Ko‘zqarash
26 yanvar 2019

Yaxshilik qilish haqida

Yaxshilik va umuman odamlarga yaxshilik qilish haqida yozgim keldi negadir. Qamoqqa tushgan xorazmlik jurnalist Davlat aka faqat hammaga yaxshilik qilar edi. Bugun unga tuhmat qilib ustidan yozib berganlar ham Davlat akadan yaxshilik ko‘rgan. “Aroq ichdi”, deb unga tuhmat qilishgacha borishgan. Obro‘sizlantirish uchun. Holbuki, u qamalishidan bir kun oldin ham masjid ochish masalasida diniy idora bilan jang olib borayotgan edi…

Men bir marta begona oilaga o‘zim bilmasdan, rejalamasdan yaxshilik qilib qo‘yganman. Haligacha rahmat eshitaman. Bir kuni Rossiyadagi (Piterda) katta savdo markazida yurgan edim. Yumshoq o‘yinchoqlarni chimdib olib qarmoqqa tushiradigan o‘yin avtomatini ko‘rib qoldim. O‘zim bir muddat kranchi bo‘lib ishlaganman. Printsip bir xil. Xullas, shisha idish ichidagi ikkita yumshoq o‘yinchoq. Bir dona ayiq va filni temir hovuchga siqib ushlab oldim. Yutuqni qo‘ltig‘imga tiqib chiqib ketayotsam, o‘rindiqda bir ayol bolasi bilan o‘tirgan ekan. O‘ris ayol.

Nima qilaman yumshoq o‘yinchoqni deb, anavi bolaning oldiga borib: “Ma, ol, mendan senga sovg‘a”, dedim. Bola o‘yinchoqni olib “rahmat, amaki”, dedi. Onasi dod deb yig‘lab yuborsa bo‘ladimi. Gap shundaki, uch oy oldin bola maktabdan avtobusda kelayotganda avariyaga uchragan. Bolaga hech narsa qilmagan ham shok bo‘lib gapirmayotgan ekan. O‘sha bola birdan gapirvordi.

Onasi rahmat deb mening telefonimni olib qoldi. Bolaning tug‘ilgan kunida chaqiraman seni mehmonga, deb. Men ham berdim telefonimni va unutib yubordim. Bu orada Piterdan Moskvaga ko‘chdim. Moskvadan Ryazanga. Bir kuni telefon bo‘lyapti. “Bugun Igorning tug‘ilgan kuni, u o‘zbek amakisini tort bilan mehmon qilmoqchi”, deydi. Igor kimu nega meni tort bilan siylamoqchi.

Hech tushunmadim. Rahmat men, Ryazandaman, bora olmayman, deb xayrlashdim. Bir payt yana telefonim jiringladi. Endi erkak odam “Qaerdasan?” deb manzil so‘radi. Ryazanlik biznesmen bola ekan, “Porshe” moshinada kelganidan bildimki, o‘ziga to‘q odam. Gapning qisqasi, u meni Ryazandan olib, uch soat yo‘l bosib, Moskvadagi Leningrad vokzaliga olib bordi. “Krasnaya strela”ning SV kupesiga bilet olib berdi. Ketdim Piterga. Bir parcha tort yeyishga…

Bolaning otasi va onasi meni xoloskor kabi qarshi oldi. Chunki doktorlar bola umrbod gung bo‘lib qolishi mumkin, deyishgan ekan. Men ham o‘zim bilmay bir oilaga yaxshilik qilganimdan sevindim. Bolaning otasi Piterdagi fin shirkatida top menejer. Onasi esa Neva tumani ma'muriyatida bo‘lim mudiriga o‘xshagan ishda ishlaydi.

Shu voqeaga ham ikki yilcha bo‘ldi.. Nima demoqchi edim. Yaxshilik qilaylik, azizlar. Hech bo‘lmasa, bilmasdan, reja qilmasdan. Yaxshilik chegara, millat, irq tanlamaydi.

Assalom, O‘zbekiston, juma muborak!

Rassom Tuz
Eltuz.com

Tag‘in o‘qing
20 sentyabr 2016
Amerikaning ikki shovvoz vatandoshi Tomas Gaskel Allen (Thomas Gaskell Allen) va uning do‘sti Uilyam Luis Saxtleben (William Lewis Sachtleben) ...
15 mart 2019
Odamlar eski paytda turlilikka toqatli bo‘lgan. Eski fotografiyalarda odamlar boshlaridagi do‘ppilar ham har hil ekanligini ko‘ramiz. Keyinchalik bir xillik ...
19 aprel 2019
Folbinlarga ishonmayman, lekin ularning biznes modeliga qoyil qolaman. Bir qarashda kelajakni tavakkal aytib, mijozni bunga ishontirish juda qiyinga o‘xshaydi. ...
Bloglar
2 iyul 2020
6-sinfda o‘qirdim, Kampuchiyada davlat to‘ntarishi bo‘lib hukumatga Pol Pot rahbarligidagi “Qizil kxmerlar” kelganini, ular butun ...
25 iyun 2020
​​Xalqaro press-klubda matbuot anjumani bo‘lib o‘tibdi, unda Inson huquqlari bo‘yicha Milliy markaz direktori Akmal Saidov ...
21 iyun 2020
(bo‘lgan voqea) Tarjimon sifatida Rossiyaning militsiya bo‘limlaridan biriga chaqirishgan edi. Bo‘limda jinoyatchi sifatida gumon qilingan ...