Xorijga chiqarilmaslik uchun shaxs qanday «gunohlar» qilishi kerak?

«Adolat ko‘zgusi» gazetasi bugungi O‘zbekiston uchun muhim muammo – qanday shaxslarning xorijga chiqarilishi cheklanishi haqida maqola e'lon qildi.

Unda aytilishicha, xususan, davlat siri hisoblangan ma'lumotlarni tashuvchilar, ustidan jinoyat ishi qo‘zg‘atilganlar, sudlanganligi bekor qilinmagan alohida retsidivistlar yoki IIV nazoratidagi shaxslar, sud tomonidan yuklangan majburiyatlarni ijro qilmaganlar, ustidan sudda da'vo qo‘zg‘atilganlarning xorijga chiqishi cheklanadi.

Shuningdek, harbiy xizmatga chaqirilganlar, IIV va Tashqi ishlar vazirligi tomonidan shaxsning chet elda bo‘lgan vaqtida kelgan mamlakati qonunlarini buzganlar, o‘zi haqida soxta ma'lumotlar taqdim etganlar ham chet elga chiqarilmaydi.

Maqola so‘nggida o‘zining chet ega chiqish huquqi buzilganlar kirish-chiqish va fuqarolikni rasmiylashtirish bo‘linmalarining yuqori organlariga murojaat etishi mumkinligi eslatib o‘tilgan.

Shu bilan birga, O‘zbekiston fuqarolarining chet elga chiqishi tartibining ayrim kichik bandlarida ko‘rsatilgan sabablar bo‘yicha chet elga borish huquqini cheklash ustidan shikoyat qilinishi mumkin emasligi ko‘rsatib o‘tilgan. Lekin bu bandlarda nima deyilgani aniqlashtirilmagan.

Gap shundaki, bugun chet elga chiqish vizasi berilmayotganlarning aksariyati hukumat bilan murosalari kelishmayotganlar yoki ularning yaqinlari ekani to‘g‘risida mustaqil OAVlarda ko‘p yozilmoqda.

Ulardan biri mustaqil jurnalist Malohat Eshonqulovaning qizi Zarnigordir. U ham bir necha marta xorijga chiqish uchun ruxsat olish maqsadida hujjatlarini topshirganiga qaramay, o‘z niyatiga yeta olgani yo‘q. Hatto mustaqil OAVlarda uning mamlakat rahbariyatiga murojaatlari ham e'lon qilindi.

Qizig‘i shundaki, quyi organlar uning xorijga chiqish huquqi nega cheklanganini aytayotgani yo‘q. Yuqori organlar esa og‘ziga mum tishlab olgan.

Balki bu boradagi qonunchilikning nima yozilgani aniqlashtirilmagan ba'zi bandlarida «hukumatning yo‘rig‘iga yurmaganlar xorijga chiqa olmaydi», degan so‘zlar bitilganmikin?

Eltuz.com