Dayjest
8 iyun 2016

Balandlab-balandlab ketayotgan bayrog‘imiz

O‘zbek telekanallaridan ko‘rib bildikki, sportda ham yutuqlarimizning son-sanog‘i yo‘q ekan. Telekanallarning bu sohaga e'tibori ham zo‘r. Axir sportimiz erishayotgan yutuqlar, buning asosiy sababchisi kim ekani, kimning g‘amxo‘rligi va e'tibori natijasi ekanini odamlarga yetkazmasak, xalq bilmay qolishi mumkin-da.

Bir yigitcha karate bilan 7 yildan beri shug‘ullanar ekan. Xalqaro toifadagi sport ustasiman, dedi kamtarlik bilan. O‘tgan yili prezidentimiz Qashqadaryoga tashrif buyurganida yosh sportchi sifatida so‘zga chiqib, keyingi musobaqada albatta oltin medal olaman, deb va'da bergan ekan.

O‘zbek so‘zida turadigan xalq. Bu yigitcha ham shundan keyin yaqinda Istanbuldagi musobaqada «O‘zbekiston bayrog‘ini baland ko‘tarib», so‘zining ustidan chiqibdi.

«Biz O‘zbekiston yoshlari hech kimdan kam emasmiz, biz hech kimdan bo‘lmaymiz ham», dedi g‘urur bilan. Sal bo‘lmasa, ko‘zlariga yosh olishi ham mumkin edi. Lekin irodasi kuchli ekan. O‘zini tutdi. Axir televizorda har narsaga ko‘ziga yosh oladigan yigit bo‘lib ko‘rinishni istamadi-da.

Hatto bittasi prezidentning «Hech narsa mamlakatni sportchalik tez dunyoga  tanita olmaydi», degan so‘zlarini hayotining shioriga aylantirib olibdi. Yengil atletikachi qiz. Osiyo rekordini ikki marta yangilagan. Sportda erishgan muvaffaqiyati uchun Zulfiya mukofotini olgan.

«Bundan e'tibor faqatgina bizning mamlakatda mavjud», dedi u ham g‘urur bilan. Lekin nega jahon maydonlarida faqat qop-qora, qop-qora qizlar birinchi o‘rinni oladi, sen ularning soyasida ham ko‘rinmaysan-ku, deb hech kim aytmadi. Qizcha uyalmasin deyishdi shekilli.

Eng e'tiborli jihati, hamma sportchi yigit-qizlarimiz faqat O‘zbekiston bayrog‘ini baland ko‘tarishga ishqiboz. «Sport» telekanalini bir ko‘ring, qaysi gapirsa, darrov bayroqdan keladi. «Agar bayroqni yuksaltira bersalaring, bunday baland ko‘taraversalaring, ko‘rinmay ketadi-ku», deb istihola ham qilib qo‘yadi odam.

Mana, qo‘shni Tojikistonda ham bayroqni baland ko‘tarishga ishqiboz bir odam bor. «Millat peshvosi». Bayroqni faqat baland ko‘tarib yurishdan boshqa ishlari ham bor uning. Shuning uchun bayroqni dunyoda eng baland qilib ko‘tarib turishga moslab bitta imorat solgan. Flagshtok deydi bilganlar. Shunchalar balandki bayrog‘i, qaragan odam madaniyatliroq bo‘lsa, shapkasi tushib ketadi, bundayroq odam bo‘lsa, qaragandan keyin do‘ppisini yerdan qidirishiga to‘g‘ri keladi.

Biz ham shu jihatiga e'tibor berishimiz kerakka o‘xshaydi. Sportchilarimizning qo‘lini har doim bayroq bilan band qilib qo‘ymay, o‘sha Tojikistondagidan ham balandroq bitta flagshtok qursak, yomon bo‘lmasdi. Sportchilarimizning qo‘li tolmasin deyman-da. Qo‘li tolsa, yutqazib qo‘ysa birorta musobaqada, keyin o‘zimiz uyalib qolamiz-da!

Eltuz.com

Tag‘in o‘qing
6 noyabr 2019
Yaqinda “Sharq ziyokori” kitob do‘konidan ulug‘ rus yozuvchisi Lev Tolstoyning “Jaxon bestsellerlari” ( aslida “jahon” bo‘lishi kerak) turkumi ostida ...
19 fevral 2021
Ehtimol boshqa oilada dunyoga kelganida u mashhur turk rassomi sifatida ulug‘langan va san'at tarixi zarvaraqlarida muhrlangan bo‘lar edi. Biroq ...
19 dekabr 2019
Britaniyaning nufuzli The Economist  jurnali O‘zbekistonni «2019 yil mamlakati» deb e'lon qildi. Nashr so‘nggi yillarda mamlakatda muhim islohotlar amalga ...
9 may 2019
“Ishdagi ishq”, “Ivan Vasilevich kasbini o‘zgartiradi”, “Sannikov yeri” kabi kinolarni o‘zbek tilida gapirtirgan dublyaj rejissyori Mirg‘iyos Soatov 9 may ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...