Asosiy mavzular
28 dekabr 2019

Mirziyoev Rossiyada nimalarni gaplashmoqchi?

Kelayotgan yilning fevral oyida O‘zbekiston prezidenti Shavkat Mirziyoevning Rossiyaga kutilayotgan tashrifi chog‘ida mamlakat uchun hayotiy masalalar muhokama qilinadi. 

Bu tashrif kun tartibidan O‘zbekistonning Yevroosiyo iqtisodiy ittifoqi (YeOII)ga a'zo bo‘lishi, Jizzaxda AES qurilishi, mamlakatning Kollektiv xavfsizlik shartnomasi tashkiloti (KXShT) bilan munosabatlari kabi o‘ta muhim masalalar o‘rin oladi. 

Bu kabi taxminlarni bildirgan siyosiy tahlilchi Qurbon Toshboevning “Eltuz”ga bildirishicha, mazkur tashrif O‘zbekistonning siyosiy-iqtisodiy kelajagini belgilab berishda o‘ta muhim ahamiyatga ega bo‘ladi. 

So‘nggi vaqtlarda eng ko‘p muhokama qilinayotgan mavzulardan biri O‘zbekistonning YeOIIga a'zoligi masalasidir.

Yuqori doiradagi rasmiylar, xususan, Senat raisi o‘rinbosari Sodiq Safoev bu a'zolikni yoqlab gapirgani ortidan mamlakatdagi mavjud partiyalar rahbarlari ham bir ovozdan buni qo‘llab-quvvatlash tarafdori ekanini  bildira boshladi. 

Bu masala, shuningdek, AES qurilishi o‘zbek muxolifatining qat'iy noroziligiga sabab bo‘ldi, ijtimoiy tarmoqlarda ham qarshilar ko‘pchilikni tashkil etmoqda. 

Aynan Sh.Mirziyoevning Rossiyaga tashrifi e'lon qilinishi barobarida hali ikki mamlakat Jizzaxda AES qurilishi borasida kelishuvga kelmagani haqida xabarlar paydo bo‘ldi. 

O‘zbekistonning KXShT bilan munosabatlari masalasi esa mamlakat bu tashkilotni tark etganidan buyon o‘zaro turli ziddiyatlarga sabab bo‘lib kelyapti.

Yaqinda Rossiya Xavfsizlik kengashi kotibi Nikolay Patrushev “Afg‘onistonda vaziyat yomonlashayotgani, “Islom davlati” guruhi jangarilari Markaziy Osiyoga bostirib kirish uchun mamlakat janubida kuch to‘playotgani” haqida bayonot bergan edi. 

Undan sal avvalroq KXShT bosh kotibi o‘rinbosari Petr Tixonovskiy ham Afg‘oniston yangi harbiy mojarolar hududi bo‘lishi tahdididan ogohlantirgandi. 

“Yuqorida tilga olingan holatlar Sh.Mirziyoevning Rossiyaga kutilayotgan tashrifida aynan shu masalalar muzokaralarning asosiy mavzusi bo‘lishiga ishora beradi”, deydi Q.Toshboev “Eltuz” bilan suhbatda. 

Uning so‘zlariga ko‘ra, YeOIIga a'zolik masalasida shu kungacha rasmiylar va ularning yo‘rig‘idan chiqmaydigan partiyalar rahbarlari aytgan fikrlar bu masala tashrif davomida yakuniy bosqichga kirishidan dalolat beradi.

“Hozir bayon etilayotgan siyosiy vektordan kelib chiqilsa, hukumat mazkur masalada bir qarorga kelgan ko‘rinadi. Ya'ni biz YeOIIga a'zolik sari ketyapmiz”, deydi tahlilchi. 

Q.Toshboevning ta'kidlashicha, AES qurilishi masalasida ham O‘zbekiston Rossiyaning katta bosimi ostida qolgan. 

“Avvalo, bu masalaning o‘zaro muzokaralar mavzusiga aylantirilishining o‘zi xato bo‘lgan edi,- dedi tahlilchi. – O‘zbekiston endi qiyin ahvolda qolgan. Bir tomondan, Rossiyaning katta bosimi. Ikkinchi tomondan, butun dunyo atom energetikasidan voz kechayotgan bir vaqtda O‘zbekistonning bu g‘avg‘oga aralashib, Rossiyaning uzoq muddatli ta'sir doirasiga tushishiga yo‘l ochildi”. 

Tahlilchining ta'kidlashicha, Afg‘onistondan kelayotgan tahdidni bo‘rttirish Markaziy Osiyo mamlakatlarini Rossiya ta'sirida ushlab turishga qaratilgan sa'y-harakatlarning bir qismidir.

“Har uchchala masalada O‘zbekiston Rossiya va G‘arb mamlakatlarining manfaatlari iskanjasida qolmoqda. Agar O‘zbekiston bu masalalarda Rossiya yo‘rig‘iga yuradigan bo‘lsa, G‘arbning investitsiyalari yo‘liga va qo‘llab-quvvatloviga o‘z qo‘li bilan to‘siq qo‘ygan bo‘ladi”, dedi tahlilchi Q.Toshboev “Eltuz” bilan suhbatda.

Eltuz.com

Tag‘in o‘qing
20 may 2016
Ha, choyxo‘rlikda bizning oldimizga tushadigani yo‘q ekan dunyoda. Blogimni bir choynak achchiq choy ichib olib keyin yozaman deb o‘yladimu, ...
27 dekabr 2017
«Eltuz» nashri MXX raisi Rustam Inoyatovning Avstriyada yashirilgan mulkiga oid videoni taqdim etadi. Video Open Source Investigations (OSI) guruhi ...
15 iyun 2016
43 yashar novvoy ramazon paytida iftor uchun maxsus yumaloq kulchalar yopadi. Bu kulchalar odatdagidan mazali va odatdagidan arzon. Oddiy ...
18 oktyabr 2016
Sobiq sho‘rolar davrida agrar soxani mexanizatsiyalash masalasiga ozmi-ko‘pmi e'tibor berilgani, mamlakatda katta miqdorda paxta terish kombaynlari ishlab chiqarilgani, paxta ...
Bloglar
28 may 2024
Men millatchi emasman! Lekin qaytadan ta'mirlatilgan va Toshkent shahrining sobiq hokimi J. Ortiqxo‘jaev tomonidan Pasxaga ...
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...