• Suratda: Alisher Taksanov marhum prezident Islom Karimovning o‘g‘li Pyotr Karimov bilan
Document UZ
11 oktyabr 2018

Alisher Taksanov: menimcha, sudda Karimovning o‘g‘li yutadi

Moskvaning Tver tumani sudi 24 oktyabrda Islom Karimovning birinchi xotinidan bo‘lgan o‘g‘li 52 yashar Pyotr Karimovning «O‘zbekiston havo yo‘llari» ustidan da'vosi yuzasidan sud ishini boshlaydi.

Pyotr Karimovning da'vosiga ko‘ra, 2016 yilning 2 sentyabrida otasi Islom Karimov o‘lganidan so‘ng u katta lavozimdagi ishidan haydalgan. 

Suddan u oyliklari va tovon puli undirishni so‘ramoqda. «Eltuz» nashri Pyotrni uzoq yillardan buyon taniydigan, u bilan birga o‘qigan, bugungi kunda Shveytsariyada yashayotgan sobiq TIV mulozimi Alisher Taksanovni suhbatga tortdi.

Foto: Alisher Taksanov Pyotr Karimov bilan Toshkent xalq xo‘jaligi instituti yonida, 1988 yil bahori. Alisher Taksanovning shaxsiy arxividan.

Alisher, eshitgan bo‘lsangiz, yaqinda Pyotr Karimov «O‘zbekiston havo yo‘llari»ni oyliklarini undirish uchun sudga berdi. Nahotki Islom Karimovning o‘g‘li pulga shunchalik zor bo‘lsa?  

Men uni Xalq xo‘jaligi institutiga kirgan yilidan beri yaxshi bilaman. U oddiygina yigit edi. 1983 yili u bilan bir fakultetda, faqat turli mutaxassilik bo‘yicha o‘qiganmiz. Keyin u armiyaga ketdi va qaytgach mendan ikki kurs pastda o‘qidi.

Otasi o‘sha paytda moliya vaziri bo‘lgan Islom Karimov ekanini ham bilmasdik. Bu bilan u hech maqtanmagan.  Keyinchalik uning uyida bo‘lganimda, qanchalik kamsuqum yashaganini ko‘rganman.

Toshkentdagi uch xonali kvartirada onasi bilan yashardi. Yagona qimmatbaho narsasi  «VM-12» videomagnitafoni edi.  U shunga ham xursand edi. Mashina olishni orzu qilardi. Uyi yaqinida garaj qurgandi. Lekin, bilishimcha, baribir mashina ololmadi.

O‘qishni bitkazib, aspiranturaga kirdi. Sankt-Peterburgda o‘qidi. O‘sha yerda 1995 yili dissertatsiyasini yoqladi. 

Uning «O‘zbekiston havo yo‘llari»dagi kar'erasi haqida nima deya olasiz? 

U yerga o‘tishidan oldin, bilishimcha, u Moskvadagi Tashqi iqtisodiy aloqalar banki vakilining o‘rinbosari bo‘lib ishlardi.  Keyinchalik bu bank «Aziya-Invest» deb nomlandi.  O‘sha yerda u muovin edi.

«Havo yo‘llari»dagilar o‘z g‘arazlaridan kelib chiqib, prezidentning o‘g‘li bo‘lgani, yuqorida qandaydir «tomlari» bo‘lishi, uning qo‘llab-quvvatloviga ega bo‘lish uchun o‘zlariga tortgan bo‘lishsa kerak, albatta. 

2016 yili otasi o‘lganidan keyin esa uning keragi bo‘lmay qoldi. Uning ketiga tepishdi. Ular uchun endi Pyotrning bir chaqalik qimmati qolmadi. Bu siyosiy tizimning qanchalik xudbin ekanini ko‘rsatadi.

Pyotrning otasi yoki singillari Lola va Gulnora bilan munosabati qanday edi?   

Bilishimcha, uning otasi va singillari bilan hech aloqasi yo‘q edi. 1996 yili men Moskvaga borganimda undan «Sening fan kandidati bo‘lganingni otang biladimi?» deb so‘raganimda: «Men u bilan aloqa qilmayman. Unga hech xabar qilmaganman», degan.

Nafsi hakalak otgan singillaridan farqli o‘laroq, u juda oddiy yashardi. Oddiygina kiyinardi. Hatto u qandaydir uyda emas, elchixonaning mehmonxonasida yashardi. Bank ham o‘sha yerda edi. 

Bilishimcha, u cingillari (Gulnora va Lola Karimovalar) bilan ham aloqa qilmasdi. Hatto katta singlisi Gulnora 2000 yili elchixonada maslahatchi bo‘lganida ham. Masalan, «Kazachiy pereulok-12» da joylashgan elchixona mehmonxonadan ikki qadamlik yo‘l edi, lekin bir-birlari bilan gaplashishmasdi.

«Singling bilan gaplashib turasanmi?» deganimda, «Yo‘q» deb javob bergan. 

Sizningcha, u sud jarayonni yutib chiqa oladimi? Bilishimizcha, «O‘zbekiston havo yo‘llari» shirkati hozircha bunga hech munosabat bildirmayapti.

Agar u O‘zbekistonda sudlashganida edi, yutishiga ishonish qiyin bo‘lardi. O‘zbekistonda uning imkoniyati cheklangan. Lekin u Rossiyada turib harakat qilyapti. U yaxshi advokat topishi mumkin. O‘zi ham anoyi emas. 

Buning ustiga, bu jarayon siyosiy janjalga sabab bo‘ladi. «O‘zbekiston havo yo‘llari»ga bu narsa sira ham kerak emas, bu sharoitda ular hech narsa qila olmay qoladi. O‘ylaymanki, Pyotr yutib chiqadi.

PS: Pyotr Islomovich Karimov O‘zbekistonning oldingi prezidenti Islom Karimovning birinchi xotini Natalya Kuchmadan bo‘lgan o‘g‘lidir.

Uzoq yillar O‘zbekiston Fanlar akademiyasida va Botanika institutida ishlagan Natalya Kuchma Chkalov nomidagi aviatsiya zavodi bosh direktorining qizi edi.

Jurnalist Qudrat Bobojon suhbatlashdi
Eltuz.com

Tag‘in o‘qing
19 yanvar 2017
Eltuz nashri jurnalist Shamsiddin To‘laganovning Milliy havfsizlik xizmati raisi Rustam Inoyatov iste'fosi haqidagi maqolani chop etishi ortidan Respublika telekanali ...
2 may 2024
Salom qadrli muxlislar, Eltuz portaliga kelgan co‘nggi 5 ta maktubni o‘qiymiz, ular O‘zbekistonning Qashqadaryo, Navoiy va Buxoro viloyatlaridan kelgan. Xatlar oqimi davom etmoqda, muammolar yechimini ta'minlash, shuningdek kanalimizning alohida sahifasiga kirib privatga o‘tkazilgan ...
24 noyabr 2017
Istanbul shahrida yashayotgan O‘zbekiston vatandoshi 27 yoshli Ma'bud Nosirov xotini 25 yoshli Zarifa Shokirovani pichoqlab o‘ldirdi. Foto: hurriyet.com o‘ngdan ...
11 aprel 2020
O‘zbekiston xalq shoiri, satirik va yumoristik janrdagi kitoblar muallifi Anvar Obidjon 73 yoshida 11 aprel kuni olamdan o‘tdi. Bu ...
Bloglar
28 may 2024
Men millatchi emasman! Lekin qaytadan ta'mirlatilgan va Toshkent shahrining sobiq hokimi J. Ortiqxo‘jaev tomonidan Pasxaga ...
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...