil yanvar oyida murojaatni ko‘rib chiqish va qonuniy chora ko‘rish uchun ish tuman IIBga yuklatilgan. 

Arizadan ma'lum qilinishicha, bir necha oy oldin Rasuljon Fayziev MChJ rahbarligi va ta'sischilikni boshqa shaxsga o‘tkazib bergan va o‘zi g‘oyib bo‘lgan (chet elga chiqib ketgan deb gumon qilinmoqda). Uning xatti-harakatlarida jinoyat (firibgarlik) alomatlari aniqlangani sababli ish tuman prokuraturasiga o‘tkazilgan. 

“Bu davr mobaynida MChJga tayinlangan yangi rahbar yuqori qavatlarni qurishga ruxsat olish harakatlarini boshlagan. Ammo joriy yil 2 aprelga kelib tuman hokimining og‘zaki buyrug‘i asosida (sud qarorisiz) chala bo‘lsa ham qurilgan 6 va 7-qavatlar to‘liq buzib tashlandi. 

Bu esa, o‘z navbatida, aholining o‘z noroziligini bildirish uchun ijtimoiy tarmoqlar orqali hukumatga videomurojaat bilan chiqishiga va mamlakat rahbaridan yordam so‘rab murojaat qilishiga sabab bo‘ldi. 

3 aprel kuni aholi vakillari Toshkent shahri hokimi qabuliga borganida esa tuman mutasaddilari tomonidan uchrashuv o‘tkazilishiga yo‘l qo‘yilmadi”, deyiladi shikoyatda. 

Ulushdorlarning so‘zlariga ko‘ra, hozir tergov sabab MChJ faoliyati to‘xtatildi va surishtiruv-tergov ishlari olib borilmoqda. Ustidan jinoyat ishi qo‘zg‘atilgan sobiq rahbar Rasuljon Fayziev 1 ta kvartirani 2 ta odamga sotganlikda ham gumon qilinmoqda. 

Hozirgi vaqtda yuqori (6,7,8) qavatlardagi buzib tashlangan va qurishga ruxsat etilmayotgan xonadonlarning 20 dan ortiq ulushdori vaziyatdan eng ko‘p aziyat chekmoqda. Ularning aksariyati viloyatlik bo‘lib, begona davlatlarda halol mehnati bilan bir necha yillab yiqqan mablag‘ini uyga tikkan. Endi ular na tikkan pulini, na yangi uyini ololmayotgani hech kimni qiziqtirmayapti. 

“MChJga tayinlangan yangi rahbar esa imkon berishsa qurib beramiz, ammo shuncha insonning pulini qoplab berishga hozir sharoitimiz yo‘q, deb javob beryapti. Tergov va sud, qolaversa, undirish jarayoni uzoq vaqt talab qilishi sabab pastki qavatlar bitkazilib, egalariga topshirilishi ham kechikishi tayin. 

Bu esa, o‘z navbatida, shu (1-5) qavatlardan uy olgan fuqarolar noroziligiga va kelishmovchiliklarga ham sabab bo‘lmoqda”, deyiladi ulushdorlarning Senat raisiga jo‘natilgan shikoyat arizasida. 

Ular Tanzila Norboevadan muammoli vaziyatni yechimini topishda amaliy yordam so‘rab, “odil yechim” sifatida o‘z taklifini ham bildirgan. 

“Qurilishi tugallanmagan bino yonida ushbu MChJga qarashli yaqinda bitgan va egalariga qisman topshirilgan uy-joy majmuasidan bo‘sh (yoxud noqonuniy rasmiylashtirilgan) xonadonlarni;

Qurilishi tugallanmagan pastki qavatlardagi bo‘sh (yoxud noqonuniy rasmiylashtirilgan) xonadonlarni undirib berish;

Qurilishga tutash hududdan qo‘shimcha joy ajratib, qurilishiga ruxsat etilmayotgan 3 ta qavatdagi xonadonlar ulushdorlariga uy qurib berish mas'uliyatini MChJning yangi rahbariyatiga yuklash masalasini shaxsan nazoratingizga olishingizni iltimos qilamiz”, deyiladi arizada. 

Tag‘in o‘qing
4 oktyabr 2022
4 oktyabr kuni ertalabki soat 08:30 larda Chirchiq shahrida joylashgan “Maxam CHIRCHIQ” AJ korxonasi sintez sexida portlash sodir bo‘ldi. ...
17 avgust 2017
Matluba Azamatova 1965 yil Andijon shahrida tug‘ilgan. Maksim Gorkiy nomli Adabiyot institutida tahsil olgan. Britaniyaning IWPR instituti va Bi ...
11 dekabr 2017
Ëshlar ittifoqi kafilligi ostida jinoyatchilar sud zalidan ozod qilinmoqda. Lekin bu kafillik shu yilning 27 sentyabrida qamoqqa olingan jurnalist ...
13 oktyabr 2020
Prezidentning kuyovlari bir-biri bilan nizolashmoqda. Prezidentning xotini Ziroat Hoshimova esa Inoyatov nazoratida. Bu iddaolar ustiga qurilgan taxminlar bugungi ko‘rsatuvda. ...
Bloglar
3 noyabr 2022
1906 yilning 3 noyabrida Germaniyaning Berlin shahrida o‘tgan Xalqaro radiotelegrafiya anjumanida SOS signali halokatni bildiruvchi ...
1 noyabr 2022
Ulug‘ o‘zbek shoiri va muholifat lideri Muhammad Solih bilan suhbatning 11-qismi Turk birligi g‘oyasi va ...
25 oktyabr 2022
Ulug‘ o‘zbek shoiri va muholifat lideri Muhammad Solih bilan suhbatning 10-qismida muxbir undan o‘z ota-bobolari ...