«Eltuz»ga maktub: Masjid tinch

O‘zbekiston musulmonlari idorasida rais o‘rinbosari bo‘lib ishlagan Dilshodbek Hoshimov ushbu muassasaga Jasliq qamoqxonasi mulozimligidan kelgan edi. 

D.Hoshimov Jasliqda katta nozir bo‘lgan. U joriy qilib ketgan ahmoqgarchiliklaridan bittasi har kuni ertalab soat sakkizgacha “masjid tinch”, deb vakillikka telegram orqali xabar yuborish edi. 

Bu ahmoqgarchilik keyinchalik Dilshodbek Hoshimov ishdan olinishi barobarida bekor qilindi. Lekin Chilonzor va Olmazor tumanlarida haligacha davom etyapti. 

Chilonzorda Ergashboy domla, Olmazorda Sadriddin domla bu kabi ahmoqgarchiliklarni organ xodimlaridan ham orttirib bajarishadi. 

Masjid ibodat makoni, eng tinch joy bo‘lsa, organ yoki harbiy ob'ekt bo‘lmasa, shu ishni har kuni qilish shartmikin? Hatto jinoyatchi, eng retsidivist shaxslar ham masjidni hurmat qiladi. 

Qachon biroz kech qolib ketilsa, darrov vahima qilishadi. Ergashboy domla ishdan bo‘shatish, chora ko‘rish bilan tahdid qilsa, Sadriddin qiyomatda javob berasan, deydi. Masjid tinch, deb xabar bermagan odam shu xususda qiyomatda ham so‘roq qilinar ekan. 

Yoki bo‘lmasa, Olmazor tumanidagi Islomobod masjidida Ramazon oyida bundan bir necha yil avval MXXchilar o‘zlari uyushtirgan qotillik fitnasini ro‘kach qilishadi. 

Militsiya ancha-muncha narsaga masjid uchun ko‘z yumsa ham Ergashboy domla va Sadriddin vahima qiladi. Xuddi qirq yildan beri urush bo‘layotgan yurtdek, vahimasidan, har ikkisining do‘q-po‘pisasidan juda to‘ydik.

Chilonzor tumani imomlarining telegramdagi guruhiga tuman DXXsi boshlig‘i Abdurashid Qayumov, DXX tuman bo‘limi xodimi Sa'dullo, tuman IIB terrorizmga qarshi kurashish bo‘limi xodimi Umid va hokimiyatdan ham bir xodim qo‘shib qo‘yilganiga nima deysiz? 

Iltimos, shuni post qilib chiqarsangizlar. Zora, bu kabi behuda tashvishlardan qutulsak… Oldindan rahmat!