Document UZ
22 noyabr 2018

RFE/RL: «Ozodlik» muxbiri uyining musodara qilinishi siyosiy o‘ch olishdir!

Shu yilning 23 noyabrida Urganch tumani ma'muriy ishlar sudi jurnalistlar uyi musodara qilingani yuzasidan shikoyat arizasini ko‘rib chiqadi.

Mahkama oldidan «Ozod Yevropa – Ozodlik radiosi» (RFERL) ning Vashingtondagi qarorgohi bayonot chiqarib, «Ozodlik» jurnalisti Shuhrat Bobojonovga tegishli Urganch tumanidagi hovlining musodara qilinishini “jurnalistning kasbiy faoliyati bilan bog‘liq siyosiy o‘ch olish”, deb atadi. Ayni bayonotda «Ozodlik» muxbirining jurnalistik faoliyat bilan shug‘ullanadigan ikki ukasi – G‘ayrat va Qudrat Bobojonovlarga tegishli uylar ham musodara qilingani qoralanadi.

Jurnalistlarning uylarini musodara etish qarori qabul qilingan 2018 yil fevralidagi mahkama jarayonini o‘rganib chiqqan Toshkentdagi “Simay” advokatlik idorasi huqushunoslariga ko‘ra, jarayonda sud protsessual normalari buzilgan, uy egalari sudda qatnashtirilmagan va yolg‘on guvohliklardan foydalanilgan. Sud qarori esa olti oy o‘tib, shu yilning 27 avgust kuni uy egalariga berilgan.

Shug‘rat Bobojonovning uyi

Qaror chiqargan hokim o‘rinbosari pora bilan ushlangan

Uyni musodara qilish tashabbusi bilan sudga Urganch tumani hokimi o‘rinbosari Bekzod Abdrimov murojat qilgan.

Xorijda yashayotgan jurnalistlarning Urganchdagi mulklarini tortib olish iddaolarini o‘rganarkan, «Eltuz» nashri Urganch tumani hokimining qurilish ishlari bo‘yicha o‘rinbosari 29 yashar Bekzod Abdrimovning shu yilning 1 iyulida pora ustida qo‘lga olingani haqidagi faktlarga duch keldi.

Abdrimov joriy yilning 10 iyunida birovning uy-joyini boshqa birovga pora evaziga rasmiylashtirayotgan paytida DXX tarafidan ushlanib, ishi sudga oshirilgan. Tuman hokimi esa ishda yo‘l qo‘ygan kamchiliklari uchun lavozimidan olingan edi.

Xorazm viloyati televideniesi orqali 6 iyulda efirga uzatilgan ko‘rsatuvda DXX viloyat boshqarmasi va viloyat prokuraturasi tomonidan Bekzod Abdrimovning 5 million so‘m pora olgan paytida ushlangani aytiladi.

Aniqlanishicha, tuman hokimi o‘rinbosari bu pulni tuman hokimining Urganch tumanida joylashgan 5 sotixli tomorqaga egalik huquqini taqdim etuvchi qarorini chiqarib berish uchun olgan.

B.Abdrimovga nisbatan Jinoyat kodeksining 210-moddasiga muvofiq jinoyat ishi qo‘zg‘atilgan.

Bekzod Abdrimov Fuqarolarning mulkka egalik qilish masalalarini ko‘rib chiqish komissiyasi raisi ham bo‘lgan.

G‘ayrat Bobojonov

«Yurtimizni yomonlaganlar uyini tortib olamiz!»

Ayni masala yuzasidan kassatsiya arizasi berganlarga mahalliy hokimiyat organlari tarafidan bosim o‘tkazilgan. “Bizga yuqoridan topshiriq bor. Yurtimizni yomonlagan jurnalistlarning uyini tortib olamiz”, deb aytishgan.

Urganch tumani hokimligi davosi asosida sud Qudrat va G‘ayrat Bobojonovlarga tegishli turar joy, yer uchastkalarini «egasiz qoldirilgan», deya hal qiluv qarori chiqargan.

«Bu uyda mening o‘g‘lim oilasi bilan turadi. Lekin sud qarori chiqqanidan olti oy o‘tib bizga ijro varaqasini jo‘natishyapti», deydi shu mulk egalaridan biri, Urganchda yashayotgan G‘ayrat Bobojonov.

Unga berilgan, Urganch tumani sudyasi O‘.Masharipov imzolagan ijro varaqasida «Qorovul qishlog‘i, «Shodlik» mahallasi, «Ziyokor» ko‘chasi, 14-uyda joylashgan turar joy egasiz deb topilsin va Urganch tumani hokimligi balansiga o‘tkazilsin», deb yozilgan.

Shunga ikki tomchi suv kabi o‘xshash hujjat Shuhrat Bobojonov nomiga ham kelgan. Uning ham Urganch tumanida ikki qavatli uyi bor edi. Hokimlik qarorida yozilganidek qarovsiz emas edi.

MXXning so‘nggi zarbasimi?

«Arboblar» MFYning «Eltuz» muxbiri bilan suhbatlashgan faoliga ko‘ra, shu yilning boshida MXXning Xorazm viloyati boshqarmasi xodimlari mahalla raisi B.Bekberganovga tazyiq o‘tkazib, sudda Bobojonovlarga qarshi yolg‘on ma'lumot berishga majburlangan.

«Eltuz» nashri jurnalisti Qudrat Bobojonning fikricha, hokimiyat organlarining bu harakatlari uning, akasi va ukalarining jurnalistik faoliyati bilan bog‘liq.

Qudrat Bobojon, «Eltuz» nashri jurnalisti 

«Chunki aynan bizning nashrimizda keyingi bir necha yil ichida MXXning ko‘plab zobitlari kirdikorlari fosh etildi. To‘g‘ri, Karimov davrida ham bizni gazetalarda qoralashgan, xususiy televideniemizni yopib, so‘z erkinligidan mahrum qilishga urinishgan, nomimizni badnom qilishga harakat qilib kelishgan, lekin hech bir mulozim uyimizni tortib olish darajasigacha bormagan edi», deydi Qudrat Bobojonov.

2005 yil Andijon voqealarini yoritganligi sabab ta'qibga uchragan jurnalist Qudrat Bobojon mamlakatni tark etib, Shvetsiyada yashay boshlagan, bugungi kunda uning farzandlari va nabiralari Urganchda yashamoqda. Uning akasi, «Ozodlik» radiosi jurnalisti Shuhrat Bobojon esa Urganchdagi xususiy «Ey El Si» telekanali tugatilganidan keyin 2001 yili mamlakatni tark etgandi.

«Onangiz o‘g‘illari uchun kechirim so‘rasin!»

Bobojonovlarning onasi 75 yashar Shukurjon Madrahimova yashaydigan Urganch tumanidagi uyga 2017 yilning 18 aprelida bir nechta notanish ayol hujum uyushtirishgandi.

Bobojonovlarning onasi Shukurjon Madrahimova

Xonadonga bostirib kirgan ayollar uning o‘g‘illarini “Vatan xoinlari” deya, kurakda turmaydigan so‘zlar bilan haqorat qilishgan, yaqinlariga qo‘ng‘iroq qilmoqchi bo‘lganida telefonini tortib olib, yerga uloqtirishgandi.

G‘alati tomoni shundaki, voqea sodir bo‘lgan zahoti uchastka militsiyasi xodimi bilan xalq orasida «Bakvargan qassob» deya tanilgan Urganch tumani «Arboblar» mahallasi raisi kirib kelgan.

Onasiga qilingan hujumdan militsiyaga shikoyat arizasi yozmoqchi bo‘lgan Bobojonovlarning singlisi Barnoni bu harakatdan to‘xtatib: «Undan ko‘ra onangiz kechirim so‘rasin o‘g‘illarining qilmishi uchun!» degan edi u o‘shanda.

Militsiya Madrahimova arizasini qabul qilmagach, uni respublika prezidenti Shavkat Mirziyoevning virtual qabulxonasiga yo‘llashgan.

Bobojonovlarga tegishli mulkning egasizligi haqidagi sud hujjatlari, qaror va ijro varaqalarining olti oylik shikoyat muddati o‘tganidan keyin atay o‘tib ochiqlanishi bu harakatlarda siyosiy motivdan ko‘ra, ko‘proq shaxsiy manfaatlar ham yashiringanligini ko‘rsatadi.

Siyosiy qarashlari uchun shaxslarning mulkini tortib olish holati hatto O‘zbekiston uchun ham kam uchraydigan hodisadir. Aka-uka Bobojonovlar masalani huquqiy tartibda hal qilish uchun advokatga murojaat etishgan edi.

Eltuz.com

Tag‘in o‘qing
26 yanvar 2017
Mirziyoevning ayrim va'dalari amalga oshmadi. Masalan uning 27 mamlakat sayyohlariga vizasiz kirish izni berish qarori bekor bo‘ldi. Keyinchalik chiqish ...
7 sentyabr 2017
O‘zbek rasmiylarining mamlakatda majburiy mehnatga yo‘l qo‘yilmasligi, shifokor va pedagoglar terimiga jalb etilmasligi haqidagi iddaolariga qaramay, bu yil ham ...
4 mart 2020
Milliylik bilan assotsiatsiya uyg‘otadigan yana bir atribut — paxta guli tushirilgan choynak-piyola. Bu choynak-piyola dizayni o‘tgan asrning 60-yillarida ishlab ...
12 may 2020
Hayotilla damaschi bilan Madina temir reshyotkaning bu yog‘ida, Absattor esa naryog‘ida turardi. Chapani¸ kambag‘al bo‘sayam uncha-muncha odamga gap bermaydigan ...
Bloglar
20 iyun 2022
1990 yil 20 iyunda O‘zbekiston SSR Oliy Soveti tomonidan Mustaqillik deklaratsiyasi qabul qilingan edi. Mamlakat ...
17 iyun 2022
Biz nima uchun o‘zbek jamiyatida «ayollar huquqi» deb gapiramiz va bu ko‘pchilikka yoqmaydi?Buning sabablarini bilish ...
7 iyun 2022
(Taniqli shoir va siyosatchi Muhammad Solihning “Imperativ” kitobidan 54-qism. Audiokitob matnini muallifning o‘zi o‘qigan) AMAL ...