«Milliy tiklanish» partiyasi «Karimov asarlari bilimdoni»ni aniqlash bilan ovora

«Milliy tiklanish» partiyasi «yoshlarning Vatanga muhabbatini oshirish», «ularni milliy istiqlol g‘oyasiga sadoqat ruhida tarbiyalash»ga qaratilgan ko‘pdan-ko‘p tadbirlari qatorida «Prezident asarlari bilimdoni» esselar tanlovini ham o‘tkazdi.

Bu tanlovda 1300 dan ortiq kitobsevar qatnashganini iddao qilgan «Milliy tiklanish» gazetasining yozishicha, prezidentning «Ona yurtimiz baxtu iqboli va buyuk kelajagi yo‘lida xizmat qilish – eng oliy saodatdir» to‘plamining bosh g‘oyasi bo‘lgan «Kecha kim edigu bugun kim bo‘ldik?», «Ertaga kim bo‘lishimiz, qanday yangi marralarni egallashimiz kerak?» degan savollarga javob izlash esselarning bosh mavzusi bo‘lgan.

«Prezidentimizning yuqoridagi asari keng dunyo jamoatchiligi, tarixchi, siyosatchi, ayniqsa, yoshlarning e'tibori va e'tirofiga sazovor bo‘lgani»ni ta'kidlagan gazeta bu tanlovga qiziqish yildan-yilga ortib borayotganini bildiradi.

Tanlov g‘olibasi, O‘zMU tarix fakulteti talabasi bo‘lgan qizcha «davlatimiz rahbarining mustaqillikka erishish arafasida – murakkab tarixiy va qaltis davrda so‘zlagan nutqlari va ma'ruzalarining ijtimoiy ahamiyati anglansa, «Men mamlakatimda tinchlikni ta'minlayman» degan ezgu g‘oya bilan yashaydigan yoshlar safi kengayishi»ni bashorat qilgan.
Bu ketishda partiyalar «navoiyxonlik», «mashrabxonlik», «boburxonlik»ka uyqash qilib, «prezidentxonlik kechalari»ni o‘tkazish estafetasini boshlab yuborishi ham hech gap emas.

Eltuz.com