Asosiy mavzular
6 noyabr 2018

Farg‘onalik sobiq notariuslar reabilitatsiya istamoqda

Farg‘ona viloyati notarial idoralarining bir guruh sobiq xodimlari o‘zlariga nisbatan Milliy xavfsizlik xizmati (hozirgi Davlat xavfsizlik xizmati) tomonidan uyushtirilgan jinoyat ishi yuzasidan “adolat istamoqda”.

Ularning “Eltuz” tahririyatiga yuborgan maktubida yozilishicha, 2016 yilda 22 nafar davlat notariusi va notarial idoralarning ellikka yaqin xodimiga nisbatan “qasddan g‘ayriqonuniy ravishda jinoyat ishi qo‘zg‘atilgan”. Bir kimsaning notarius ustidan yozgan arizasi asosida Farg‘ona viloyatining Oltiariq, Rishton, Bag‘dod, Uchko‘prik, Buvayda, O‘zbekiston, Quva, Toshloq tumanlari, Qo‘qon va Farg‘ona shaharlaridagi notariuslar javobgarlikka tortilgan.

Maktubda jinoyat ishi faqat maxsus tuzilgan ro‘yxatga kiritilgan notariuslarga nisbatan qo‘zg‘atilgani, “buni bemalol “notariuslar ishi” deb atasa bo‘laverishi” ta'kidlangan.

Xatda bayon etilishicha, notariuslar fuqarolarga xizmat ko‘rsatishda ortiqcha pul olganlikda ayblangan. Jinoyat ishlarida hech qanday dalillar bo‘lmagan, faqatgina fuqarolardan majburlab, aldab, qo‘rqitib olingan so‘roq bayonnomalari mavjud, xolos.

Maktub egalarining ma'lum qilishicha, tergov harakatlarini Farg‘ona viloyati prokuraturasi tomonidan tuzilgan tergov guruhi amalga oshirishi lozim bo‘lgan holda bu ishlarga noqonuniy holda moliya va soliq, SVOJQKD, IIB xodimlari jalb qilingan.

Tergov tomonidan ko‘rsatmalar qo‘rqitish, aldov, tazyiqlar vositada olingani, hatto vafot etgan ba'zi fuqarolar ishtirokidagi so‘roq bayonnomalari rasmiylashtirilgani iddao qilinadi maktubda.

Unda yana yozilishicha, sudlangan notariuslarning har biridan millionlab so‘m (ba'zilaridan qariyb yuz million so‘m) “zarar” davlat foydasiga undirilgan.

Sobiq notariuslar bu ishlarning boshida MXX Farg‘ona viloyati boshqarmasida o‘sha paytda sud va adliya sohasi kuratori bo‘lgan Sardor Qurbonov turganini, tergov guruhi a'zolari va sudyalar uning ko‘rsatmasini so‘zsiz bajarganini ma'lum qilgan.

“Eshitishimizga qaraganda, Farg‘ona viloyati adliya boshqarmasining sobiq boshlig‘i Mirhayot Nazaraliev Farg‘ona viloyati hokimi va MXX viloyat boshqarmasi boshlig‘i bilan chiqisha olmay qolganligi uchun uni ishdan bo‘shatish maqsadida yuqoridagi “qirg‘inbarot” uyushtirilgan, adliya boshlig‘i esa MXX xodimlari qo‘lida qo‘g‘irchoq bo‘lib qolganligi sababli shu noxaqliklarning yuz berishiga keng yo‘l ochib bergan va xodimlarini qurbon qilgan”, deyiladi maktubda.

Sobiq notariuslar o‘zlarining reabilitatsiya qilinishi, o‘zlariga qilingan “nohaqliklar” fosh etilishini so‘rab Prezident qabulxonasiga, Bosh prokuraturaga, Oliy sudga, Sudyalar oliy kengashiga, Ichki ishlar vazirligiga murojaat qilishganini, shunga qaramay, bu murojaatlar aynan tergovni olib borgan Farg‘ona viloyati prokuraturasiga yuborilayotganini bildirgan.

Maktubi so‘nggida sobiq notariuslar “adolat qaror topishida yordam” so‘ragan.

Eltuz.com

Tag‘in o‘qing
6 iyun 2018
Majburiy mehnat monitoringi bo‘yicha 4 iyun kuni Navoiy viloyatlariga borgan jurnalist Malohat Eshonqulova uchastka noziri kapitan Odil Qurbonov tomonidan ...
9 sentyabr 2019
Zimbabvening 37 yillik diktatori o‘lgani fonida O‘zbekiston parlamentining qariyb shu yoshlardagi deputati Akmal Umirzoqov mavjud nomenklaturadan tashqaridagi shaxslarning deputat ...
10 avgust 2020
O‘zbekistonlik jurnalist Bobomurod Abdullaev joriy yilning 9 avgust kechasi Qirg‘iziston Milliy xavfsizlik davlat qo‘mitasi xodimlari tomonidan Bishkekda qo‘lga olindi. ...
28 fevral 2017
O‘zbekiston xalq shoiri Jamol Kamol Toshkent Xalqaro aeroportiga Karimov nomini berish haqidagi prezident qaroriga e'tiroz bildirib Mirziyoevga maktub yozdi. ...
Bloglar
2 mart 2021
Bir og‘aynim qo‘qqisdan men haqimda daholarcha bashorat qilib bunday deb qoldi: Kerak bo‘lsa, ming foiz ...
25 fevral 2021
Bolaligimda mendan 5-6 yosh katta qo‘shni kaptarvoz bola bo‘lardi. Ko‘pincha kaptarlari bizning hovlimizga uchib kelib ...
17 fevral 2021
Hali gazga o‘tilmagan yonilg‘i sifatida faqat benzindan foydalaniladigan vaqtlar edi. Benzin esa avtomobillarga yonilg‘i quyish ...