«O‘zbekistonliklarning avtobusda yonishi – qashshoqlik tashxisidir!»

18 yanvar kuni Samara-Chimkent avtoyo‘lida yonib ketgan eski «Ikarus» avtobusida 52 nafar o‘zbekistonlikning halok bo‘lishi ijtimoiy tarmoqning o‘zbek segmentida ko‘plab savollarni o‘rtaga chiqardi.

Nima uchun yana aynan o‘zbekistonliklar? Nega fojea yuz bergan payt avtobus eshiklari ochilmagan? Nega Rossiya-O‘zbekiston qatnoviga eski avtobus qo‘yilgan?

Londonlik tahlilchi Alisher Ilhomov: «Bu fojea O‘zbekiston iqtisodiyoti qashshoq holatda qolayotganining yana bir tashxisidir», deya yozdi.

«Mamlakatning iqtisodiy o‘sishi to‘g‘risidagi ilgarigi va bugungi gaplar safsata ekanini e'tirof etish kerak. Agar bunday bo‘lmaganida edi, mamlakat aholisi to‘p-to‘p bo‘lib Rossiyaga ishlagani chopishmasdi. Mamlakatdan qochib chiqayotganlarning «normal» transport – temir yo‘l yoki aviatsiyaga puli yo‘q. Ular Qozog‘iston avtobus haydovchilari xizmatidan foydalanishadi. Ularning xizmatiga talab shu qadar kattaki, hatto buzuq avtobuslarni ham ishga solishadi. Aksincha yo‘l tutishsa, foydadan benasib qolishadi.

Shu bois, sodir bo‘lgan voqea aksariyat aholisi qashshoq va ommaviy migratsiya yoqasidagi mamlakat holatining mutlaqo qonuniyatli xotimasidir. Xo‘sh, 2018 yil kutilayotgan narxlar oshishi nimaga olib kelishi mumkin? Migrantlarning yangi to‘lqinigami? U holda bu kabi yangi fojealarni bashorat qilish qiyin emas, darvoqe, bunday voqealar ilgari ham bo‘lgan».

Mamlakatda motam e'lon qilinishi kerakmi?

Ijtimoiy tarmoqda yurtdoshlarning o‘limi yuzasidan mamlakatda motam e'lon qilinishi kerak, degan fikrlar yangramoqda.

«Normal mamlakatda motam kuni e'lon qilishardi. O‘zbekning joni shunchalik qadrsizmi?» deb yozdi jurnalist Sirojiddin Tolibov o‘zining feysbukdagi sahifasida.

«Biz yetarli darajada tezkorlik bilan rasmiy ta'ziyalar yo‘llaymiz… odamlar halok bo‘layotgan barcha davlatlarga… va bu to‘g‘ri! Bugun mening 52 nafar hamyurtim tiriklayin yondi… O‘zbekistonda motam uchun juda yetarli asos bor…», deya yozdi buxorolik huquq faoli Shuhrat G‘aniev.

Hozirgacha Turkiya tashqi ishlar vaziri Mevlud Chovusho‘g‘li, bir qancha davlatlar rahbarlari avtobus halokati munosabati bilan O‘zbekiston hukumatiga hamdardlik bildirishgan.

Fojeani o‘rganish yuzasidan prezident Shavkat Mirziyoev hukumat komissiyasi tuzgan.

Eltuz.com